تقارير حقيقية للسيد الرئيس ومجلس الوزراء

[الاستاذ على الدين يحيى]

كلنا نشكو حال البلد والآهمال والفساد السائد فيه !! ولكننا لم نفكر فى طريقة أو نأخذ خطوة للمساعدة فى القضاء عليه .
وأنا اتخيل أنه ليس من المعقول تصور أن القائمين على رأس البلد خونة فهذا لا يعقل بأى حال من الأحوال ولكنى أتصور أن هناك قصور منهم لأداء مهماهم على أكمل وجه . هذا القصور أكيد عن غير قصد !
وأنا أرى إن كل مسئول فى بلدنا يتصرف من موقعه تبعاً للمعلومات التى تصله من المختصين بذلك
ونحن فى دولتنا العظيمة مصر مساهمين بشكل أو بآخر بسلبيتنا تجاه مشاكلنا ونلعن الحكومة لأنها لم تقض على مشاكلنا بل أحياناً نصل إلى حد إتهامهم بأنهم هم الذين أوجدوا هذه المشاكل !
أخوانى الأعزاء أعضاء منتدانا الرائع : كما رأيت فى أفلامنا إن السادة المختصين بتوصيل المعلومات الصحيحة للسيد المسئول يخفونها عنه بحجة أنه مش ناقص مشاكل وكفاية اللى هو فيه!
وربما إذا علم المسئول بها لعمل على إصلاحهها ومواجهتها .
ومن هنا جاءتنى فكرة أن نقوم نحن بعمل المسئولين عن توصيل المعلومات الصحيحة بكل أدب فى الحوار واحترام لهيبة هذا المسئول
فما رأيكم أن يكتب كل واحد منا عن واقعة فساد أو موقف خاطئ أو استغلال موظف أو غيره فلعل يصل كلامنا إلى السيد الرئيس أو أعضاء الحكومة وساعتها نكون قد عملنا اللى علينا .
وأنا هنا أؤكد أن يكون التقرير الذى يكتبه أحدنا ليس عن واقعة سمعها فهذا يكون من ضرب الإشاعات ولكن لابد أن يكون كاتب هذا التقرير عايشه بنفسه وملم بكل جوانبه ويراعى فيه عدم ظلم أحد أو إهانة أحد أو البحث عن مصلحته الشخصية وأيضاً نكتب التقرير بكل احترام وأدب الحوار كل فى موقعه وكذلك لانشمل التقرير برأى شخصى ونكتفى بكتابة الحقيقة كما هى . أرجو الرد السريع فى انتظار مشاركاتكم . معاً يداً واحدة فى سبيل بلدنا العزيز مصر .

[ahmed 68]

فكرة طيبة ومشكور عليها

[شمس بياض]

واجب برضو

بس تفتكر مين فينا ها يوصل الرساله دا لو وصلت كما قلت انت
الله المستعان
اسال لماذا الريس يجلس مكانه ويوصل له الاخبار لماذا لم ينزل بنفسه ويرى على الطبيعه
سيدنا عمر ابن الخطاب كان يقول
لو ان دابه فى العراق عثرت وان فى المدينه لسوءلت عنها
الله يولى من يصلح

[طارق يقطين]

و الله دى فكرة جميلة ولكن الاجمل ان احنا نكتب السلبيات
على مراسلات رئاسة الجمهورية لانه بالتاكيد مفيش حد
مننا يتوقع من المسئول الاول عن البلد يبص على موقعنا بتاع الناس الغلابة اللى هم المدرسين اللطفاء الظرفاء اللى ما لهمش اى صوت او حركة و مستانسين بالاخر
ويارب يكون فيه نتيجة ياااااااااااااااااااااااااااااااااااااااااااارب

[الاستاذ على الدين يحيى]

ياأخى العزيز أنا أعتقد إن مراسلات رئاسة الجمهورية هى من ضمن المسئولين الذين يخفون بعض المعلومات عن السيد الرئيس بنفس الحجة بأعتبار سيادته مشغول بأمور كثيرة وأهم منا !

[ayman24279]

وليه الريس بنفسه ما ينزلش الشارع ويسأل الناس ويأخذ المعلومة من مصدرها الحقيقى ، وليه لحد الآن لم يتم تسكين بتوع الدويقة ، برضه المعلومات ما وصلتش

[ايمن الشريف]

يا عم قووووووووول يا رب

[وفاء البحر]

وايه فايده الكلام مدام مفيش اللي يسمع
عموما هي فكره كويسه بس صدقني صعب توصل
مش لازم نستني ان حد يغير لنا المفروض ان احنا اللي نغير

[الاستاذ على الدين يحيى]

شكراً لك يا أخت وفاء ولكن ليس هناك صعب نحن نحاول ونكون عملنا اللى علينا ويمكن تييجى على أهون سبب . مع الشكر مرة أخرى

[يوسف الشوري]

هو الفساد من أقل موظف هواللي مخلي الدنيا بايظه وزي مافي وزراء ومسئولين بيحبوا البلد في مسئولين بيدوروا علي مصضلحتهم وهيستفادوا ايه بقدر الامكان من منصبهم ربنا يهدي الجميع نفسي مصر شأنها يكبر

[وفاء البحر]

المشاركة الأصلية كتبت بواسطة على الدين يحيى ابراهيم

شكراً لك يا أخت وفاء ولكن ليس هناك صعب نحن نحاول ونكون عملنا اللى علينا ويمكن تييجى على أهون سبب . مع الشكر مرة أخرى

اوكي نحاول يمكن مين عارف مش يمكن حنا متراقبيين دلوقتي
سلام بقي احسان دول بيخبطواوشكلي كده هتاخد من دوله
ده انا هيتعمل في عمايلما تنسونيش بالعيش والحلاوه ده لو عرفتولي طريق