رعشة وتر..

[وللأشواق عودة]

رعشة وتر ..

من بعيد سامع صوت الكمان..
رعش الوتر ماشي مع دق قلبي..
ولا قلبي هوه رعشة من وتر؟
دايماً فى أوقات الوجع..بسمع كمان
وأقول كمان..
يا نار جروحي
قولي بوحي
أصل الوتر يشبه لروحي..
عاشق يردد غنوته
دايماً حياته ودنيته
مقطوعة يعزفها الألم
لون الندم..
يملا طريقه وسكته
حتى البكى
هوه معنى لضحكته..

دايماً في أوقات الوجع..بسمع كمان
واقول كمان..كمان يادنيا
خليكي قاسية..
أصل الحكاية متستهلش
فرحي وبكايا مينسمعش..
لون السما..صوت المطر..تاني الوتر
يرعش في قلبي يقولي لا
قوم انتفض لسه الحياه..
فيها المنى..لسه الغنا
طالع لفوق..فوق القمر..

دايماًفي أوقات الوجع..بسمع كمان
واقول كمان..كمان ياقلبي
إبكي وبكي
إشكي ليالي متنتهيش
فيها الألم حالف يعيش..
صوت الطيور فوق الشجر
ما هو برضه صوت وتر
يرعش في قلبي يقولي فوق
لسه النهار مليان بشوق
دانت كلك..نبض قلبك
لسه رعشة من وتر..