موال الحنين والشوق

[العزب فتحي]

موال الحنين والشوق

أنا والليل وموال الحنين والشوق

ف قلب حزين

يحبك فوق ما يقدر قلب

يتحمل محبة وشوق

وشوقي أنين ........مالوش آخر

ومش فاكر عشقتك فين

ولا عارف عشقتك ليه

وإيه خلَّى الفؤاد يختار

يخش النار كدة برجليه ؟؟؟؟؟؟

يكون مجنون !!! ؟

م كل العاشقين مجانين

وانا عاشق

جمعت حروف لغات الكون

عشان أكتب حروف إسمك

لقيت كل الحروف عاجزين

جمعت الوان .....

وقلت ف نفسي انا فنان

وهارسم تاني .... "موناليزا"

لقيت " ليوناردو دافينشي"

يقف عاجز قصاد حسنك

***

عيونك ضي ليل غدار .... ف بحر كبير

وانا ملاح ، شراعه كسير ، وقلبه أسير

يشوف النور يقول بر الأمان أهو لاح

يقَرَّب ....... تنطفي الأفراح

واعود تاني أعيش ف ضلام

وليل أحلام

منيش عارف أروح على فين

وفين يضْويلي قنديلك

واناديلك ....... بصوت مبحوح

أنا المجروح على بابك

على اعتابك بدرت الشوق

وعشت سنين على ذكرى

وأمل يطرح ف يوم الشوق

أقول بكرة ... يفوت بعد النهار ميت ليل

لا حلم جميل ولا لمحة أمل بتبان

عشان نور القمر مخنوق

وعشت لوحدي انا والليل

وموال الحنين والشوق

وقلب حزين

يحبك فوق

ما يقدر قلب يتحمل محبة وشوق

العزب فتحي