دعوة للخروج من موقع بوابة الثانوية العامة ... ليه ؟؟؟

[الاستاذ محمد سرور]

السلام عليكم ورحمة الله بركاته

قررت الخروج من التراسل الخاص من خلال الرسائل الخاصة على الموقع
لطرح الموضوع اما الجميع لمناقشته
سواء كان طالبااو مدرس او مشرفا او ادارى

وان رأت الادارة ان تخرج الموضوع للقسم العام فهذا ما اتمناه

طبعا لحد الان الكل شايف كلامى فيه لهجة نفور وضيق ودعوة للخروج من الموقع

طبعا كل دة غير صحيح

ولكن الامر على عكس ذلك تماما

انا عايز نخرج خارج الموقع لنأتى باعضاء جدد وكتير للموقع

بالراحة كدة تعالى معايا احسبها وحتعرف انا قصدى ايه من كلامى دة

احسب معايا

فى كام طالب فى الثانوية العامة
طيب فى كام واحد عنده نت
طيب فى كام واحد عنده نت بيدخل النت علشان يتعلم
طيب اللى داخل على النت باحثا عن العلم ما هو احتمال مقابلته لموقع بوابة الثانوية العامة
انا عن نفسى وكتير دخلوا الموقع بالصدفه صح ولا لأ

طيب خلينا واقعين

فى موضوع فى القسم التعليمى وصلت مشاهداته الى 2000 مشاهدة مثلا ...طبعا لا اعتقد
وخد بالك انا بقول مشاهدة مش رد

وطبعا المشاهدات دى فيها جزء متكرر وفى الغالب بتكون لصاحب الموضوع ..صح

يعنى الواقع ومن خلال الارقام بيقول ان المستفدين من القسم التعليمى تقريبا 2000 على اقصى تقدير
طيب واحد يقولى ما هوانت عندك مراحل مختلفة واكثر من مادة

ماشى انا معاك وحكون متفائل وقول من عندى 100 الف طالب مستفيد وطبعا دة مش حقيقى

المهم خلاصة الكلام اللى فات دة
اننا لازم نشوف نفسنا صح .... ما ينفعش يبقى كل كلمنا احنا الموقع التعليمى رقم واحد
احنا اقوى مجموعة مدرسين على النت
احنا داخلين فى منافسة مع مواقع تانية ولازم نظهر لهم اننا الافضل

كلام كله جميل ... بس عذرا ... لا يدعمه من الواقع سوى 20% تقريبا

قول لى ليه
لما يبقى عدد الطلاب فى مصر يحسب بالملايين واحنا بنتكلم على كام الف نبقى كدة عذرا احنا مش واقعين

واحد زى مستر على الدين يحيى مشرف رياضيات 2
هذا على سبيل المثال لا الحصر علشان محدش يزعل

ومن غير تذويق وبصراحة حسأل سؤال لكل اللى ح يرد

من يعرف هذا الرجل ...من قرأ له اعماله على النت منكم
لو كان بيدى لجعلت هذا الرجل مؤلف لكتاب الرياضيات للثانوية العامة حقا

هه مين يعرفه من اعضاء الموقع

اعتقد ان عد ما يعرفه لايتعدى المائة
وهو بذلك العلم
فما بالكم بمن هم خارج الموقع
مش عايز اقولكم ان احد المدرسين حط رابط لاعمال الاستاذ على... على احد المواقع التعليمية وللاسف لم يدخل احد الى هذا الموضوع بالرغم من ضئالة مستوى المادة العلمية على هذا الموقع ولن اذكر اسمه لانه موقع محترم ولكنهم لم يلتفتوا ان ما وضعه زميلهم المدرس يعد مرجع تعليمى لهم فى الرياضيات
ماذا فعل الموقع لاظهار عمل هذا الرجل امام جميع طلاب مصر ليستفيدوا من علمه ولا يكونوا بحاجة لشراء الكتب الخاجة باسعارها الحاليه

حد ير على عمل ايه الموقع

المهم انا اتكلمت كتير ومش واضح انا عايز ايه

معلش اصبروا على

فى شهر 8 حضر الاستاذ اشرف اجتماع على الغرف الصوتية وذكر انه سيتم التنسيق بين الموقع واحد القنوات الفضائية لعمل برنامج تعليمى تحت رعاية الموقع وكان الكلام على قناة الرحمة او الناس .... وللاسف كان كلام

المهم انا عرضت فكرة ان ادارة الموقع تنسق مع قناة الرحمة لعمل برامج تعليمة عليها يشترك فيها مدرسى الموقع كنوع من الدعاية للموقع ويتم اختيار المدرسين الاكفاء لتمثيل الموقع فى هذا الامر

ارسلت عدة رسائل للادارة ولكن لا مجيب حتى الان

والطريف فى الامر انه بدلا من ان نعلن نحن عن انفسنا فى قناة الرحمة فوجئت باحد الموضوعات فى قسم الغرف الصوتية به تسجيلات لشروحات لمدرسين اخرين

يعنى بدل ما احنا نروح نعلن عن نفسنا من خلالهم .. هم اللى اعلنوا عن انفسهم عندنا

الصراحة ومن غير مجامله انا احترم هؤلاء الاشخاص فعلا

طيب واية المطلوب الان

والله انا لست عاجزا ان اذهب لهذه القناة واشرح بها لوحدى

لكون كان هدفى انه لما يكون العلاقة بين الموقع والقناة
ح يتم الاعلان عن الموقع من خلال هذه القناة وبكدة حتلاقى الناس اللى مش عندها نت حتروح اى سايبر وتدخل النت وكل هدفها الوصول الى الموقع الثانوية للحصول على مذكرة المدرسين اللى بيشرحوا على هذه القناة

يعنى ح يبقى الموقع هو هدف زائر النت فى المقام الاول ... مش يا قابله صدفه

وطبعا الموضوع دة حيكون ليه اثاره على ما تريد الادارة عمله من انشطة اخرى والاعلان عنها وعد معايا

1- شهرة للمجلة التعليمية
2- اعلان عن الرابطة وعمل الجذب اللازم لها
3- اذا ارانا عمل ملخصات او كتب ستكون لها معرفة مسبقة من الاهالى لا من يراعها هو موقوع البوابة اللى شافوا قوة مدرسينه على هذه القناة

سؤال يبقى مطروحا فى ذهن البعض

الموضوع دة حيخدم المدرسين اللى قريبين من القاهرة بس

انا بقى اقولك لأ طبعا

هو انت لما بتروح اجتماع وبينك وبينه ساعات وحصل دة على الموقع بالفعل فى اكثر من اجتماع الفيوم والقاهرة وبنها والقناطر وكان فى ناس راحت البحيرة

يعنى كونك توفر عدد من الساعات لتسجيل حصة على القناة مش مشكلة انك توفره حتى لو انت منين

والان منتظر
ردودكم وخاصة الادارة

يوجد عدد من المدرسين مع هذه الفكرة
يا ترى الادراة تحب هى ترعى هذا الامر ولا نروح لوحدنا ويبقى الموضوع خاص بينا نحن فقط بعيدا عن الموقع

الموضوع مطروح لاسبوع قبل اتخاذ القرار النهائى

هل سيتم رعاية الامر من قبل الادارة ام لا

وياريت ما يكنش الرد بالموافقة من قبل الادراة فقط
الموافقة ان كانت يصحبها موعد للحضور للقاهرة للتحدث مع القناة والتنسيق معها والا سنعتبره تسويفا

اعتقد الان وضح سبب العنوان الغريب للموضوع
لن نترك النتدى ولكننا نريد ان ننشتر اكثر ونخرج بالمنتدى نفسه الى الناس