احتاج الى مساعدة ضرورى

[أمـانـى]

السلام عليكم و رحمة الله


انا أمانى فى سنة تالنة طب
مش هطول عليكو بس يا ريت اللى يعرف يساعدنى يساعدنى و ان شاء الله هيبأى ليه ثواب كبير

هى مش مشكلتى لواحدى دى تقريبا مشكلة ناس كتير اوى فى سنى و اكبر منى


من و انا صغيرة و انا مهتمة جدا بدراستى و دايما كنت بطلع من الاوائل و لحد دلوقتى دراستى كل حاجة فى حياتى معرفش غيرها ....عشان قدامى هدف واضح و الحمد لله حققت جزء منه بس حاسة ان فيه حاجات كتير اوى ناقصة

والدى كان هو اللى دايما بيشجعنى بس كان نفسه يعلمنى كتير اوى ..يدينى جزء بسيط من ثقافته الواسعة..بس شاء الله ان يتوفى و انا فى اولى اعدادى ..للاسف قبل ما يلحق يساعدنى او يعملى جزء بسيط من اللى كان ناويه

بعد كدا اتشغلت بالاعدادية و بالثانوية و بطب......بذاكر فى الدراسة و فى الصيف بصيف و احيانا بردو بذاكر .... يعنى بقرأ بتوسع عن الابحاث الجديدة و الحاجات اللى تخص الكلية....خدت icdl & toefl

طب فين المشكلة ؟؟

المشكلة انى كل يوم بفكر انا عايشة ليه ؟؟ جوايا حماس رهيب عايزة اعمل بيه حاجة بس مش عارفة اوجهه خايفة فى يوم ابأى عندى 30 سنة و اعدة بعيط فى عيد ميلادى ندمانة على عمرى اللى ضيعته

و كمان حاسة بالجهل الرهيب

جهل سياسى و دينى و تاريخى......مفيش معلومات خالص

ناس كتير كدا بس دى مش طبيعتى

كتير شهدولى ان ارائى ناضجة و كويسة و طريقة نقاشى ذكية و مقنعة بس للاسف بخاف من النقاش لان مش عندى معلومات كافية اناقش بيها حد

لو مكانتش مناقشة علمية مش بعرف اتكلم

و دى حاجة مسببة ليا ازمة نفسية بجد.....مش بحب ابأى فى مكان الاقى اللى حواليا بيتكلمو فى سياسة او تاريخ و انا مش فاهمة حاجة

انا عايزة اعرف حاجات كتير اوى عن تاريخ مصر و الرؤساء كلهم و السيرة النبوية و الدعوة الاسلامية و الصحابة و تاريخ الادب و الفلاسفة و اقوالهم و تاريخ العلم و السياسة و تاريخ الاخوان و الاحزاب اللى فى مصر و حقوقى فى البلد دى و الجماعات على مستوى العالم او نظم الحكم و الاحداث التاريخية الشهيرة

بس مش عارفة ابدأ منين ولا اعمل ايه ولا اقرأ انهى كتب و لانهى كتاب

اسفة انى صدعتكم بس لاحظت هنا اساتذة افاضل و ناس على قدر كبير ممن الثقافة قلت يمكن حد يقدر يساعدنى او يوجهنى او حتى يبعتنى لحد يساعدنى او اى حاجة

و لكم جزيل الشكر