إدخلوا إدعوا لأخوكم بتنجان بالشفاء .. صباعه واجعه

[أسيل رزق]

السلام عليكم ورحمة الله وبركاته

هدخل فى الموضوع على طول وعارفة إن فى ناس كتير هتعترض على كلامى علشان الناس التافهين بقوا كتير أوى

المنتدى بقى هايف جداً يا جماعة وده مش عيب من الإدارة ولا حاجة دا عيب من الأعضاء

بجد شايفة عقول كتير مش بتفكر

اللى شايف أى لفظ خارج يبقى يشيله بس كويس إنى بتكلم بالطريقة دى

حقيقى أنا مش عارفة أقول إيه .. اللى بيشتكوا من الملل على طول أكيد لوجود التفاهات فى عقول ناس كتير

عملت الموضوع ده علشان ملاحظة إن المواضيع التافهه كترت زيادة عن اللزوم ومن أكتر المواضيع دى بتاعة المواساه

ربنا يشفى الجميع

بس مش كل ما واحد صباع رجله الصغير يوجعه واحد يعمل فيها شجيع السيما ويقول يا جماعة ادعوا لاخونا بتنجان إن صباعه يخف والكل بقى يدخل يقوم بالواجب ويعمل كوبى للجملة المشهورة اسأل الله العظيم رب العرش العظيم ان يشفيه

طبعاً انا مش بقول إن كل المواضيع كده بس دى نقطة بتستفزنى جداً وخصوصاً إنها حصلت معايا من فترة لما تعبت هما يومين وطبيعى جداً عندى حكاية الضغط دى رجعت المنتدى لقيت موضوع والف سلامة وكلام من دا كتر خير الجميع مع إنى وقت ما عملت عملية محدش عبرنى ولا سأل عاملة إيه

فا أنا برجو رجاء محدش يزود فى المواضيع دى كتير مش حد عنده جاره وقع من على السلم وصباعه اتكسر ولا واحد عنده صداع نعمله موضوع

إحنا إخوات ولازم نواسى بعض بس فى حاجة تستاهل مش أى حاجة وخلاص

وفى أعضاء كتير بتبقى عايزة تعمل شو ليها أو تقول هنمشى أو تقول تعبانين علشان يتعملها موضوع ونقول ألف سلامة لالا ماتمشوش .. دى حالة نفسية جوا بعض الناس عايزين دايماً يشوفوا إهتمام من الناس غير عادى و مش بنستفاد منه إلا تضييع الوقت وتلاقى الشخص التعبان ده فى نفس اليوم اللى المفروض هو تعبان فيه يرد على كل واحد فى الموضوع اللى اتعمله

مقدماً عارفة إن الكل بيقول لازم نقف مع بعض والكلام اللى مش جايب همه ده

كل اللى عايزة أقوله إن زمان المنتدى كان هادف وإحنا واقفين مع بعض بدون أى مواضيع من دى

مش هنيجى دلوقتى نبوظ المنتدى علشان نببر إننا بنقف مع بعض

الموضوع بايظ خالص وبدون أى ترتيب بس أهم حاجة إنى طلعت اللى جوايا فيه بدل ما كنت أتخانق مع حد

والموضوع ده كمان تافهه ومالهوش لازمة