كان حتة يوم

[اشراقة]

السلام عليكم و رحمة الله و بركاته

امبارح نزلت مع بابا من البي الساعة 7 الصبح علشان اخلص ورق البطاقة بتاعتى
(و محدش يقولى انت سة فاكرة)
وهو كان هيعمل مشوار فى البنك فى محور 26 يوليو طبعا ده مشوار كئيب و الطرق بتاعته داخلة جوه بعضها

و انا كنت لسة ما نمتش من اليوم اللى قبله و بعدين كالعادة خرجت من غير فطار
بابا دخل البنك و انا فضلت مستنية فى العربية و شايفة واحدة ماسكة سندوتشتها و نازلة اكل فيها
طيب اعزمى خلاص يعنى و زى ما قولتلكم انا واقعة من الجوع ، و 3 بنات ماسكين الكتب و نازلين مذاكرة يا نهار ابيض ما بترحموش حتى فى الاجازة ، بنت خدت الطريق دلع و هى ماشية تاتا تاتا كل دول مش عارفة اوصف لكم لبسهم يعنى كان تحفة ازاى

المهم خلصنا مشوار البنك

دخلنا على مركز البطاقة و اول ما دخلنا استلمنا واحد و هاتك يا رغى و بيسأل بابا اختك و لا بنتك _ يا سلام اتعميت حضرتك مش عارف تفرق _و بعدين كتب كلمتين كده فى الاستمارة و طلب البطاقة و بابا مش لاقيها و انا اتصدمت كنت خايفة ليكون البطاقة نسيها فى البنك و الراجل واقف مش يهدى لأ يقول لبابا حد ينسى البطاقة يا عم اهمد بقى شوية
بعد حرب اعصاب لقيناها

و احنا ماشيين الراجل يقول لبابا عايزين نشرب شاى بقى يا بشمهندس

و بعد كده اكتشفنا انه اصلا البطاقة مش هتتعمل هنا :abdoog8:

ما علينا خرجنا من هناك و دخلنا مركز اصدار الوثائق لقيت واحد قاعد على الكمبيوتر للتصوير و واحد للاوراق و واحدة كده قاعدة لتسليم البطاقة الجديدة

خلصنا الورق راجل هناك قالنا اقعودوا على الكرسى اللى احنا عاملينه - انتوا مين ؟ - لحد ما تتصورى

قعدنا يجى نص ساعة حصلت فيها مهازل

اساسا موجود 3 كراسى و انا و بابا على اتنين و واحد تانى و كل ما يدخل حد الراجل يقوله اقعد على الكرسى
و بعدين دخل راجل كبير و معاه ابنه و شكلهم تايه بصراحة الراجل يقوله امك اسمها ايه يقوله ( ام الرزق ) قال رزق قال و الراجل سمعه بيقوله ام رزق راح قاله يعنى اخوك اسمه رزق بصيت لقيته غير رأيه و قاله اسمها ( رزقة) الراجل بقى هيجنن منه

و بعدين الاستاذة المحترمة اللى كانت موجودة قلت ادبها على راجل فى سن والدها _ و نعم الاخلاق_

شوية ورجع الراجل اللى قالنا استنوا التصوير و جاب الفطار معاه _ يعنى احنا مستنين سيادتك علشان لما تفطر_

اتصورت و خلصت الحكاية

و احنا فى الطريق لقينا عمال بيقطعوا عمود كهربا وواقف واحد يشاور للعربيات تمشى من بعيد علشان لما العمود يقع
طبعا حالة زى دى لو فى بلد متحضرة شوية كان هيبقى فى اعلان حالة الطوارىء _ دايما عامر يا مصر _

يللا و جعت دماغكم بس بجد انا كنت حاسة انى فى عصر ما قبل الاسرات

سلام و فى امان الله