هام : بشأن معلمى العقود المحلية وليس الوزارية

[محمد اثير]

بسم الله الرحمن الرحيم

اولا انا اتحدث عن المعلمين المتعاقدين محليا الذين يتقاضون 165 جنيه فقط وهم على ذمة المحافظة

معلمى التعاقد المحلى الذين يخلوا طرفهم من العمل بالمدرسة المتعاقد عليها بأنتهاء العام الدراسى5/31

اللى بيجدوا انفسهم دون اى عمل فى الصيف (عواطلية يعنى) ..


لما ذلك ؟؟؟ لقد ترك مننا الكثير من اعماله بعد ان وصل الى مرتبات مجزية ليتقدم الى وظيفته الى يستحقها ولكن للأسف توجه ليتقاضى 165 جنيه ليخسف بمرتبه السابق اسفل سافلين

والمؤسف اننا نتقاضى هذا المبلغ الضخم كل 3 شهور (معلش مهو يصعب توفيره )

والادهى والانيل ..انهم يقولولنا شكرا فى نهاية العام الدراسى نشوفكوا السنة الجاية بقى ؟؟!!!

ليه كل ده ؟؟؟

هل ده جزاتنا لأننا اتعلمنا وخدنا شهادات يكون تمنها 165 جنيه فى الشـهـ .... التلات شهور كمان

ما المانع اذا توفرت فى هذا الشخص الشروط المطلوبة لأختبار الكادر من اجل التثبيت ان يتقدم وهكذا للتعاقد الوزارى

هدفى من الموضوع حتى لا اطيل عليكم

1- جمع اكبر عدد من معلمى هذا النوع من التعاقد .
2- معرفة مدى انتشار هذا النوع من التعاقد على مستوى المحافظات .
3- محاولة الوصول الى حل سويا .


سؤالى الاخير واللى اتمنى انكوا تردوا علهي فيه بأجابة لأن اجابتكوا تهمنى جدا ..

هل هذا النوع من التعاقد على مستوى محافظة بورسعيد فقط ، اما هناك محافظات اخرى بها هذا النوع من التعاقد ؟

[Observer]

اهلا بيك استاذ محمد
بالنسبة لسؤال حضرتك عن وجود هذا النوع من التعاقد فى جميع المحافظات
فحسب علمى هو موجود واسمه عقد عادى مقابل 105 جنيه فقط
وفى محافظة اسوان مازال نظام العمل بالحصة قائما
وقبض المرتب غير منتظم ويتوقف فى الصيف
تحياتى

[محمد اثير]

شاكر جدا يااستاذ محمد ..بس الموضوع ده بقاله قد ايه لوسمحت ؟؟؟ وهل فى وعود بتعديله

[Observer]

عندنا فى اسوان فى وعود بعمل عقود مميزة لمن يعمل بالحصة
وده عالسنة الجديدة وكل الموجهين والمسئولين بيقولو كدة
عايزين يلغوا نظام العمل بالحصة ويستبدلوه بالعقد الموحد ( عقد المعلم المساعد )
بصراحة لو الكلام ده اتنفذ يبقى شئ كويس وهيحل المشكلة بشكل كبير
ربنا يوفقك استاذ محمد ولو فى اى اخبار هقولها لحضرتك ان شاء الله
تحياتى لحضرتك بدوام التوفيق

[محمد اثير]

شاكر جدا اهتمام حضرتك ...تقصد العقود المميزة (المعلم المساعد) تقصد بيه العقد الوزارى ثلاثمائة جنيه وشوية صح ؟؟
كده انا عرفت ان اسوان فيها المشكلة دى ..ياترى فى محافظات تانية ..ياريت لو تسعى معايا فى حاجة زى كده يااستاذى الفاضل لو مكنش يضايقك وبراحتك

[دعاء 24]

الحكاية دى موجودة فى محافظة بنى سويف اسمه معلم بالاجر وفعلا زى ما الاستاذ محمد فوزى بيقول ان ان شاء الله على السنة الجديدة هيكون فيه عقد المعلم المساعد اللى هو ب 322 جنيه
واحنا السنة اللى فاتت اول ما اشتغلنا اشتغلنا شوية بالاجر وبعدين عملولنا عقودات مميزة ( عقد المعلم المساعد )

[Observer]

ان شاء الله خير

[البرشومى]

كفر الشيخ مليانه عقود عاديه وكان من المعمول به سابقا كان قرار السيد المحافظ ان يتم اخذ من هو على راس العمل ليحصل على العقد المميز أما فى هذا العام فكان قرار السيد المحافظ مختلفا وهو عمل مسابقة والاختيار بالترتيب دون اى اولوية اراس العمل والذى كان هو الاساس المطبق العام السابق وعلى نفس اصحاب العقود العادية
أى طبق عليهم مكيالين مما أضر بهم وقلل من فرصهم فى الحصول على العقد المميز رغم ورود عقود كثيرة للمحافظة كانت تكفيهم لو .....................

[بلال نصر]

بضم صوتى لصوت أستاذ محمد أثير بالنسبة لموضوع انتهاء العقد بفترة الصيف كده الشباب هيضطر يترك الوظيفة ويبحث عن حاجة ثابتة اريحلة ويقتصر التدريس بمثل هذا النوع من العقود على الإناث

[menavw]

انا مدرس بادارة برج العرب التعليمية محافظة الاسكندرية
وذلك بعقد داخلى تابع للادارة
وقيمة الاجر بالعقد 104 جنيه فقط (العقد حتى نهاية 30/6
ولكن ارتفعت قيمة الاجر بالعقد الى 300 جنيه وذلك بقرار من المحافظ هذا ما يقالوذلك ابتداءا من يوم 1/3/2010
ولسة لغية دلوقتى مش عارفين الكلام ده هايتنفذ ولا لاء

[the keng]

حسبي الله ونعم الوكيل في كل من:
_ الذي اخترع نظام التعاقد
فباي حق لا انتساوي مع زملائنافي الماليات والحقوق بالرغم من اننا المقهورين في العمل .
_ وزير المالية فكيف نبني
مستقبلنا ب300 جنية في حين ان هناك من هم اقل منا في المؤهلت ولكنهم يعملون بالواسطة في وزرات اخري ويتقاظون بالالاف فهل هذا عدل

ادعوا الله بعد كل صلاة وفرض ان يرحل نظيف واعوانه فهذا هو الحل والوحيد
وحسبي الله ونعم الوكيل

[تامر الفاضل]

في الفيوم المرتب 105 جنيه مصري فقط لاغير وهناك إشاعة انه هيزيد وطبعا من اول الصيف مافيش شغل

[محمد اثير]

موضوع الصيف اللى بنصيع فيه ده لازم يتوضعله حل ومنسكتش ...

[مدرس اللغة]

ماهو الحل الوحيد مع الوزارة بيقولوا لك عاجبك عاجبك ولومش عاجبك امشى وفيه مائة واحد عايزاها الشغلانة دى زى ماهى

ب 105أو 90أو أقل من ذلك علشان الخريجين كتروا ومش لاقين شغل فالوزارة والمدرية والإدارة بيتنكوا عليك

وتلاقى حتة موظف فى الإدارة مش عارف يفك الخط ويتحكم فيك وينهال عليك من كلام الشوارع (مع السلامة)(فوت علىّ بكرة)(سلم لى على المؤهل)(مع السلامة ياباش مهندس)(مع السلامة يادكتور) إى آخره من مثل هذه الألفاظ
وأنت لازم تستحمل الذل والمهانة والتعنت لأنك ممكن لو تطاولت عليه وضربته تضيع مستقبلك مع قانون الطوارئ
وأنت عارف يعنى ايه قانون الطوارئ وما أدراك ما قانون الطوارئ

[vip_ame]

حكاية المرتب دى مش ثابته

عندكم 165 وفى اسوان 105 وسمعت برضه فى الشرقية105 وعندنا فى الاسماعيلية 365 زى العقد بتاع الوزارة بالظبط

الحكاية دى تبع المحافظ

لكن مبدأ ان يبقى فيه ناس شغاله زيها زى ناس تانية بالظبط لكن فيه فرق فى المرتبات "بغض النظر عن ان المرتبات نفسها قليلة جدا" ظلم جدا وتفرقة فى المعاملة ليس لها داع

فاكل يؤدى نفس العمل فلماذا اذا الفرق فى المعاملة؟؟

الناس المسئولة عن كل ده حسابهم عسير عند ربنا سبحانه وتعالى