مصر حلوه ولا وحشه؟؟

[الاء نجيب]

يقولولى : مصر وحشة
- أقولهم .. مصر حلوة .. بس إنتوا اللى مش بتفهموا

- يقولوا : مصر مملكة ديكتاتورية .. مش جمهورية
- أقولهم : مصر حلوة .. وبعدين متظلموش الراجل .. الراجل إنجازاته تسبقه .. وإحنا بنحب العشرة .. واللى تعرفه أحسن من اللى متعرفوش

- يقولوا : مصر مجوعة أهلها .. وفى ناس مش بتلاقى حاجة تغطيها فى الشتا
- أقولهم : مصر حلوة .. بس إحنا اللى بنخلف كتير

- يقولوا : مصر بتسيب ولادها العباقرة المحترمين يسافروا برة
- أقولهم : مصر حلوة .. بس هى بتعمل كدة عشان يتعلموا أحسن

- يقولوا : مصر بتبنى جدار عازل
- أقولهم : يا إخواننا مصر حلوة .. بس لازم تحمى حدودها

- يقولوا : مصر مش بتاخد بتار ولادها (فى ألمانيا .. إيطاليا .. السعودية .. ولبنان )
- أقولهم : مصر حلوة .. وعملت اللى عليها .. واللى عايزينها تحارب نص العالم عشان تستريحوا

- يقولوا : مصر بتقسى على ولادها .. دة أنت شوفت بعينك اللى حصل فى شباب 6 أبريل .. عشان بيحبوا مصر
- أقولهم : مصر حلوة .. ولازم تحافظ على أمنها .. وأكيد هما عارفين مصلحتنا أكتر مننا

- يقولوا : مصر سدت الربع جنيه المخروم
- أقولهم : هو اللى سافل وكان لازم يتسد من زمان لأنه بيشوه سمعة مصر .. ومصر حلوة

إمبارح قالولى مصر بتقتل ولادها !
أقولهم إيه دلوقتى يا مصر ؟!
مش لاقى حجج تانية .. مش قادر أكذب أكتر من كدة
مش كفاية بقة يا مصر ؟! شكلى وشكلك بقة وحش أوى

عزيزى خالد - رحمك الله -
ياريت ميكونش عندك أمل كبير فينا ..
للأسف .. دمك هيروح هدر
عارف ليه ؟
عشان دمك رخيص .. زى ما أنا كمان وكل المصريين دمهم رخيص ..
رخيص أوى
وبعدين كأس العالم بدأ .. ومحدش فاضيلك
********************************************
عزيزى خالد ..
ليا عندك بس طلب واحد ..
أرجوك وأنت عند ربنا .. إبقى إدعيه يخلصنا من الإحتلال المصرى لمصر
قبل ما نحصلك كلنا
أصل إحنا هنا بنخاف حتى ندعى
بس إبقى خد بالك من نفسك ..
مش بعيد تلاقى حواليك مخبرين من قسم سيدى جابر ..
طالعين يقتلوك تانى !