جامعة 6 اكتوبر من الالف للياء

[vampire1188]

ازيكم يا جماعة .. طبعاً باين من عنوان الموضوع ان الكلام على جامعة اكتوبر .. انا في الموضوع دا مش هاتطرق بقي لتاريخ الجامعة ولا هيا فتحت امتي ولا شكلها ايه ولا اي حاجة من دول .. انا هاشرح للناس اللي عايزه تخشها من A لغاية Z ..

اول حاجة مقر الجامعة .. طبعا زي ماباين من اسمها .. انها موجودة في 6 اكتوبر .. طيب حلو اوي .. هاتقولي ياعم انا مالي بمقرها .. هاقولك اصبر عليا شوية جايلك في الكلام اهو ..

دلوقتي انتا راجل والحمدلله خلصت ثانوية عامة وغالبا ماهاتكون اتزنقت في المجموع وربنا ارادلك انك تخش جامعة خاصة .. فضلت تعمل سيرش على افضل جامعة فيكي يا مصر وقولت خلاص امري لله اخش جامعة 6 اكتوبر .. (ملحوظة: البعض بيسميها جامعة 11 سبتمبر!!) .. عموما اهي كلها شهور ربنا ! .. خلينا في المهم .. طبعا على حسب النظام المتبع في مكتب التنسيق اللي ماشي بمبدأ " على قد مجموعك خش كليتك " هانتكلم (نرغي يعني) وبما اننا هانرغي يبقي ناخد الكليات بالترتيب من فوق لتحت ..

1- كلية الطب :
عارف مدي احباطك ومدي خنقتك من الكام درجة اللي كانوا ناقصينلك عشان تخش بيهم طب بشري في جامعة حكومية .. بس هاتعمل ايه ياعم الحاج .. نصيبك كدا .. خدلك بقي معلومتين من صاحبك ينفعوك اما تخش الكلية (الكميلة) دي !

اول حاجة الدراسة فيها مدتها 6 سنين .. بس ؟ .. لا طبعا ماهو فيه سنة امتياز غير الـ 6 الاولانيين .. يدينا ويديك طولة العمر .. الدراسة في الكلية دي زيها زي الدراسة في الجامعات الحكومية لإن فيها نفس المواد ونفس النظام في الامتحانات .. بس طبعاً انا اعتقد ان الجامعات الحكومية افضل .. لإن الاصل عمره ماهاييجي زي التقليد .. الكلية دي فيها 16 تخصص .. سيبك منهم تبقي تعرفهم بعدين اهم حاجة اللي يهمك انتا هاتاخد ايه في سنة اولي .. سنة اولي ياسيدي هاتاخد فيها تشريح وكيميا حيوية وعلم وظائف الاعضاء وعلم الانسجة وكمبيوتر .. وكل المواد فيها عملي .. المحاضرة النظري مدتها ساعة والعملي مدته ساعتين .. طبعاً عشان تبقوا عارفين ان الجامعة ماشية بنظام الـ Credit Hours .. هاتيجي تقولي ايه اخبار المصاريف ؟؟ .. هاقولك ان المصاريف لسنة اولي 42250 .. ودا للمصرين .. اما غير المصريين فامصاريفهم بتبقي 11000 دولار للسنة كاملة .. هاتقولي طب ايه اللي فرق المصريين عن اللي مش مصريين .. هاقولك ان المصريين ليهم ميزة ان المصاريف تدفع على قسطين .. قسط عند التقديم في اول السنة وقسط تاني عند نهاية الترم الاول .. اما اللي مش مصريين فمالهومش الحق غير انهم يدفعوا المصاريف مرة واحده بدون اقساط ..

2- كلية الصيدلة :
برده هاتتلاقيك محبط عشان برده الكام درجة اللي كانوا ناقصينلك وماعرفتش تخش بيهم جامعة حكومية .. خليك كوول على طول .. ونفض تعيش .. هذا هوا مبدأ العصر .. وبما ان هذا هوا مبدأ العصر فأحب اقولك ان العصر دا مش هاتعرف تصليه من ضغط المحاضرات اللي سيادتك هاتاخدها في الكلية الجامدة اوي دي !! (دا طبعاً ان كنت بتصلي اصلاً) .. الكلية ياسيدي دراستها 5 سنين والبشر اللي هناك متقسمين لجروبين A و B .. كل واحد فيهم منفصل عن التاني .. بس نفس المواد اللي بتتاخد في الجروب دا هيا نفسها اللي بتتاخد في الجروب التاني .. وفي كلا الحالتين المواد اللي بتتاخد هيا 9 مواد .. ماتتخضش .. ايوا 9 مواد .. physical chemistry ، organic chemistry، anatomy ، Math ، orientation to pharmacy ، computer ، histology ، history to pharmacy ، general chemistry .. عدهم معايا كدا تاني .. هاتتلاقيهم 9 برده .. هاتيجي تسألني على المصاريف هاقولك ان المصاريف لسنة اولي 28300 جنيه مصري .. طبعا دا للمصريين ..

3- كلية طب الاسنان:
دي بقي اي حد ايديه حلوه وبتعرف تصلح في سنان الناس كويس يخشها .. دراستها 5 سنين + سنة امتياز .. الكلية دي ميزتها انك بتقعد تدرس لمدة 5 سنين في منطقة واحده في جسم الانسان وهوا الحتة اللي انتا بتتكلم منها .. عشان كدا تقدر تسميها كلية التخصص العالي .. بمعني انك اما بتيجي تتخرج بتبقي بمقياس بتوع طب بشري (دكتور اخصائي) .. سيادتك فرحان اوي انك هاتبقي دكتور ؟ .. طب عايزك تعرف انك هاتدرس 14 مادة في سنة اولي متقسمين على ترمين .. 7 اول و 7 تاني .. طب والمصاريف ؟ سنة اولي 30300 جنيه مصري للمصريين ..

4- كلية العلاج الطبيعي:
كلية بيقولوا عليها انها سهلة وشغلها مطلوب وكتير ودا لإن عدد الاخصائيين في مجال العلاج الطبيعي في مصر قليلين نوعاً ما .. وفي نفس الوقت بيطلبوهم في الدول العربية .. لو جينا نرغي في نظام الدراسة هانتلاقي ان الكلية مدة الدراسة فيها 4 سنين + سنة امتياز وبعد الامتياز بيبقالك تكليف زيك زي الدكاترة العاديين .. بمعني ان خريج الكلية دي بيشتغل في مستشفي حكومي .. ومؤخراً انضمت نقابة العلاج الطبيعي لنقابة الاطباء .. هاتقولي يعني ايه ؟ .. هاقولك يعني ليك الحق ان يتكتب جنب اسمك اما تتخرج كلمة دكتور (افرح ياعم!) .. بالنسبة للمصاريف لسنة اولي 16850 جنيه مصري للمصريين .. وغير المصريين 5050 دولار امريكي ..

5- كلية الهندسة :
أظن مش محتاجة تعريف .. زيها زي اي كلية هندسة فيكي يا مصر .. دراستها 5 سنين .. معا العلم ان اول سنة بيسموها سنة الاعدادي او preparatory year .. وبعد ماسيادتك بتعدي السنة دي على خير قدامك الفرصة انك تختار مابين كام تخصص كدا هاقولهومللك اهو .. قسم المباني والانشاء ، كمبيوتر ، ميكاترونيك ، هندسة صناعية ، هندسة كهربية .. طبعاً معروف انك عندك سكاشن ومحاضرات وعملي وlabs .. ادعي بقي ربنا يقويك .. وقبل مانسي .. المصاريف لسنة اولي 22000 جنيه للمصريين .. و 6250 دولار لغير المصريين ..

6- كلية الحاسبات والمعلومات :
البعض بيسميها الحسابات والمعروضات ! .. مش تريقة والله بس دا ليه سبب .. لإن الطلبة بيقعدوا يحسبوا في الدرجات اللي هاياخدوها قد ايه .. طبعاً لإن اللي هاياخدوا اقل من اللي هاينقص منهم .. المهم .. سيادتك طول مانتا في الكلية دي هاتفضل تاخد في مواد متصلة بالمعلومات والحاسب الالي عشان كدا يٌفَضَّل انك تروح تشتري لاب توب محترم قبل ماتخش الكلية عشان كل حاجة هناك شغاله عملي .. وفي الاخر خالص هاتطلع مبرمج محترم .. (نصيحة : اعمل بمبدأ عض الايد اللي اتمدتلك يعني اول ماتبقي راجل بروفيشنال ابقي هكر على المنتدي دا ووقعه!! ).. قبل مانسي فيه تخصصين رئيسيين Computer Science و Information Systems .. الاولاني من المفترض انك تطلع منه programmer والتاني تطلع منه system analyest .. وفي كلا الحالتين ربنا يقويك وتبقي database admin قد الدنيا .. المصاريف للمصريين 14600 جنيه .. وبالمناسبة .. موقع الكلية اهو >> http://www.csis-o6u.com/student/Stud...2fdefault.aspx

7- كلية الاعلام :
يعني بتوع الصحافة والمذيعين واللذي منه .. اختصاراً للوقت عشان ماتقلش عليك في الرغي .. اعلام مدة الدراسة فيها 4 سنين .. بتفضل تدرس دراسة عامة طوال السنتين الاولانيين .. وبتيجي في امتحان الترم التاني في سنة تانية بيوزعوا عليك بطاقة رغبات .. وسيادتك بتختار مابين 3 اقسام .. اذاعة وتليفزيون ، علاقات عامة ، صحافة .. وطبعاً الرغبات بتبقي بالاولوية مش بالمجموع .. يعني اذا كتبت اول رغبة صحافة هاتخش صحافة .. وهكذا .. طبعاً عندك 6 مواد في كل ترم .. وكل مادة بتتحسب من 20 درجة .. بالنسبة للمصاريف 13000 للمصرين .. و 4750 دولار لغير المصريين ..

8- كلية اللغات والترجمة :
تتضمن 4 تخصصات رئيسية .. (انجليش،فرنساوي،الماني،اسباني) وطبعا التخصص بيكون من اول سنة .. يعني سيادتك بتخش تقدم على الكلية دي وتحدد في التقديم انتا عايز تبقي قسم ايه .. بس بشرط انك تاخد لغة تانية معاهم بس هاتدرسها بجانب اللغة الاساسية بس بطريقة ايزي شوية .. والكلية عموما بتعتمد على اساس انك كل مانتا عندك رصيد حلو في اللغة اللي بتدرسها كل ماكان دراستك اسهل .. عدد المواد اللي بتتاخد 11 مادة .. 5 ترم اول و 5 ترم تاني + مادة بتكملها من الترم الاول وبتفضل معاك في التاني .. المصاريف 10400 جنيه للمصريين .. و 3400 دولار لغير المصريين ..

9- كلية الاقتصاد والادارة :
الكلية دراستها 4 سنين .. وقدامك اختيار انك تحدد لغة دراستك من اول سنة .. بمعني انك تختار مابين عربي او انجليش .. بعد كدا بتفضل تدرس دراسة عامة لغاية ماتيجي في امتحانات سنة تانية الترم التاني ويوزع عليك بطاقة رغبات عشان تختار القسم اللي على مزاجك وتختار مابينهم واللي هما > محاسبة ، ادارة ، اقتصاد ، علوم سياسية .. وفي سنة تالته بقي تبدأ دراسة القسم اللي انتا اختارته .. كل ترم فيه 6 مواد .. وكل مادة بتتحسب من 100 ( 15 ميد تيرم - 10 شيتات وحضور وغياب - 75 فاينال ) .. مصاريف الكلية بتتحدد على حسب انتا عربي ولا انجليش زي ماقولت في الاول .. لو كنت عربي يبقي مصاريفك 10500 جنيه للمصري .. 3550 دولار لغير المصري .. لو كنت انجليش يبقي مصاريفك 13000 جنيه للمصري .. 4300 دولار لغير المصري ..

10- كلية العلوم الاجتماعية :
مدة دراستها 4 سنين .. واتسمت علوم اجتماعية عشان التخصصات اللي فيها تبقي مندرجة تحت العلوم الاجتماعية واللي هيا > سياسة ، علم نفس ، مسرح ، مكتبات .. طب هاتقولي انا بتخصص فيهم امتي ؟ هاقولك انتا بتكتب رغبتك في سنة اولي .. وبتيجي في سنة تانية تبدأ تدرس القسم اللي انتا اختارته .. مصاريف الكلية للمصريين 5500 .. وغير المصريين 2800 دولار ..

11- كلية السياحة والفنادق :
مدة الدراسة فيها 4 سنين كالمعتاد .. سنة اولي بتبقي دراسة عامة .. والتخصص بيبقي من اول سنة تانية في احد التخصصات اللي جايه دي .. دراسات سياحية ، ادارة فنادق ، ارشاد سياحي .. كل ترم غالبا مابتدرس مابين 7 او 8 مواد على حسب القسم بتاعك .. بالنسبة للمصاريف .. المصريين 8050 جنيه .. وغير المصريين 2800 دولار .. طبعا ماننساش ان الكلية دي بتعمل كورسات تدريبية مكثفة للطلبة في الفنادق وبياخدوهم جولات سياحية طبعا بهدف اكسابهم خبرة التعامل معا السياح ..

وبكدا خلصنا الكليات اللي موجودة هناك .. اول سؤال هاييجي في بالك طب انا واحد مخلص ثانوية عامة وعايز اقدم هناك .. هاقدم لنفسي ازاي ؟؟؟ .. هاقولك انتا تاخد نفسك وتروح لمقر الجامعة وتسحب ملف تقديم من هناك .. الملف دا تمنه 100 جنيه .. وتملاه وتاخد معاك المرفقات دي عشان هايطلبوها :
1- الملف اللي انتا اشتريته من هناك (امال يعني انتا جايبه تلعب بيه؟!)
2- أصل شهادة الثانوية بتاعتك (ثانوي عام او american diploma او IGCSE)
3- 6 صور
4- استمارة 2جند (للولاد بس طبعا الا اذا كان البنات عايزين يخشوا الجيش بقي!!)
5- صورة من البطاقة الشخصية (للمصريين) او صورة الباسبور (لغير المصريين)
6- شهادة الميلاد الاصلية (اللي هيا القديمة .. لو مش عايز تفرط في القديمة روح اي سجل مدني وطلع منه شهادة الميلاد اللي بالكمبيوتر بـ 7 جنيه ومايزيدوش قرش!)
7- وبالنسبة للمصريين اللي واخدين شهادة الثانوية العامة من اي دولة عن طريق السفارة لازم يقدموا اثبات بكدا

> وياريت يا جماعة اي استفسار عن جامعة 6 اكتوبر تكتبوه هنا <

[م أحمد الهواري]

اينعم انا في جامعة بالفعل

بس ده ميمنعش اني اعلق علي الموضوع
بجد موضوع فااااااااااااااااااااجر وجاامد جدا

معلومات قيمة بالفعل


مشكور يا باشا

[Salsabil Gebriel]

السلام عليكم..بس انت نسيت تتكلم عن كلية فنون تطبيقيه اللى انا نفسى ادخلها..المشكله انى مش عارفه لو الجامعه معترف بها ولا لا!!!و شكراا..

[™ Ī ДӍ ҊǾŦ ДLΣǤΣҊÐ]

ممكن لو سمحت تقولنا المجاميع الى بتاخد منها

وخاصه كليه الحاسبات والمعلومات

ضرورى لو تسمح يعنى

وجزاك الله كل خير

[شريف ابوالنصر]

ممكن الى فيها يكلمنى عن كلية الطب فى 6 اكتوبر اصل انا باذن الله ناوى اخشها

[M.E.M.s]

يا جماعة أنا أساس ما بحيذش الجامعات الخاصة لأنها كــــــــــــــــــــــــــــوسة و لأنها ساوت بين الطالب المتفوق و الطالب المتوسط و الأقل من المتوسط
يعنى مثلا أنا جبت 99 و طلعت عينى
فى الآخر يساوونى بواجد جايب80 و لا60 بالعافية
للأسف

[bebo_22]

ممكن لو سمحت تقولنا على المجاميع بتاعت الصيدلة او طب الاسنان ولو وافد يفرق عن مصري وله لا؟؟؟؟؟؟؟؟ ارجووووووك عايزة جواب بسررررعة

[منة محسن جنيدى]

طريقة كلامك سكر بتضحك بجد عالعموم الف الف شكر

[lekaa]

طبعا شرحك اكثر من رائع مفيش كلام . بس المجموع اية ظروفة وسمعت ان المصاريف بتختلف باختلاف المجموع فدنى بذلك لو سمحت ولك منى كل الشكر

[منة محسن جنيدى]

الحاجات دى كليات ولا معاهد 6 اكتوبر هناك فرق

[HODDA]

شكرا جدا علي هذا الموضوع وانت وفرت علينا مصاريف وتعب المشوار لغاية الجامعة واسئلة كتيرة كنا عاوزين نعرفها بس ممكن اعرف هل لها مواصلات متوفرة انا ساكنة في السيدة زينب اركب ايه علشان اوصل جامعة 6 اكتوبر ولك وافر الشكر والاحترام

[the best boy]

يا كابنت انا داخل عشان اعرف كليه فنون تطبيقيه

على العموم انا كلمت الجامعه

وهقولكم انا بقي فنون تطبيقيه جامعه 6 اكتوبر

اول سنه ب 11500 جنيه

وتانى سنه بتقل 2000 جنيه

وعلى فكرة هى من 60% ولازم تقدم تانى يوم بعد النتيجه والدفع بيكون مع التقديم


يالا اى خدمه

على فكرة انا هخشها اكيد

ومدة الدراسه فيها 5 سنين منهم سنه اعدادى

وفيها تلات اقسام

ديكور وسينما ومسرح وجرافيك

وسينما ومسرح ده فيه اخراج وتصوير

وانا بقي هخش تصوير

ويارب اكون افدتكم

[نوجى99]

طب انا عايزة اعرف مجاميع الكليات دي من كام

[شهد شمس الدين]

اهم حاجه الكليات دي هتاخد من كام السنه دي

[totatito]

ياريت بقة حد يقولى عن خدمة اجتماعية 6اكتوبر
والمصاريف
والمجموع من كام
وتفتكروا بقة ان المجاميع فى المرحلة التلتة هاتنزل زى مانزلت فى الاولى ولا اية النظام بالظبط
وتبقة كملة جميلك يابرنس