الهدوء والصبر طريقنا للتثبيت.... شارك برأيك

[eslamic]

لاحظت ان الاعضاء هنا في المنتدي منقسمين لقسمين
القسم الأول : قسم بينادي بالاعتصام يوم 30/1 وناس معارضة الميعاد دا بحجة ان البلد مشدودة اليومين دول
القسم التاني : قسم بينادي برفع قضية علي الوزير ومعارضيه بيقولو ان المحاكم حبالها طويلة والوزير ممكن يعند معانا

طب إيه رأيكم في قسم ثالث : يدعو إلي الهدوء والصبر وانتظار ما سيحدث خلال الايام القادمة
يعني يا جماعة اقل واحد فينا شغال بقاله 4 سنوات مش قادرين ننتظر إلي 30/6 القادم (وهو آخر ميعاد لإنتهاء عقد المعلم المساعد) وانا متأكد إن شاء الله إن قبل التاريخ دا هنكون اتثبتنا
وطالما الوزير بيقول اننا هنتثبت بأمر القانون يبقي اكيد عارف ان القانون بيقول 3 سنوات فقط ولا يجوز التجديد
ولو لقدر الله ماحصلش تثبيت ساعتها هيكون عقدنا انتهي ومافيش حاجة نبكي عليها نعتصم بقي او نرفع قضايا مش هتفرق

[العلم صدقة]

وله نستنا يضيع حقنا لازم نطالب بي علي الاقل نحسس الناس بينا واننا موجودين لينا مشكلة كبيرة من حقنا انها تتحل بينا لان احنا اصحبها مفيش حد تاني هيحلها لينا

[eslamic]

والحكومة تقول علينا اننا شباب طايش زي ما قالو علي شباب يوم الغضب
وقمة التجاهل وقال إيه بيقول 30 الف بس اللي خرجو يعني مش مهم
والله حاجة تغيظ

[أم هيما]

يا جماعه حرااااام عليكوا صبرتوا ست سنين مش قادرين تصبروا ست شهور والله شكلكوا هيبقى وحش اوى وانتوا رايحين تعتصموا واصلاااااا انتم فئة قليلة يعنى كلنا احوالنا تختلف من ناحية مدة العقد واللى امتحن واللى ما امتحنشى والراجل قال هطبق القانون يبقى نصبر شويه على الاقل لما كلنا يبقى حالنا واحد نبقى نتجمع ونبقى كثرة ساعتهاانا مع الاضراب عن العمل وليس الاعتصام والتخريب يعنى ممكن انا وخمسة سته من زمايلى فى المدرسة اروح المدرسة وامضى فى دفتر الحضور والانصراف واقعد فى حوش المدرسة واقول انا مضربه عن العمل لحد ما تشوفوا لى حل والله دا افضل من الاعتصامات والمشاكل والضرب والتخريب
دا رأى بس

[eslamic]

وبعدين 80 مليون طلع منهم 30 ألف
امال احنا 43 الف هيطلع منهم كام ؟؟؟؟؟؟؟

[es2560589]

ولو طاع مننا واحد بس وقال لا يكفينا أنا شايف إن نبرتكم خفت شكلكم خيفيين من الأمن بس أنا عاوز أقول حاجة " الذين قال لهم الناس إن الناس قد جمعوا لكم فاخشوهم فزادهم إيمانا وقالوا حسبنا الله ونعم الوكيل "
ما كان الله ليذر المؤمنين على ما أنتم عليه حتى يميز الخبيث من الطيب

[eslamic]

أمن إيه بس اللي بتتكلم عليه
احنا بنتكلم عن واقع
الحكومة خلاص فهمت اللعبة ومش اي حد هيعتصم هيقولولو خلاص حقك علينا وخد اللي انت عايزه
وبعدين يا ريت يا جماعة نفهم الكلام صح انا بقول نستني لنهاية العقد علشان ما يبقاش في حجة عندهم
لكن بعد كده انا هكون اول واحد رافع قضية

[فارس الليل]

حلوه حكاية نستنى لشهر 6 دى
هو حضرتك متعرفش ان فيه عقود انتهت
فى 30 ديسمبر اللى فات
وتم التجديد لهم للسنه الرابعه بالمخالفه للقانون
وبالتأكيد اللى اطبق عليهم هايطبق على سيادتك
فى اليوم المفترج 30/6 اللى جاى
ياعم حرام عليك الناس بدأت تفوق
خلي البلد حالها يتصلح الله يرضي عنك
ولكى الله يامصر

[أبوووووعبدالرحمن]

اللي بيقولوا ارجعوا عن الإعتصام ثلاث أشخاص بس انقلبوا من أقصى اليمين لأقصى الشمال وأظن إنهم في الأول كانوا بيقولوا تصريحات شجاعة علشان الناس تعجب بيهم ويسمعوا كلامهم وفاكرين بعد ده كله إنهم لما يقولوا إرجعوا الناس هتسمع كلامهم وأظن إن ده تخطيط الامن
لا تراجع موعدنا الأحد القادم بإذن الله 30/01

[أبوووووعبدالرحمن]

إحنا بإذن الله رايحين ويا ريت اللي عنده كلمة يخليها لنفسه

لا تراجع عن الإعتصام موعدنا 30/01/2011

[أبوووووعبدالرحمن]

لم تعد هناك ثقة في المنتدى نظرآ لوجود الكثير من المندسين بيننا في هذا المنتدى خلوا بالكم من الموضوع ده يا إخواننا ويا ريت اليومين الجايين ما حدش يخش المنتدى ده

[Ms Nesma]

أنا معاك الصبر هو الحل وعادى لو حتى عملنا اعتصام خليهم يجربوا ويارب ما يخسروا حاجه

[MISS.DINA]

المشاركة الأصلية كتبت بواسطة أبوووووعبدالرحمن

لم تعد هناك ثقة في المنتدى نظرآ لوجود الكثير من المندسين بيننا في هذا المنتدى خلوا بالكم من الموضوع ده يا إخواننا ويا ريت اليومين الجايين ما حدش يخش المنتدى ده

تقصد ايه حضرتك بمندسين ايه تبع اسرائيل مثلا اسفة على التشبيه بس لو فكرنا كويس دلوقتى بالذات مينفعش اعتصام خالص لان مش هتعتبره الحكومة اعتصام هتعتبره خروج على النظام وبعدين حضرتك شايف اللى حاصل فبلاش نولعها بزيادة انا عن نفسى من الاول خالص وانا ضد الموضوع دة وعلى فكرة انا متاكدة انك لو رحت مش هتلاقى حتى يكملو مية على الاكثر وساعتها مش هيكون فسخ عقد لا هيكون اعتقال فاستهدو بالله ياجماعة لما نشوف الايام الجاية هيحصل فيها ايه ربنا معاكى يامصر

[eslamic]

المشاركة الأصلية كتبت بواسطة miss.dina

تقصد ايه حضرتك بمندسين ايه تبع اسرائيل مثلا اسفة على التشبيه بس لو فكرنا كويس دلوقتى بالذات مينفعش اعتصام خالص لان مش هتعتبره الحكومة اعتصام هتعتبره خروج على النظام وبعدين حضرتك شايف اللى حاصل فبلاش نولعها بزيادة انا عن نفسى من الاول خالص وانا ضد الموضوع دة وعلى فكرة انا متاكدة انك لو رحت مش هتلاقى حتى يكملو مية على الاكثر وساعتها مش هيكون فسخ عقد لا هيكون اعتقال فاستهدو بالله ياجماعة لما نشوف الايام الجاية هيحصل فيها ايه ربنا معاكى يامصر

خليه يتكلم هما 3 تعليقات حافظهم وماشي بيقولهم في المنتدي
يا عني الواحد يرفعلكو اللي حصل في المظاهرات اللي فاتت من ضرب واهانة علشان تستريحو
والله عساكر الامن المركزي مسكوا واحد وشبعوه ضرب ترضي حصل فينا كده لان ساعتها محدش هيفرق ما بين ناس معتصمة عايزة تتثبت وناس معتصمة لقلب النظام وزعزعة امن واستقرار البلد والكلام الكبير اللي الحكومة حافظاه

[eslamic]

المشاركة الأصلية كتبت بواسطة فارس الليل

حلوه حكاية نستنى لشهر 6 دى

هو حضرتك متعرفش ان فيه عقود انتهت
فى 30 ديسمبر اللى فات
وتم التجديد لهم للسنه الرابعه بالمخالفه للقانون
وبالتأكيد اللى اطبق عليهم هايطبق على سيادتك
فى اليوم المفترج 30/6 اللى جاى
ياعم حرام عليك الناس بدأت تفوق
خلي البلد حالها يتصلح الله يرضي عنك
ولكى الله يامصر

يا أخي نفسي اشوف قرار مد السنة الرابعة اللي الكل بيتكلم عليه دا
المشكلة اننا بنردد وخلاص واحد قال احنا اتمدلنا سنة رابعة يبقي خلاص كلامه مسلم بيه