عشان ميتقلش عليك عميل او تبع النظام

[اميمة طه]

طبعا المنتدى كله مقلوب على بعضه والناس شكه فى بعضيها من طريقة الرد عشان كده عشان ميتقلش عليك عميل :

1- اوعى تقول رايك بصراحة مهما كان. داريه يعنى عشان بقية المجموعة متزعلش
2- لو ليك اصحاب فى المنتدى اوعى تقل عقلك وتروح ترد فى مواضيعهم
3- خلى اجاباتك وردودك يعنى مبهمة المعنى مثلا:
ان شاء الله - ربنا يوفق - شكرا على الخبر- ربنا يستر - ؟؟؟؟؟-!!!!!!- ايه اللى بيحصل - ماشى--ههههه. مش عارفين هنعمل ايه
4- لو عندك معلومة متقولهاش يعنى انت اللى هتعدل ال........
5- لو لقيت المجموعة اللى فى الموضوع واخده اتجاه معين فى المشاركات خليك زيها مش لازم تبقى مميز يعنى
6- ادخل يا سيدى شوف الموضوع واطلع
7- لو لقيت واحد من المتشددين حاول تتجنبه ومتكلمهوش ولا حتى بالحسنى لان لسانه سابقه وبيرمى باستمرار الناس بالباطل
8- كل ما تيجى سيرة النظام القديم قول على قد ما تقدر حتى لو كان فى ايجابيات بسيطة مش مهم تتقال يعنى انت حامى الحمى
9- اوعى تعرف اى خبر يمس امن مصر وتقوله لاننا مبنتهددش
10- حاور فى الحاجات الخايبة بس
11- لو نقلت خبر متجبش الرابط حضرتك ... انت تجيب صاحب الخبر وسجله وكل اللى يدخل يسمعه
12-فى ناس فى المنتدى فاهمة فى السياسة عنك فبلاش تتكلم لا من قريب ولا من بعيد فى السياسة لان البلد لو جرى لها حاجة مش هنقولك تعالى هنقول للناس اللى عارفه كل حاجة وهى اللى بتنصحنا
13-متجبش سيرة اى حد من الناس اللى بتعمل لمصلحتها مش لمصلحة البلد عشان كده عيب
14- كل لما حد يكلمك فى موضوع سد ودنك وسيب الموضوع الاصلى ولف من بعيد فى موضوع تانى خالص
15-لو انت بقا واحد متطلع وبتقرا الجرايد وكتب وكلام من ده تبقى مصيبة متجيش هنا وتقول خلى كلامك وكلام الجرايد لنفسك واحنا اللى عاوز يعرف معلومة هيروح للمسئول بنفسه
16- اوعى تقول ان مصر فى خطر عشان مفيش الكلام ده مصر عمرها ما كانت مستهدفة
17- نسيت.... لو اللى قبلك قايل حاجة صدق عليها وامشى
18- مش لازم تشوف الرد فى المشاركة اللى انت اصطدتها عشان تمسك صاحبها تقوله كلمتين تاريخها امتى وايه يعنى هى لو قديمة قبل ما صاحبها يعرف الجديد ده يمنع انك تحاسبه ازاى-------
19- متعملش وطنى ومحايد احنا هنا بالاغلبية
20- البنات ميقولوش رايهم هم يعنى خلاص هى الواحدة اخرتها ايه طلعت ولا نزلت اخرتها بيت جوزها والعيال
21- على صوتك على قد ما تقدر .... اصل الوطنية بالصوت العالى وكمان عشان كل المنتدى يسمعك
22- دايما دعم كلامك بحاجات والله ما انا عارفه اقول ايه بكلام يضايق اللى قدامك عشان تثبث امال ايه
23- اتمسك برايك على قد ما تقدر وطبعا هو رائ المجموعة
24- انسى كل اساليب الحوار الهادف وعيش على ارض الواقع
25- وانت بترد متناقش الراى ناقش فى شخص كاتب الراى
26- اوعى توافق رائ مع واحد تحس كده مجرد احساس انه ممكن ميكونش مقبول من الناس المتعصبين
27- اوعى تلاقى مشكلة مطروحة وتحط حلول لانها ببساطة محلولة واللى حاطط الموضوع عارف الحل ومش مستنين رايك

اخيرا كل الاعضاء افاضل ان شاء الله وربنا يوفقنا جميعا ويحمى مصر من كل معتد اثيم وكل متامر وكل دخيل وكل خائن اللهم امين يارب العالمين