___كده تبقى مذاكرة ميه ميه___

[H_Dody]

بسم الله الرحمن الرحيم

قامت إحدي المنظمات التعليمية بإحصاء لجميع طرق المذاكرة لإختيار أفضل طريقة للمذاكرة
وكانت هذه الطريقة كالآتي :

1- قراءة الدرس أو الموضوع قراءة شاملة
يعني إية بقا قراءة شاملة ! ؟
يعني ما تحاولش تفهم أي حاجة من الموضوع في الخطوة دي
(كإنك بتقرأ جرنال بالظبط )
يا جدع هوا في حد بيركز وهوا بيقرا الجرنال
المهم الدرس أو الموضوع كلو اتقرا قراية سريعة
ودا طبعاً ما ياخدش منك عشر دقايق علي بعض
طب إية الغرض من الخطوة دي طالما أنا مش هفهم حاجة ! ! !
بكل بساطة الغرض هوا إنك تلم إلمامة بسيطة بمحتوي الموضوع
( يعني عشان تعرف الموضوع بيدور حوالين إية )
وأقسم بالله إنك في الخطوة دي ممكن تستوعب أكتر من 20 % من الدرس
نتنقل للخطوة التانية



2- تحديد النقاط الأساسية للموضوع
( يعني العنواين الجانبية يا كابتن )
ونقدر بردوا نسمي الخطوة دي بإسم تاني وهو
تقسيم الدرس إلي فقرات
ونلاحظ إن في الخطوة دي إحنا بنسهل علي نفسنا كتير أوي أوي
لأنك بتخلي الدرس الكبير أصبح عدة فقرات قصيرة يسهل مذاكرتها

تمام كده يا عم الحاج نخش بقا علي اللي بعدها


3- التلخيص
في الخطوة دي بقا حضرتك هتستوعب 50% من الدرس
تبدأ في تلخيص الدرس ودا بيخليك تقلل حجم الدرس أوي
وطبعاً هيسهل المذاكرة عليك كتييير

لحد كدة والله يبقي 100 100

4- استخدام الألوان في المذاكرة
وفي مذاكرة الثانوية العامة الألوان مهمة أوي في المذاكرة
طب لية ؟
عشان معظم الجمل اللي حضرتك هتحددها بالألوان هتفتكرها بسرعة
هتفتكرها بقا سواء كنت في الإمتحان أو لو جيت تراجع مرة تانية في نهاية الأسبوع
والمراجعة مهمة جداً جداً
يا عم الباش مهندس ما تجننيش المراجعة كمان مهمة !!!!!!!!!!!!!!!!
أيوة يا باشا مهمة أوي عشان أساساً إحنا ربنا سمي كل واحد فينا بإسم ((( الإنسان )))
والكلمة دي مشتقة من ((( النسيان )))
وعشان كدة يبقي مافيش حد في الدنيا دي ما بينساش
وطبعاً إحنا بعد مجهود المذاكرة دا كلو مش محتاجين ننسي بسرعة
وعشان نفضل فاكرين يبقي عليك وعلي المراجعة يوم الجمعة
(( ولازم تراجع علي كل الدروس اللي ذاكرتها قبل كدة ))
يا رب أكون أقنعتك

وبعد الألوان والكلام دا كلو نروح للخطوة الخامسة


5- تنويع أسلوب المذاكرة
يعني إية ؟
يعني في المذاكرة ما تستخدمش القراءة بس
أو الكتابة بس
لا ... لا ... لا
حضرتك لازم تشغل أكبر قدر من الحواس بتاعتك
يعني تقرأ اللي بتكتبوا
وبكده تكون إستخدمت :
النطق
الكتابة
والسمع ( ما انتا هتسمع اللي بتنطقوا )
والنظر ( ما انتا طول ما انتا بتذاكر عينك في الكتاب )

ننتقل للخطوة السادسة


6- التدريبات
بعد ما تذاكر يا عم وتخلص الدرس كلو
عليك وعلي تدريبات كتاب الوزارة الأول
( بيجي منو نص الامتحان رأفة بالطلاب اللي مامعاهمش يجيبوا كتب خارجية )
وبعدين تبدأ تحل بقا من الكتب الخارجية وياريت ما تسبش سؤال إلا لما تحلوا
( السؤال اللي ما تعرفهوش إرجع للدرس علي طول وشوف هوا موجود في أنهي جزء من الدرس وذاكر الجزء دا تاني )
وما تنساش تحل السؤال بردو ,.. ههههههه

وبكدة تكون الخطوات بتاعة المذاكرة خلصت
ندخل بقا علي بعض النصائح الشخصية
( دي من تجربتي الشخصية والله )


بعض النصائح اللي تساعد علي الفهم الجيد أثناء المذاكرة :

1- لازم يا مان توفر الجو المناسب قبل ما تذاكر
( يعني الحجرة متروقة حواليك والترابيزة نضيفة وأدامك الكتاب اللي هتذاكر منوا والكشكول اللي هتذاكر فيه والكام لون اللي قولنا عليهم )

2- لازم تكون إنتا مرتاح نفسياً يعني رايق من الأخر
( حاول وإنتا بتذاكر ما تشغلش نفسك بأي حاجة غير المذاكرة ولو حصل والشيطان رمالك فكرتين كدة ولا تلاتة عشان يشغلك حاول تخلص منهم بسرعة وترجع تاني لمذاكرتك )

3- كتر بقا وانتا بتذاكر من السوائل
( زي المياه والعصير وكدة يعني )

4- بعد كل ساعة أو ساعة ونصف كدة خدلك قسط من الراحة
( بس ماتطولش أوي يا معلم أصل أنا عارف المصريين ما بيصدقوا يعني هما 10 دقايق كدة ولا ربع ساعة حتي وبعدين إرجع للمذاكرة تاني )

5- أحسن وقت بقا تذاكر فيه بعد الفجر
( يا سلالالالالالالالالالالام علي بعد الفجر دة الواحد بيبقا حاسس إنوا عايش لوحدوا في الدنيا دي والله يا جدع )

6- لما تيجي تحفظ فقرة في المواد اللي بتتحفظ دي
( راجع علي الفقرة كذا مرة وحاول وانتا جاي تقولها تالت مرة كدة تقولها بالبلدي دا ممكن يثبت الحفظ شوية )

7-مافيش مانع إنك تقوم تتمشي وإنتا جاي تحفظ حاجة ( المشي بيساعد علي الحفظ بردوا )

8- وإنتا بتذاكر كدة ماتنساش تحط سؤال أو سؤالين علي كل فقرة 0 أصل دا بيساعد علي تثبيت الفهم بردوا

9- لو شعرت بالتعب أو الملل من المذاكرة يبقي هِسسسسسسسسسسس يا عم الحاج
( معلش علي كلمة هِس دي أنا بهزر )
أنا قصدي يعني يبقي خلاص بطل مذاكرة وقوم كدة إتوضا وصلي ركعتين وبعدين إرجع للمذاكرة تاني


10- لو هتذاكر كذا مادة يبقي لازم تبدأ بالمواد اللي بتحبها الأول وتسيب الرخم للأخر

11- ما تذاكرش بالليل ( أصل السهر مش حلو علشانك يا كوتوموتوا )
ولو حصل وذاكرت بالليل ( ما تفضلش بقا طول الليل تئربع في شاي وقهوة عشان طاقة حضرتك )
( وعشان ما تبقاش مدمن يا كابتن )
( أنا طبعاً قصدي مدمن شاي وكافيين أصدي قهوة )


12 - وأخر نصيحة ليا هي إنك تصاحب شلة كويسة كدة تيجي تنده عليك عشان الدرس والمدرسة والصلاة
مش عشان السايبر والنت واللعب والكووورة

:av4056b b7jp3:

[mostcom]

الله عليكى يادود
والله العظيم شوية نصائح سقع
بالذات بتاع الالوان
اما الباقى فانا بعمله
وربنا يوفقنا كلنا
بشكرك مرة تلنية ياجميل
وبالتوفيق للجميع

[malk sami]

شكرا على الموضوع الجميل على فكرة قرأتة قراءة شاملة الأول هما ال20% قليلين هههههههههه.

[mo_wa_2977]

على انا مليت اصلا من الكلام اللى مكتوب فوق . اعتقد ان اللى عنده هدف عاوز يحققه هيذاكر يجتهد علشانه . انما كل الكلام ده مش يتقال لطالب علم ده يتقال لجندى فى الجيش. لو عاوز فعلا تذاكر لازم يكون عندك هدف وعزيمة . الهدف توصل له باالعزيمة. مش اولا وثانيا .......... ده طبعا كلام فاضى ومالهوش اى لازمة الكلام اللى مكتوب ده يودى لانتحار ويكره فى المذاكره.

[محبة امها]

عندك حق اللى عايز يوصل لهدفه بيعمل علشان يوصل وبيعدى الحواجز مهما كان

[H_Dody]

المشاركة الأصلية كتبت بواسطة mostcom

الله عليكى يادود
والله العظيم شوية نصائح سقع
بالذات بتاع الالوان
اما الباقى فانا بعمله
وربنا يوفقنا كلنا
بشكرك مرة تلنية ياجميل
وبالتوفيق للجميع

مرسى شكرررررررررررررررررررررررررررررررررررررررررراً
أشكرك

[H_Dody]

المشاركة الأصلية كتبت بواسطة mo_wa_2977

على انا مليت اصلا من الكلام اللى مكتوب فوق . اعتقد ان اللى عنده هدف عاوز يحققه هيذاكر يجتهد علشانه . انما كل الكلام ده مش يتقال لطالب علم ده يتقال لجندى فى الجيش. لو عاوز فعلا تذاكر لازم يكون عندك هدف وعزيمة . الهدف توصل له باالعزيمة. مش اولا وثانيا .......... ده طبعا كلام فاضى ومالهوش اى لازمة الكلام اللى مكتوب ده يودى لانتحار ويكره فى المذاكره.

المشاركة الأصلية كتبت بواسطة محبة امها

عندك حق اللى عايز يوصل لهدفه بيعمل علشان يوصل وبيعدى الحواجز مهما كان

أشكركم على ذوقكم أى نعم اختلاف الرأى لا يفسد للودد قضيه..... بس لو كلامى فاضى وملهوش لازمة ...ما تحرقش دمك ..أقفل الصفحة وعادى جدا
ممكن انت تكون مش استفادت بس غيرك استفادوا
.................................................. ...................وشكرا جزيلا.....................................

[محبة امها]

على فكره يا اختى انا استفدت من الموضوع ده اوى
وربنا يجازيكى خير ومش قاصده ازعلك وانا بدعى اخواتى الطالبات انهم يعمله بيه علشان مفيد اوى
وبقول انى اللى عايز يوصل لحاجه بيعمل سواء باللى قولتيه ربنا يجازيكى عنه خير او باى طريقه تانيه ويتخطى اى حواجز
مقصدتش ازعلك سامحينى

[هدية زهران]

ممكن يكونوا معرفوش يوصلوا رايهم بطريقة مناسبة وطبعا اللي قولتيه مفيد جدا بس كل واحد ليه طريقته في المذاكرة
يعني ملحوظة الالوان مثلا اقدر اقولك اني جربتها قبل كدة وتقريبا مكنتش ببص على اللى ملوناه
بس طبعا بتنفع مع ناس تانية
شكرا عالموضوع وجزاك الله خيرا

[saloooom]

شكرا جدا على النصائح الحلوة دى انا بعمل بحاجات منها زى المذاكرة بصوت عالى واستخدام الالوان وان شاء الله هاعمل بالنصائح التانية

[شمس الغد]

روووووووووووووووووووووووووعة والله كلامك مظبوط مية في المية بس العزيمة الي تحقق ولكن ربنا يستر (أشكرك)

[سارة عطالله]

نصائح غاليييية

[سبيل العالم]

جمييييييييييل جزاكى الله كل خير