|
||||||
| حي على الفلاح موضوعات وحوارات ومقالات إسلامية |
 |
|
|
أدوات الموضوع | انواع عرض الموضوع |
|
#1
01-05-2011, 11:26 PM
|
||||
|
||||
من دلوقتى >>>>> :::انا حد تانى:::
  ₪أريد حباً . . وحبيباُ₪ ₪≈لمَ العجب . . . نعم أريد حُباً ₪≈ ₪≈أريد حبيباً يشعرني بالأمان ₪≈ ₪≈أريد حبيباً معي في كل حين ₪≈ ₪≈أريد حبيباً لايكذب ₪≈ ₪≈أريد حبيباً لايغدر ₪≈ . . أريد حبيباً يصفح عن زلاتي . . يغفر لي هفواتي ₪≈لايلومني على ما أقترفته فيما ماضى ₪≈ ₪≈حبيباً رحيماً ₪≈ . . يسمع لي في كل حين ولايمل . . . . وأبث إليه شكواي فلا يكل . .  . . برأيكم أين سأجد كل هذا . . ؟ ₪≈وهل مطالبي كثيرة ؟ ₪≈وهل هي مواصفات تعجيزيه . . . . ؟ بالرغم من ذلك وجدت ماأصبوا إليه إنه :  وياااله من حب انة حب الله الله كم عافاك كم سترك كم أعطاك كم حماك كم رحمك كم امنك كم رزقك كم وهبك لماذا . . . . ؟ [ لأنه يحبك ]  حـــــــــب اللـــــــه جلس أحد السلف وهو يذكر الله وقلبه معلق بالله تعالي فجاء قوم وقعدوا معاه يعني قاعدين يكلموه ويسألوه وهويقولهم اذكروا الله فيقعدوا شويه يذكروا الله وشوية يكلموه ويسألوه يقولهم اذكروا الله برده مفيش فايدة يذكروا الله شوية وبرده عايزين يكلموه ويسألوه فقام وهو يضرب كفا بكف ويقول كل الناس زاهدون فيك يارب كل الناس زاهدون فيك يارب  >>الزهد>> الزهد أن نكون كالطائر الحر الزهد في الشيء لا الإعراض عنه لعدم الرغبة فيه أو الميل إليه ولا عدم الإحساس بأهميته ولا العجز عن القدرة على الاستمتاع به وإنما الزهد المحمود هو الزهد في الشيء الذي يقاوم فيه المسلم شهوة حية في داخل نفسه للشيء المزهود فيه وما يقاوم إلا طمعًا في فضل أكبر من الله عز وجل ترى ما الذي زهدتي فيه إبتغاء وجه الله ومرضاته فكر قليلا >>>> " " ياجماعة ناس كتير تقدر تتكلم عن العربيات وتقدر تتكلم عن الموديلات والمكياج بالساعات وتقدر تتكلم عن الموبيلات ساعات ومتقدرش تتكلم عن الله خمس دقايق طب ليه؟؟؟  لأننا حبينا الحاجات دي ومحبناش الله سبحانه وتعالي في حين اللي بيتكلم عن العربيات هاته دلوقتي هنا وخليه يتكلم عن عربية معينة من كتر انبهاره وحبه ليها هيبهرنا بكلامه عن العربية دي طب ليه طب لو جي يتكلم عن الله سبحانه وتعالي تلاقيه كلام فاتر وبطريقة فاترة وتلاقي الناس مش منفعلة ليه الزهد اللي عندنا في الله ده يا جماعة احنا عايزين نتعرف علي الله عايزين نبقي من اهل معرفة الله طب ما احنا عارفين ربنا في في كل حاجة معرفة عامة ومعرفة خاصة يعني الطب مثلا روح اسأل واحد مزارع او واحد فلاح في الارض وقوله ايه رأيك في الطب يقولك اه والله الطب ده حاجة كبيرة اوي والدكاترة دول ناس كويسين وياريت ولادي يطلعوا دكاترة ووووو... يقعد يتكلم بهذه الطريقة دي معرفة عامة انما تعالي بقى لطبيب وقوله ايه رأيك في الطب يقولك اليوم اللي دخلت فيه الطب وست سنين قاعدين نذاكر وفي الأخر 130جنيه في الشهر يعني لو دكتور اتجوز دكتورة ميجبوش ايجار الشقة بمرتبهم ليه؟؟؟ دي المعرفة الخاصة بقي فالمعرفة الخاصة ممكن تغير تصورك عن الشئ ترفعه في نظرك او تقلله في نظرك كذلك مع الله يا جماعة الناس دلوقتي عارفة ربنا بس معرفة عامة احنا عايزين معرفة خاصة لله سبحانه وتعالي عايزين نعيش مع معاني الثقة في الله حياة القلب مع الله حياة الثقة في الله الإفتقار والإنكسار بين يدي الله  ولكن اول معني تجاه معرفة الله عايزين نعيش معاه من أول الليلة معني حب الله حب الله إحنا هنتكلم عن حب الله ولاإية؟ بعض الشباب لما نيجي نتكلم عن حب الله يقولك بس انا هنتكس أصل لما تكلمني عن حب الله بتحسسني ان الموضوع بسيط مين قال كده يا جماعة انا بتكلم عن عاطفة الحب لأن الحب هو عاطفة تغيرية هائلة أخطر عاطفة ممكن تغير الإنسان وتقلب كيانه هي عاطفة الحب طبعا لما تيجي في صدرك ازاي؟ >>> مسمعتوش عن الراجل في الدورة الألومبية اللي فات كان قبل ما الفريق بتاعه يلعب الماتش قام نزل في الملعب وقام ولع في نفسه وقال انا بهدي روحي للفريق هو ده حب هو حب ضيع النفس بس ده حب مسمعتوش عن اللي انتحرت لما المغني اللي بتحبه مات مسمعتوش عن المغني اللي يقعد 15ساعة في اليوم يشتغل في الألحان من شدة الحب يا جماعة مقابلتش واحد صاحبك ساب السجاير إنت التزمت ولا إيه لأده اللي بحبها قالتلي سيب السجاير مقابلتش واحد صاحبك قاعد بيذاكر نهار وليل ومكانش طايق المذاكرة ليه اللي بيحبها اتفقت معاها ان انا هذاكر وانجح وابقي مجتهد الحب يا جماعة بيغير حياة الإنسان تماما بيقلب حياتك بدليل ان اي طالب قاعد دلوقتي قدامي بيخاف انه يسقطومع ذلك مش بيذاكر يعني الخوف ميعزوش !!! في حين لو حب حد او حب واحدة تلاقي حياته كلها اتقلبت وبيجري في تنفيذ مرضاتها.عاطفة الحب. الشباب دلوقتي في ازمة شديدة يعني ممكن تلاقي عددضخم من الشباب يدخل الجامع ولكن كتير جدا منهم بيخرج بعد ما يدخل الشباب دلوقتي يجي يدخل الجامع ويخرج بره ويقولك انا مش قادر اقاوم الشهوات عايز طاقة ايمانية جواه تخليه يقاوم الشهوات طب يقاوم الشهوات ازاي ده اخر الوعظ يعني بعد الخوف من النار مفيش حاجة علي فكرة يا جماعة للأسف الشديد بتراجع في هذه اللحظة واقول لأن اللي أشد من الخوف من النار واللي أشد من الخوف من القيامة واللي أشد من الخوف من الموت والقبر واللي أشد من الخوف كله الحـــــــــــــــــب عاطفة الحب لو ملأت قلوبنا هيبقي لها أثر تغيري هائل أقوي من أي عاطفة أخري علشان كده يا جماعة الحب بيخلي في طعم لعبادتك في طعم لدخلتك كده للمسجد ولما هنا قال الرسول عليه الصلاة والسلام لما قال (ثلاثة من كن فيه وجد حلاوة الإيمان) هو الإيمان ليه حلاوة حاجة كده بتداق!!! عارفين حلاوة الإيمان بالتعبير البلدي بتاعنا أو بالتعبير الوعظي الأدق لذة العبادة ان الدين ده بقي ليه لذه تلاقي الشاب عايش فرحان فرحان ازاي عايش قرآن وهو بيقرأ قرآن عايش ذكر وهو بيذكر الله عايش صلاة وهو بيصلي تلاقيه فرحان وهو جاي الدرس وفرحان وهو قاعد في الدرس وفرحان وهو خارج من الدرس ورايح يصلي قيام الليل وفرحان انه خلص مذاكرة علشان يروح يمسك المصحف يقراله حزب ولا حاجة وفرحان وهو رايح خطبة الجمعة ويروح بدري علشان يقعد في الصفوف الأولانية وفرحان وهو رايح يقعد مع صحبة صالحة فرحان عايش انت فرحان بالله؟  عاوزين نعيش معنى الفرحة بالله تـــــــــــــابعونا
__________________
 
|
|
#2
02-05-2011, 09:10 PM
|
|||
|
|||
|
بارك الله فيكِ
|
|
#3
06-05-2011, 10:57 AM
|
||||
|
||||
|
كان الجنيدي يقول واااااهدياه أيام البدء واهدياااااه ايام البدء ايام بداية الإلتزام انتي فين يا أيام بداية الإلتزام وبداية الإقبال علي الله جنــــــــــــــــة جنة المشاعر اللي هوعايشها ليه الحـــــب  عاطفة الحب هي اللي بتجيب الشعور ده في العبادة تخليك فرحان وانت داخل العبادة وانت جواها وانت عايش فيها وانت بتسيبها زعلان انك انت بتسيبها وبعد ما تخلص العبادة مشتاق إنك ترجعلها تاني فيما قاله الرسول عليه الصلاة والسلام (انتظار الصلاة بعد الصلاة وانتظار القيام بعد القيام وانتظار جالسة الضحي بعد جلسة الضحي تزيد اللذة اكتر تنقلب اللذة في حياتك يعني ايه يعني بعد ماكانت لذة الشاب انه يبص لبنت ولا يمشي مع دي ولا يكلم دي ولا يسمع اغنية ولا يشرب سجارة بقت لذته انه يصلي ويسجد ويعبد وانه هو يجري في الطريق الي الله بعد ما كانت لذته انه ينزل يلعب ماتش كورة من العصر لغاية العشا ويأذن المغرب وميصليش لله بقت لذته انه يقرا قرآن وانه يتباكي وانه يخشع في قيام الليل بعد ما كانت لذته انه يخرج يوم الخميس ويتفسح في النادي ويسهر علي القهوة بقت لذته انه يجي يحضر درس فى المسجد وبعد الدرس يتمشي مع الصحبة الصالحة ويروح مكتبة إسلامية يجيب شريطين ويروح لبيته وهو طاير من الفرحة انه هيسهر مع الشريطين دول بعد ما كانت لذته انه يصحي يوم الجمعة بدري علشان هيخرج رحلة مختلطة بقت لذته انه يوم الجمعة يصحي بدري علشان يروح الجامع ويقعد في الصفوف الأولانية النهاردة الشيخ محمد حسان ولا الشيخ محمد يعقوب جاي يحضر في الصفوف الأولانية عباده الحب تبقى رايح فرحان ومش عايز العباده تخلص فعاطفه الحب هى اخطر عاطفه ممكن تغير الانسان يعنى لذتك كده انك تصحى بليل تروح تصلى الفجر فى جماعه, يعنى موقف بيحكية دكتور حازم شومان مره الامام فى الجمعيه الشرعيه قرا فى الفجر بسوره غافر كلها فاخ قال انا اول مره افهم حديث النبى صلى الله عليهوسلم (من صلى الفجر فى جماعه فكانما صلى الليل كله ), الواحد اول ماالتزم كانت امنيت حياتى انى اشيل هدومى على كتفى وامشى اكلم الناس عن ربنا لحد مااموت من شده حبك للطريق اللى انت ماشى فيه فاحنا فين من هذا الكلام قابل كده اى حد فى الشارع مهما كان حتى لو كان افسد الناس قوله كده انت بتحب ربنا؟ هيقولك ايه؟ هيقولك بحبه مفيش حد هيقولك مبحبش ربنا رغم انه ممكن يكون من جواه مبيحبش ربنا عارفين ليه؟ علشان كل الناس فاهمين كويس اوى ان كل اللى ربنا عملهولنا ده ومبحبنهوش يبقى ناس جاحدين ومفيش حد يرضى يوصف نفسه انه جاحد ابدا . امبارح وانا خارج من صلاه المغرب لاقيت الدنيا بتشتى افتكرت حديث رسول الله صلى الله عليه وسلم لما كانت الدنيا تشتى كان يجيب ثوبه ويعد يجيب المطر فى الثوب بتاعه ويقول هذا حديث عهد بربى ده جاى من عند ربنا ده جاى من عند حبيبى شايفين حب الله ! شايفين لما كان النبى بيقبل الحجر الاسود ليه؟ اصله جاى من عند ربنا شايفين النبى لما كان مع السيده عائشه امراته يقولها ذرينى اتعبد بربى تقوله يا رسول الله انى لاحبك ولكن احب ما تحب فتقول السيده عائشه فقام رسول الله يصلى ويبكى حتى بل حجه ثم ظل يبكى حتى بل الارض ده بكاء حب وشوق لله سبحانه وتعالى . انت احلامك ايه؟ 
__________________
|
|
#4
09-05-2011, 04:01 AM
|
||||
|
||||
|
لما بتنام بتحلم بايه ؟ (ياسلام وانا ماشى معاها كده ودخل عليا 150 شاب ضربتهم كلهم ادامها) ويعد يعيش بقى كلام فاضى ,الرسول لما كان بيحلم كان بيحلم بايه ؟بيقول وددت لو انى قاتلت فى سبيل الله فاقتل ثم احيا ثم اقاتل فى سبيل الله فاقتل ثم احيا ثم اقاتل فى سبيل الله ثم اقتل (مينفعش يا رسول الله) لكن من شده حبه لله شوف لما كان بيدعو ربنا ويقول ( اللهم انى اسالك حبك وحب من يحبك و حب عمل يقربنى الى حبك) ,يعنى يا رب خلينى احبك وخلينى احب اللى يحبك وخلينى احب كل سكه توصلنى لحبك ,شايفين الحب يا جماعه حد شاف حب بالمنظر ده.  اخر حاجه بتفكر فيها قبل متنام ايه؟ا لرسول اخر حاجه قبل ماينام يقول اللهم اسلمت نفسى اليك ووجهت وجهى اليك (انت وجهت قلبى يارب) كان فعلا عايش مع الله سبحانه وتعالى يقول يا عائشه ان عينى تنام لكن قلبى لا ينام ,ده خوف ياجماعه؟ده مش خوف . عايزين نعيش معانى الحب دى عايزين نعيش زى اويس القرنى واحد دخل يصلى معاه الفجر فى مسجد علشان عايز يساله سؤال فبيقول ظل يذكر الله حتى جلسه الضحى وبعدين فضل يذكر الله لحد الضهر (ايه ياعم فيه ايه كل ده ) لغايه العصر لغايه المغرب لغايه العشا ثم قام يصلى من العشا الى قبيل الفجر فيقول الرجل فلما اقترب الفجر جلس جلسه فغلبته عيناه فنام دقائق فنتبه وهو يقول اعوذ بالله من عين نوامه !! العباده دى عباده ايه؟ عباده انس بالله ,كان ابن تيميه يقول ماذا سيفعلون بى ان سجنى خلوه ابو سليمان الدارانى يقول ان اهل الليل فى ليلهم (بتوع قيام الليل) الذ من اهل اللهو فى لهوهم ولولا الليل مااحببت البقاء فى الدنيا ,من شده حبه للخلوه مع الله سبحانه وتعالى ,سيدنا موسى(فلما جاء موسى لميقاتنا وكلمه ربه قال رب أرنى أنظر إليك (شايفيين الحب يا جماعه ,العلماء بيقولوا سيدنا موسى صبر ازاى على كلمه لن ترانى مع كل الحب والشوق اللى كانوا جواه دول بيقول نفسى اشوفك يا رب ده من كتر الحب مش هو برده اللى قال فى سوره طه وعجلت إليك ربى لترضى ,جايلك يارب مخلص اخر امتحان عندى وجرى على بيتك يارب مخلص مذكرتى وجرى على السجاده اصلى قيام ليل يارب مخلص محضرتى وجرى على بيتك اصلى يارب مخلص شغلى الدنيوى وقلبى بيجرى بيا ناحيه بيتك يارب وقلبى بيقول وعجلت إليك ربى لترضى ,احدى النساء لم تكن من اهل مكه ذهبت للحج قالت اين بيت ربى ؟ اين بيت ربى اين بيت ربى ؟ فدلوها على الكعبه فلما شافتها قالت هذا بيت ربى فقامت ووضعت خدها عليها فلما هزوها وجدوها قد ماتت من شده حبها لله سبحانه وتعالى ,امراه فرعون بعد ماكانت ملكه بتقول ربى ابن لى عندك بيتا فى الجنه ,قالت عندك قبل البيت انا عايزاه عندك يارب من شده الحب ,ابن مسعود لما يجيله مصحف كان يفضل يحضنه ويقول كلام ربى كلام ربى مش بس علشان الكلام جميل لا قضيه ان ده من عند ربنا ,فين الحب ده فى حياتنا؟؟؟؟؟ ابن مسعود حب المصحف والمراه حبت الكعبه بس العجيب ان فيه حد علشان ربنا حب السجن(رب السجن أحب إلى مما يدعوننى إليه )اصله هو معاك يارب. احنا فين من حب الله عز وجل؟
__________________
|
|
#5
09-05-2011, 04:03 AM
|
||||
|
||||
|
ورجلا ذكر الله خاليا ففاضت عيناه•:*¨`*:• "ففاضت عيناه" يعني عين نزل منها دمعة ولا العينين انهمر منهم الدموع؟ العينين انهمر منهم الدموع وكلمة "فاضت" يعني بكاء من غير نهنها..بكاء من غير تشنج لما تروح مثلاً درس ولا حاجة..والإمام صوته حلو كدا ويطلع يقرأ قرآن تلاقي اللي على يمينك واللي على شمالك قاعدين يتشنجوا في القراءة ويبكوا << دا بكاء خوف>> إنما لما العين "تفيض" دا مش بكاء خوف يا جماعة دا بكاء حب دا بكاء شوق العين لما تفيض دا مالوش دعوة بببكاء الخوف خالص بكاء الخوف ببقى الواحد بيرتجف فيه ويهتز يعني كتير مننا جربه أكيد بكاء الندم بكاء التوبة إنما بكاء الحب تلاقي أنت اللي جمبك مش حاسس بيه..تبص لوجهه تلاقي عينيه متغرقه بالدموع  في عبادة في الإسلام بتدل على شدة حب المؤمن لربه عبادة خطيرة جداً في الدلالة على شدة حب المؤمن لربه الطواف يا جماعة <<الطواف>> أنتوا عارفين الطواف دا علامة على إيه؟ (ولله المثل الأعلى) لو أنا جبت بيت وجبت قطة ولدت وجبت الابن بتاعها والبنت بتاعتها حبسته في البيت والقطة برا القطة تقعد تعمل إيه؟ تقعد تطوف حولين البيت..عايزه تلاقي أي مدخل تدخل فيه..لأن هي بتحب بنتها الطواف علامة..أوصلك ازاي يا رب؟ أوصلك ازاي؟ عشان كدا عبادة ملائكة السماء السبعة الطـــــــواف..حافين من حول العرش يا جماعة العبادات دي مش عايزين نأخذ العبادات..إنها طقوس وبقوم وأقف العبادات دي عايزين نعرف المعاني القلبية الخطيرة اللي فيها فيها معاني هائلة لو حسينا بيها <<الحج>> دا مثلاً من قبل مكة بـ 400 كيلو..تروح تُحرم في أبيار علي..من قبل مكة بـ 400 كيلو !! ليــــــــــــــــــه؟ مراسم ملكية مهو كل ملك ليه مراسم ملكية للدخول عليه المراسم الملكية للدخول على الله من قبل الدخول بـ400 كيلو لبيك اللهم لبيك لبيك لا شريك لك لبيك 400 كيلو !! إنتو عارفين النبي كان بيأخد المسافة دي يا جماعة مش في أوتوبيس زي محنا بنأخدها !! دا كان بيأخدها على ناقة !! وكان ممكن يبقى جزء منها ماشي كمان على ناقة يعني تخيلوا 400 كيلو..قال فيهم كم مرة لبيك اللهم لبيك؟ لبيك اللهم لبيك >> جملة لبيك لا شريك لك لبيك << جملة إن الحمد والنعمة لك والملك >> جملة لا شريك لك << جملة كل جملة بتتقال في متر يبقى 4 متر يعني في الكيلو يقولها 250 مرة يعني في 400 كيلو يقولها 100000 مرة يعني عشان يدخل على الملك يقول 100000 مرة لبيك اللهم لبيك يبقى دا إيه دا؟ تعظيـــــــــم طب أما يدخل بقى ويشوف الجمال..ويشوف الجلال..ويشوف الكمال..القلب يلتهب فيه الحب فيبدأ يطوف بقى من شدة الحب اللي بيستعر في القلب ساعتها يبقى حب وتعظيم طب أوصلك ازاي يا رب؟ ما أنت قلبك خلاص إتملى حب ليه وتعظيم أوصلك ازاي؟ روح بقى اسعى يعني إيه اسعى؟ السيدة هاجر لما كانت بتسعى بين الصفا والمروة يعني إيه تسعى؟ يعني ما كانتش بتمشي كانت بتجري..وهي بتجري..تروح..الفرج جيه من هنا تجري لأ ما جاش من هنا..طب يمكن جيه من هناك تجري لأ ما جاش من هناك..طب ارجع تاني يمكن يكون من الناحية دي تجري..لأ ما جاش يبقى لما ربنا سماه سعي معناه إن أنت عايز توصل لربنا فبتجري وأنت منطلق إلى الله مجاهدة..تجاهد..تتعب.. وخدها بكل عزيمتك وقدرتك في الطريق إلى الله سبحانه وتعالى والفرج جيه من هنا..طب طريقك من هنا يا رب..طب طريقك من هنا ! إنك أنت ما تسبش طريق يوصلك لربنا ما تجريش وتحاول فيه يا رب أنا الصحبة الصالحة حتوصلني ليك..حموت نفسي عشان ألاقي صحبة صالحة..حذل نفسي للملتزمين عشان يتعرفوا عليّ يا رب أنا التربية القلبية وإصلاح قلبي حيوصلني ليك حموت..نفسي في إصلاح القلب أي سكة حتوصلني ليك ولما تلاقي الفرج ما جاش..وتروح السكة التانية..ترجع وتفضل رايحة راجعة..رايحة راجعة يعني لما حخبط على باب من أبوابك يا رب..مش حمشي بقى وأقول خلاص الباب ما تفتحش..حفضل واقف على الباب وأفضل أرجع على الباب.. مين فينا يا جماعة اللي عندوا المعاني دي؟ شايفين معاني العبادات خطيرة ازاي؟ اللي حج وفي قلبه المعاني دي..زي اللي حج والمعاني دي مش في قلبه؟ الحج من أخطر العبادات الدالة على حب العبد لله من العبادات الهائلة الدالة على حب العبد لله  يا جماعة دا اسم الله اسم الله معناه حب..معناه الحبيب اللي أنت بتحبه من وله الفصيل إلى أمه يعني اشتاق..وحن..وبيحبها..فالاسم نفسه كله حب أسماء الله الحسنى حتلاقي كتير جداً منها أسماء حب تلاقي ربنا يسمي نفسه الغفور وإيه كمان؟ واسمع بقلبك بقى..ما تسمعش بودنك دلوقتي أسماء الله الغفار،،الحليم،،الشكور،،الودود اللطيف،،البر،،الحفيظ،،الولي الرحيم،،الرحمن،،الرؤوف،،الكريم أنت سامع؟ التواب،،الوهاب،،الرحمن،،العفو سامعين أسماء الله؟ البـــــــر غير أسماء الجمال بديع السموات والأرض أسماء الله سبحانه وتعالى كلها أسماء حب والعبادات كلها حب كلها إنك بتقدم ما يحب الله على ما تحب أنت ما هو الصوم..نفسك في الأكل والشرب بس ربنا يريد إن أنا ماكلش طب ما الجهاد..نفسك..آه الله أحب إليّ من نفسي طب ما الزكاة..الله أحب إليّ من مالي يعني الكلام دا اللي فات أنا عايز أقول منه إيه؟ الكلام اللي فات دا أنا عايز أقول إن الدين كله حب يا جماعة الدين كله حب عاطفة الحب دي لو مش في قلبك يبقى أنت بتعمل إيه؟ عاطفة الحب دي لو مش موجودة في قلبك وقابلت ربنا وعُرض عليه قلبك ولم يجد فيه حب.. يبقى قيمتك إيه عند الله؟ لو كل اللي في قلبك ناحية ربنا خوف بس.. يبقى ربنا ما يفرقش عندك عن دكتور المادة اللي أنت حتمتحن فيها آخر السنة !! (ولله المثل الأعلى) لازم يا جماعة علاقة الحب بينا وبين الله تبقى علاقة حية ضخمة ليها جزء واسع جداً في حياتك وسلوكياتك لازم نحب الله سبحانه وتعالى إحنا فين من الكلام دا؟  يعني **شوفوا كدا أهل الدنيا حبه أهل الدنيا ازاي ** الأم حبت ولادها ازاي؟ في امرأة هندية..بنتينها أتولدوا عمي..خلعت عينيها الاتنين ! يعني زي ما هو أنا قرأت إنها ماتت عشان يأخدوا القرنية بتاعت عينيها الاتنين..يدوا لدي واحدة ويدوا لدي واحدة سبحان الله !! حب..أهو دا حب.. أنت عملت إيه عشان ربنا؟ تخلع عينك عشان ربنا سبحانه وتعالى آه والله..والله اللي بيحب ربنا يعمل أكتر من كده يا جماعة شايفين **حب الصاحب لصاحبة؟ كل واحد مننا له صاحب..أول ما الواحد بيفرح بيجري عليه..وأول ما الواحد بيزعل بيجري عليه ربنـــــــــــا أول واحد لما بتفرح بتجري عليه؟ أول واحد لما بتزعل بتجري عليه؟ ربنا بيحتل هذا الموقع في حياتنا؟ ربنا له هذا المقام في قلبك وفي حياتك؟ شوفوا **حب الزوجة لزوجها يعني في الأول أول ما يتقدملها..ممكن يوحشها شوية..وشوية لأ بعد سنين من العشرة تعمل إيه؟ لو تعب شوية والتعب زاد تقول للدكتور يا دكتور والله لو حيشفي إنه يأخد كلية من كليتي يأخد كلية ليـــــــــــه؟ من شدة حبها ليه الحب يا جماعة غير حب الشباب والبنات تلاقي الولد يقول أنت نفسك في إيه؟ نفسي..أغلى أمنية في حياتي أبقى أنا وهي لوحدينا أنا وهي كدا في مكان لوحدنا ! أنت أغلى أمنية في حياتك إنك تبقى في خلوة مع الله؟ شايفين يا جماعة أهل الدنيا حبوا أهل الدنيا ازاي؟ أنت فين من الحب دا؟ ودائماً يقول لك أنا بشتاق ليها ولما أشوفها الشوق يزيد
يا سلام !! يزيد لما تشوفها؟ دا إيه دا؟ آه والله أنت لما بتوقف بين أيدين ربنا الحب بيزيد؟ والشوق بيزيد؟ ويقولك أنا يعني أنا نفسي..أمنية حياتي إنها تطلب أي طلب منيّ عشان سرعة تنفيذيه ليه يبين لها أنا بحبها قد إيه !! وإحنا ممكن أوامر عارفينها من سنين وما بنفذهاش !! واللي بتحبه يعملهولها نفسها..إنه يعمل ***وكه..يعملها ***وكه نفسها..إن هو يلبس لبس معين..يلبس لها اللبس المعين اللي هي بتحبه يعملهولها خدوا بالكوا يا جماعة كلمة فرض وسنة دي مش كلمة أهل الحب والله 
__________________
|
|
#6
10-05-2011, 01:14 AM
|
|||
|
|||
|
وعليكم السلام ورحمة الله وبركاته
جـــزاكِ الله خيراً وكتب لكِ الأجر اللهم انى اسالك حبك وحب من يحبك و حب عمل يقربنى الى حبك
__________________
|
|
#8
13-05-2011, 08:37 AM
|
||||
|
||||
|
اقتباس:
__________________
|
|
#9
13-05-2011, 08:41 AM
|
||||
|
||||
|
سبحان الله وبحمده سبحان الله العظيم كلمتان حبيبتان إلى الرحمن ،، بتحبهم يارب بتحبهم يا مولايا دا أنا هقولهوملك ليل نهار دا أنا هقعد ليل نهار أقول سبحان الله وبحمده سبحان الله العظيم بس أنت ترضى يارب بس انت ترضى عني،،  خدو بالكو يا جماعة لما شاب يروح يقابل فتاة مثلا بيحضر الكلام اللي هيقوله ويحضر لبسه ويقعد يمثل قدام المراية كدا هيعمل حركات ايه ومش عارف ايه ليه بيحضر مرة كنت رايح تصلي قعدت تحضر الدعاء اللي هتدعي ربنا بيه؟؟ مرة حبيت ربنا كده؟؟  يقعد معاها 5 ساعات في الجامعة رجليه متوجعهوش دا احنا لو وقفنا نص ساعة في الصلاة رجلينا بتورم يا جماعة !!! يقعد يكلما 5 ساعات في التليفون ميزهقش وانت لو قريت القرآن ربع ساعة تزهق !!! احنا فين من الكلام دا ؟؟ احنا فين من المقامات دي؟؟ وعشانها ساب امه وساب ابوه وساب اصحابه وعشانه سقط سنتين وعشانها عمل كل حاجة وضحى بكل حاجة وفى الاخر ماهواش حاسس انه قدم حاجة مبيمنش عليها ويقولها عملتلك دا هو حاسس انه معملهاش حاجة أهو هو دا الحب .. فين انت بقى حبك لله من هذا الحب فين؟؟ أنا بقول الكلام دا ليه ،، عشان هدف واحد " تصدق ان الحب بيقلب حياة الانسان " طب اذا كان حب المخلوق للمخلوق عمل فيه كدا أمال حب المخلوق للخالق العظيم يعمل فيه ايه .. عايزين نحب ربنا يا جماعة .. عايزين نحب ربنا سبحانه وتعالى،، يعني في ناس يا جماعة حبها لله وصل لدرجة انها: فرحانة وهي جاية المسجد وفرحانه وهي بتحضر الدروس وفرحانه وهي بتسمع الشريط فرحان ،، الحب يزيد أكتر في ناس حبها وصل أكتر لدرجة أنها تقدم ما يحب على ما تحب اللي بتحبه يارب ودول أهل المجاهدة وأهل التضحية الحب ممكن يوصل لدرجة أعلى إن مفيش حاجة اسمها ما يحب وما أحب .. مرادي مراد الله سبحانه وتعالى مرادي هو مراد ربي ومراد مولايا ومراد حبيبي .... فليتك تصفو والحياة مريرة (ياريتها تبقى كلها كحل بس انت يارب راضي) وليتك تعفو والأنام غضاب (يارب خلي كل الناس تكرهني بس انت تحبني يارب) وليت الذي بيني وبينك عامر وبيني وبين العالمين خراب إذا صح منك الود إذا صح منك الحب إذا صح منك الود فالكل هين (خلاص أنا زعلان على ايه) وكل الذي فوق التراب تراب ،، شايفين الحب يا جماعة !! الحب يزيد أكتر يبقى نفسك الناس كلها تحبه زي ما انت بتحبه وتقعد تكلم دا وتكلم دا عنه واللي بيحب حد لما يتكلم عنه يحبب كل الناس فيه تحبب كل الناس في الله تحبب كل الناس في ربنا وتقعد تدعو الى الله وتتكلم عن ربنا من شدة حبك ليه الحب يزيد اكتر واكتر تبدأ تحب الخلوة مع الله .. عايز ابقى لوحدي عايز ابقى لوحدي عشان اناجي الله بقى بكل اللي نفسي أقولهولو في صدري من ناحيته سبحانه وتعالى عايز أبقى معاك لوحدي يارب وتبدأ تحب الخلوة ويبقى عندك لهفة للخلوة مع الله،،، الحب يزيد أكتر توصل لدرجة عدم كراهية الموت ليه دا أنا هقابل ربنا .. هتقابل ربنا ؟ آه هقابل حبيبي هقابل مولاي سبحانه وتعالى ،، ويزيد أكتر تبدأ طب انا دلوقت معرفش اجلي هيجيلي امتى تبدأ الصلاة بالنسبة لك تكون حاجة مهمة أوي في حياتك تبقى لقاءك مع الله وتبدأ تحب طول العبادة وطول القيام للأنس بالله أنا في انس مع الله يوصل الموضوع معاك أنك إنت تضحي بكل حاجة تعطلك عن الله إنتَ كده؟؟ إنتِ كده؟؟ مين فينا كده يا جماعة مين فينا وصل للدرجة دي؟؟ انت الحب اللي ف قلبك وصلك لدرجة إنك تقدم ما يحب على ما تحب ؟ إنت الحب اللي ف قلبك وصلك لدرجة إنك إنتِ جاية المسجد بفرح وبتعبدي ربنا بفرح ؟ إنت الحب اللي ف قلبك وصلك لدرجة إنك إنت أجمل لحظات ف حياتك وانت ف خلوة مع الله في قيام الليل ؟؟ احنا الحب اللي ف قلبنا وصلنا لدرجة ان احنا مفيش حاجة اسمها احنا بنحب ايه وربنا بيحب ايه ما يحبه الله نحبه وما يريده الله نريده ؟؟ احنا الحب اللي ف قلبنا وصل لدرجة ان احنا نسيب اي حاجة تعطلنا عن الله ؟؟ احنا الحب اللي ف قلبنا وصلنا لدرجة نتمنى لقاء الله حتى لو هنموت ونسيب الدنيا؟؟ الجنيد رحمه الله كان قاعد في مجلس في الحرم فمعاه مجموعة من العلماء فبيقولوا يعني ما هو حب الله ،، فكل واحد قعد يتكلم عن حب الله ،، فقالوا للجنيد وكان صغيرا ماذا عندك يا عراقي ايه اللي عندك عن حب الله فأطرق رأسه ثم دمعت عيناه (بكاء الحب بقى) ،، ثم قال عبد ( اسمع اسمع يا اخي الكريم واحكم على نفسك ) 8جمل ::: " عبد ذاهب عن نفسه .. (مش داري بنفسي انا كل اللي انا داري بيه حبيبي) متصل بذكر ربه ، قائم بأداء حقه ( حب بحق وحقيقي حب عملي مش حب لسان وخلاص ) ناظر إليه بقلبه،، فإذا تكلم فبالله وان نطق فعن الله ( أنا مبتكلمش غير عنك يارب من شدة حبي فيك مش اللي بيحب واحدة يقعد يتكلم مع اصحابه عليها بمناسبة ومن غير مناسبة لغاية ما يزهقهم من قعدته معاهم ) واذا نطق فعن الله ،، واذا تحرك فبأمر الله ،، وإذا سكت فمع الله ،، (قلبه مشغول بالله سبحانه وتعالى) فهو لله وبالله ومع الله " . فبكى القوم ... هو دا الحب الحقيقي يا جماعة طب احنا دلوقت عايزين نحب ربنا أسباب حب ربنا ايه .. ايه الحاجات اللي تدفعنا لحب الله : · أول حاجة تدفعك لحب الله : نعم الله نعم ربنا سبحانه وتعالى الواحد ساعات لما يتأمل في المرضى اللي بيشوفهم يعني مريض الكلى اللي بيغسل المرة ب150 جنيه يعني لو الحكومة مغسلتلوش هيدفع 150 جنيه من جيبه يعني في الاسبوع بيغسل 3 مرات هيدفع 500 جنيه يعني لو هو بيدفع من جيبه هيدفع 2000 جنيه في الشهر طب انت تدفع اد ايه وانت داخل الخلاء تدفع كام ؟ في حين ان انت لك ان تعرف ان الكلى الطبيعية اللي ربنا حطها في جسمك بتغسل دمك في اليوم الواحد ( المريض بيتغسله 3 مرات في الاسبوع ) كلتك الطبيعية بتغسل دمك في اليوم الواحد 12 مرة يعني لو ربنا حاسبنا تجاري وجالك فاتورة اخر الشهر على كل غسلة 150 جنيه احسبها بينك وبين نفسك هتلاقيها في الشهر ب 66 ألف جنيه وخدوا بالكوا الآلام اللي بيدوقها مريض الكلى على الجهاز انت دمك بيتغسل دلوقت حاسس بحاجة ؟ يعني كمان لا في دكتور بنج ولا تمن حقن بنج ما انتاش حاسس بحاجة سبحان ربي ودي فاتورة واحدة ،،، دا الفواتير لسه كتير ربنا سبحانه وتعالى الوناسة اللي حطهالنا بالليل تونسنا دي في السما القمر وبالنهار في كلوب كبير كدا بينور الكرة الارضية كلها دا انت لو شقتك اوضة وصالة على اد لمبتين ووناسة وفيشة التلاجة وخلاص شوف بتتدفع كهربا اخر الشهر كام طب تدفع لربنا الكهربا دي كلها كام بقى وناسة الليل وكلوب النهار دا غير الاوبن بوفيه اللي ربنا عملهولنا في الدنيا مليون نوع اكل ومليون نوع حلويات ومليون نوع لحوم و... الاوبن بوفيه دا تدفع فيه كام،،، غير الفندق الخمس نجوم اللي انت نزيل فيه الكرة الارضية انت مبتدفعش حاجة تمن ان انت نزيل في هذا الفندق ،، كل دي فواتير عليك لربنا .. كل دي فواتير عليا لربنا.. ولما باجي واصلي لربنا ركعتين أقول يا سلام .. دا الملايكة تعمل لي تمثال فوق السما دلوقت إنتوا عارفين يا جماعة احنا عاملين زي ايه عاملين زي واحد عليه لواحد مبلغ بس مبلغ كبير مش ميات ولا ألاف ولا عشرات ألالوفات عليه 50 مليون جنيه مثلا فهو الراجل على اده فكل يوم بيسدد 75 قرش مثلا بكره يسدد جنيه وربع ،، بعده كسب شوية معاه ورقة بخمسة يروح بقى يقول ايه هيمسك قلبه وانا بطلعله الورقة ام 5 وانا داخل عليه تخيلوا واحد بيسدد دين بهذه الضخامة بالطريقة دي يبقى رايح يسدد الدين وعنيه مكسورة وقلبه مكسور ؟؟
__________________
|
|
#10
13-05-2011, 08:43 AM
|
||||
|
||||
|
اقتباس:
اللهم اميييييين جزاكى الله كل خير
__________________
|
|
#11
13-05-2011, 08:45 AM
|
||||
|
||||
|
جزاكم الله خيرا
__________________
|
|
#12
14-05-2011, 07:33 PM
|
||||
|
||||
|
حلم ربنا سبحانه وتعالى احبه عشان ايه ؟؟؟ لو جعان اللى ياكلك يديله غرف فى الجنه (ان فى الجنه غرفا يرى ظاهرها من باطنها وباطنها من ظاهرها لمن اطعم الطعام وألان لهم الكلام) امال لو مرضت اللى يعودك يديله ثواب هائل واللى ما زاركش يوم القيامه يعتبه( مرضت فلم تعدنى ) اللى يشربك يكتبها افضل الصدقه افضل الصدقه سقى الماء اللى يضحكك يديلو صدقه ( تبسمك فى وجه اخيك صدقه) اللى يبسطك يكتبها (احب الاعمال احب الاعمال الى الله سرور تدخله على قلب مسلم ) احب الاعمال اليك يارب اللى ينقذك يديلو اكثر من ثواب كل عقارات الدنيا واموالها (لان يهدى الله بك رجلا واحدا خيرا مما طلعت عليه الشمس وغربت ) اللى علمك فى دينك _(حتى الحيتان فى البحر تصلى على معلم الناس الخير ) ايه ده كله كل ده حب يارب ليا ؟؟؟  ده صحابى يارب اول ما اقعد معاهم واسيبهم بعد ما سبتهم يتريقوا عليا ده انا يارب كتبت على الجنيه بحبك راحت اشترت بيه حاجه ساقعه وباعتنى يارب تخيل لو قلتلك ان واحد بيحبك كده هتسيبه ؟؟؟؟؟ مش كده وبس ده اللى ميحبكش ( لا يؤمن احدكم حتى يحب لاخيه ما يحب لنفسه) احبه عشان حبه ورحمته للعصاه موضوع جميل قوى لما تشوف رحمه ربنا مع العصاه اول حاجه ارسل رسل عشان متهش فى الطريق فى بعض الاثر انى ربنا بعت 25 الف رسول وكل مرة يكذبوا الرسل تخيل ملك بعت 25 الف رسول ده جبريل مع كل واحد طالع نازل سبع سموات عشان ينقله الرساله وبعد ده كله يبعتلك ملك عشان يحفظك من الشياطين واحنا ينزلنا القران عشان يعرفنا الحلال من الحرام (قل بفضل الله وبرحمته فبذلك فليفرحوا هو خير مما يجمعون ) تخيل بعد ده كل لو حد عصاه يخسف بيه الارض !!!!!!!! لا اللى يعصى ربنا سيئه واحده واللى يعمل حسنه ياخد 10 هو انا لما اكسر اشارة بدفع 100 جنيه ولما بمشى فى الطريق الصح باخد ميه جنيه برضه!!!!! اعجب ما فى هذا الدين انى ربنا اصلا بيدى اللى بيطيعوا حاجه طب هو هيديه ليه ملازم يطيعه اصلا وبعد كل ده لو عصيت: يا ملك السيئات لبيك ربى :متكتبهاش ست ساعات ولو قعدت ست ساعات واستغفرت تتمسح ولو مستغفرتش عن الذنب وعملت اى حسنه يتمسح عشر سيئات ولو فضلت تذنب يسترك فيه فى مرة فضح حد فيكم وهو بيعصيه بالعكس يظل يناديك : عبدى انك ما دعوتنى ورجوتنى غفرت لك على ما كان منك ولا ابالى تعالى كده واسمع كلامى وخليك كده من اهل الدين لا طب عبدى انك ان استغفرتنى غفرت لك على ما كان منك ولا ابالى طيب قول حتى استغفر الله العظيم لا هو انا عملت حاجه عبدى انك ان لقيتنى بتراب الارض خطايا ثم لقيتنى لا تشرك بى شيئا غفرت لك على ما كان منك ولا ابالى طب تعالى حتى موحد لا" شرك خوف وشرك حب" الا طب ربنا يعمل ايه تانى وبعد كده يقعد يدى مواسم للعصاه اللى هيصوم رمضان ايمانا واحتسابا /هغفرله كل ذنوبه والجمعه الى الجمعه/ مكفرات لما بينها والصلاه الى الصلاه /مكفرات لما بينها وعارفين الى هيقول سبحان الله وبحمده 100 مرة /هغفرله كل ذنوبه مفيش فايده برضه ربنا هيعمل ايه للعباد اكتر من كده ومع كل ده لو اتزنقت ربنا يقبل دعائك ولو فضلت تعصيه تعصى تعصى ورجعت وقولت ربنا هيقبلنى ولالا هيقبلك ده كمان قبل ما يقبلك يفرح بيك شوفوا الحديث اللى فى صحيح الجامع ماذا تقولون فى رجل انفلتت منه دابته وعليها طعامه وشرابه وهو فى ارض قفر فلم يجدها (كم مره طلبك فى بيته فلم يجدك ) حتى شق عليه ثم مرت بجذل شجرة فتعلق زمامها . فوجدها متعلقة به ؟ والله لله اشد فرحا بتوبه احدكم اكثر من هذا بدابته خدتوا بالكم من الشجرة على فكرة يا جماعه كل واحد فينا ربنا حطله شجره  تابعونا
__________________
|
|
#13
14-05-2011, 07:36 PM
|
||||
|
||||
 كان فى احد الشباب كان من كام سنة التزم كان بيشرب نوع كدة من المخدرات كان الزجاجة بتسعين جنية ايامها فالشاب دة بعد ما التزم وتاب بقى وعرف طريق الجامع قابلة واحد صاحبة قالة ياعم تعالى يقولة لا مش جاى فصاحبة دة عاوز يجيبة بأى طريقة فقالة بص انا عازمك على زجاجة ليك لوحدك الليلة فصاحبنا دة قدام 90 جنية قام مسلم بقى خلاص قالة انا جاى هتستنانى فين؟ قاله قدام بيتك وهيبقى معايا الزجاجات صاحبنا ركب العربية لف من قدام البيت ملقهوش واقف فضايق منة ومن المواعيد الوحشة بتاعتة فقام قال الف تانى لفة بعيدة وارجع تانى لف ورجع تانى ملقهوش واقف فقال دة بينة بيضحك علية وطلع نام قابل صاحبة تانى يوم قالة اية يابنى استنيتك مجتش لية ؟ انا جبت الزجاجة وفضلت واقف قدام البيت قالة انا فضلت معدى من قدام بيتك وكل واحد يحلف انة جة ربنا عماة عشان ميرجعش تانى ماهو لو كان شربها تانى كان رجع فأخد بخطامها هى دى بقى مش هيسيبك هعميك عشان مترجعش تانى  يعنى واحد ركب تاكسى فالتاكسى لف لفة بعيدة جدا بية فهو بيلف اللفة البعيدة فصاحبنا سكت وامرة لله وهو فى اللفة دى لقى واحد لسة فى الاول بيجى ويقدم كدة رجل ويأخر رجل نزلة فى اللحظة دى اتارية لسة متشاكل مع الاخت الفاضلة زوجتة سبحان الله ربنا ملففنى اللفة دى عشان اجيلك هو انت ربنا هيسيبك مش هيسيبك اخذ بخطامها ثم قال من شدة الفرح شوف كلمة شدة الفرح دى فرحان بيك والله العظيم فرحان بيك انت مش فرحان بية لية ؟ انت فرحان بية فين الفرح بالله ؟؟؟؟؟ لو جبنا عشرة عبيد اتباعوا انهاردة كانوا مع بعض واتباعوا كل واحد اتباع لسيد شكل فبليل اتقابلوا مع بعض كل واحد يعد يحكى عن سيدة وغنى قد اية وطيب قد اية وكريم قد اية اكتر واحد فرحان فيهم اللى السيد بتاعه طلع اغنى واحد واكرم واحد انت مش فرحان بالله لية مش فرحان ان انت عبد لاغنى الاغنياء ولأكرم الاكرماء وارحم الراحمين لية مفيش فرح بالله ياجماعه يعنى الحديث دة تحس فية بأن اب كدة ابنة سابلة البيت ومشى فيسال علية يابنى تعالى مفيش فايدة يسال عنة انهاردة ابنك شوفناة انهاردة سهران بيشرب مخدرات بكرة ابنك شفناة فية مش عارف اية فا لأب خلاص يأس من ابنة فجأة مرة الباب خبط بيفتح الباب لقى ابنة جاى بيحضنة وبيقولة سامحنى ياوالدى ابوة مسك التلفون قال يافلانة ابوية رجعلى تانى خدوا بالكوا مش ابنى رجعلى تانى من شدة الفرح مش عارف دة ابنة ولا ابوة شايفين ياجماعه فرح ربنا بينا شايفين فرح الله كل واحد فى حياتة ربنا حطلة شجرة وكل واحد ربنا اخذ بخطامة لما دخل هنا عشان ميرجعش تانى شوف ازاى رحمة الله بالعاصى ويكرمك مش بس يفرح بيك يعنى كان اخ ملتزم كان عندة ثقب فى ضرس من ضروسة ولف على كل دكاترة الاسنان قبل الالتزام مفيش فايدة فى الألام اللى بيحسها اول ما التزم واستعمل سواك بيقولى كل الالام راحت حاجة من ربنا كدة بيقولك انى بك حفيا وبعد كل دة ياجماعه يعنى بعد الفرح وبعد الاكرام يبدل سيئاتك حسنات الملف بتاعك اللى كان كلة سوابق مش عارف تشتغل اى شغلانة اتبدل شهادات شرف وتقدير وبعد كل دة يملى قلبك بالأيمان ويبعتلك الصحبة الصالحة ويسرلك طريق الدين عشان يثبتك فى الطريق كل دى رحمة ربنا بالعاصى غير معاملة ربنا كل واحد بيعاملك فى الدنيا دى بيعاملك عشان يكسب منك الا ربنا بيعاملك عشان يكسبك دمعه واحدة من عنيك تغفر ذنوب سنين كلمة توبة صادقة واحدة من قلبك تمحو ألاف الخطايا والله يعنى اخ كان داخل امتحان شفوى فاوهو داخل فى واحد زميلة شاب طيب بس شاب متعسر دراسيا شوية فا قاعدين يتكلموا قبل ما يدخلوا لجنة الشفوى فابيقولوة يعنى الاخ التانى المتعسر انا مش مذاكر فى المنهج كلة من اولة لاخرة الا صفحة واحدة كانت عن الاشعاع فاقولة طب بص انت ممعكش اسباب يابنى انت داخل تعمل اية قعد استغفر بقى (من لزم الاستغفار جعل الله له من كل هما فرجا) فاهيعمل اية يعنى قعد يستغفر لحد مادخل اللجنة فا الدكتورة قعدت تسأل اللى موجودين فى اللجنة اسئلة كتير لغاية ما جت عندة كلمنى يابنى عن الاشعاع طبعا صاحبنا طلع من اللجنة على فين؟ على المسجد طبعا هيروح فين يعنى يعنى واحد شاف اية زى دى هيروح فين ياجماعه معاملة ربنا سبحانة وتعالى احنا معرفناش حنان الام وحب الاب لما قرينا كتاب عن حنان الام وحب الاب احنا عرفناة لما عملناهم لما نعامل ربنا نعرف ربنا لما تعامل ربنا وتشوف ربنا هيكرمك قد اية فى حياتك هتعرف ربنا سبحانة وتعالى معاملة الله دة حتى الابتلاء اللى بيبتلية ليك من اسباب حبك لية يارب والله يعنى سيدنا معاذ وهو بيحتضر كان بيقول اية (اخنق خنقك فوالله انى احبك) يعنى مهما عملت فيا بردة بحبك يارب لية اصل هو يعلم ان الابتلاء دة خير ليك اصلا دة يأما يغفر سيئات يا أما رفع درجات يأما تمحيص للأيمان اللى فى قلبك يأما رفع درجات فى الجنة ياما كانت خير ليك وهتعرف بعد سنين قد اية كانت خير ليك فى دينك ودنيتك
__________________
|
|
#14
16-05-2011, 04:15 AM
|
||||
|
||||
|
لازم تبذل الحاجة اللى انت بتحبها لأجل الله لما الفلوس دي يضحي بجزء كبير منها لأجل الله هيحب الله ليه ؟ لأن الحاجة اللى بيحبها أعطاها لله عز وجل آخر عنصر عايز أختم بيه إن مش المشكلة الخطيرة إنك تحب ربنا هي مشكلة بس المشكلة الاخطر منها إن ربنا يحبك ربنا بيحبنا ولا لأ كل واحد يسأل نفسه دلوقتى ربنا بيحبك ولا لأ؟ أنا فين منك يارب ده لو واحد جي دلوقتى وراح لأصحابه وقالهم تصدقوا إن الممثلة الفلانية بتحبني هيقولوله يا سلااااااااام تحبك إنت ؟؟ على إيه ؟؟ أمال ربنا بقى هيحبك على إيه ؟؟ إيه اللى إنت عملته عشان ربنا يحبك طب أكيد بتسأل مش أنا كنت من شوية بقول إن ربنا بيحبنا آه بس يا جماعة فى حب عام وفى حب خاص حب عام للبشر كلهم ورحمة عامة ولكن فى حب خاص زى ما فى عطاءات عامة للبشر وفى عطاءات خاصة إحنا عايزين الحب الخاص يعني لو قطر ماشي من الصعيد ورايح المنصورة مابين الصعيد والمنصورة 500 كيلو فلما تركب القطر هتلاقي يافطة مكتوب عليها 500 تمشي شوية هتلاقي يافطة مكتوب عليها 450 تمشي أكتر تلاقي 400 وبعدها 350 وبعدين 300 إيه اليفط دي ؟؟ اليفط دي علامات على الطريق طول ما انت بتشوفها فأنت عارف إنك ماشي فى الطريق وطول ما الرقم بيقل فأنت عارف إنك بتوصل لهدفك وبتقرب منه طب إنت على الطريق ولا لأ فى الوصول إلى الله ؟؟ طب إنت بتقرب ولا بتبعد ؟؟ لازم نسأل نفسنا أنا فين عندك يارب ؟؟ أنا هعطيكوا 6 علامات سريعة كل واحد يقيس نفسه عليهم ويعرف هو فين من الله العلامة الأولانية -اذا اردت ان تعرف مقامك فانظر اين اقامك خلاك تقيم الليل خلاك داعي لله خلي اصحابك يلتزموا علي ايدك خلى صاحباتك يتحجبوا على إيديكي خلى أبوك ولا أخوك ولا أمك يلتزموا على إيدك أين أقامك استعملك في اي وظيفة من وظائف الدين 2-بيعصمك من المعاصي ولا لا ( ولقد همت به وهم بها لولا أن رأى برهان ربه) ربنا ماسبهوش يقع ربنا عصمه كل آذان فجر ادن ومصحكش خذلان ليك كل مرة واحد او واحدة وبصيت او بصيتى خذلان ليك لو بيحبك هيعصمك لو ليك مقام عنده مش هيسيبك تقع في المعاصي الا اللمم 3-حب الناس ليك مهو اللى ربنا بيحبه بيوضع له القبول فى الأرض إنت فين حب الناس ليك ؟ واحد هيقولك بص بقى ده أنا كده طلعت ولى من أولياء الله هتقوله ليه هيقولك انا كل بنات الجامعة بيحبوني الحمد لله والشكر لله واحد هيقوله لا يا عم استنى أنا اللى ربنا بيحبني ليه ده ربنا محبب فيا كل الشباب الروش اللى فى الجامعة دى أول ما يعرفوا إنى طالع الرحلة كله يطلع على طول لا يا جماعة حب الناس أصله حب الصالحين او الحب اللى مفيش من وراه مصلحة 4-قيس نفسك علي مقاييس القران (وكان سعيكم مشكورا) تخيل لو حطيت اعمال حياتك كلها في ايدك وروحت تحطها بين يدي ربنا هل ربنا هيشكر سعيك ويتقبلها عايزك تقيس نفسك على كلمة( نعم العبد) تجيب ورقة الليلة وتكتب كل اللى عملته الاسبوع اللى فات وتشوف الورقة دى لو طلعت فوق هتاخد ختم نعم العبد ولا لأ ؟ 5-انت فين من عطاءات الله إحنا قولنا قبل كده 4 عطاءات لازم نفهم كويس العطاءات دى ودى كل ما تجاهد فى طريق الله هتشوف منهم اللي منها 1/تيسير الهدايه ربنا ميسرلك الطاعة ولا صعبه عليك 2/الرؤي بتشوف رؤى صالحة في منامك ولا لا 3/اجابه الدعاء ربنا بيستجاب لك ولا لا 4/الكرامات الدنيويه وكرباتك اللي بتتفك لما تلجاء اليه 6-أن يرزقك الله الاستقامة فالاستقامة هى أعلى كرامة أنا أعرف واحد كان متعود يقوم الليل فمرة كان تعبان جدا جدا كان نايم على الكنبة فى الصالة فربنا بعت له نملة طلّعت روحه لغاية ما صحي فهو فهم إن ربنا بعتهاله عشان يصحى قبل الفجر يصلي لو بيحبك هيرزقك الاستقامة لو بيحبك هيوفقك إنك تفضل ماشي فى الطريق بتاعه فهل ربنا رزقك الاستقامة ولا لأ أقامك على دينه ولا إنت لسة تايه ولا لسة تعبان ولا لسة بتقول أنا جديد ومش قادر أعمل الكلام الصعب اللى إنت قاعد تقول عليه لو إنت ربنا بيحبك هييسرك للدين وهيخلي أسهل حاجة على قلبك طاعة الله عايزين نتعود بقى يا جماعة إننا ندى توصيات عملية فى الآخر عشان نربط الكلام اللى إحنا بنقوله بالحاجات اللى بنعملها ** نحاول كل ليلة نصلي ركعتين قيام ونقرا بالمصحف ع الاقل ربع في الركعه اللي مش حافظ يقرا بالمصحف لو بتصلي اكتر ربنا يعينك بس اقل حاجى ركعتين ** المحافظة علي دعاء ---اللهم انى اسالك حبك وحب من يحبك -وحب كل عمل صالح يقربني لحبك ------في كل سجدة **نكتب نعم ربنا علينا ونحمده عليهه نجيب ورقة ونسميها ورقة النعم نعم ربنا عليك فى الدين افتكر قصة إلتزامك والصحبة وظيفتك ودراستك وشهادتك ونجاحك فى كل شئ افتكر نعمة الاسلام ونعمة القران وطول الاسبوع هات الورقة واحمد ربنا عليها هتطلع من الاسبوع وانت قلبك مشحون بحب الله وشكر الله
__________________
|
|
#15
16-05-2011, 04:17 AM
|
||||
|
||||
|
الطلب التاني ::: ورقة النعم ::: بعد اسبوع حب لله سبحانه و تعالى الطلب انك تروح الليله و لازم كل واحد يعمله الليله تجيب ورقه و تسميها ورقة النعم و تقعد كتب نعم ربنا عليك قعد تكتب نعم ربنا عليك في الدين افتكر قصة التزامك و افتكر الصحبة الصالحه اللي ربنا بعتهالك و افتكر نعم ربنا عليك في كليتك و في اهلك و في البيت اللي انت ساكنه و في طولك و في شكلك و في شخصيتك افتكر نعم ربنا عليك في كل حاجه و في دراستك و في شهادتك و في نجاحك بعد ما كنت يئست من النجاح السنه اللي فات و اللي قبلها و اللي قبلها افتكر نعم ربنا عليك في كل حاجه في الدين و في الدنيا افتكر نعمة الاسلام و نعمة القران  اكتب كل النعم و طول الاسبوع كل يوم تجيب الورقه و تقعد تبص فيها و انت قاعد تحمد ربنا سبحانه و تعالى يعني مثلا تقعد تقول الحمد لله الحمد لله تقعد تبص في الورقه فبصك في الورقه يطبع النعم دي في دماغك و حمدك مع بصك فيها يطبع الاحساس ده في قلبك طلع من الاسبوع ده مشحون بشكر الله و حب الله سبحانة وتعالى يبقى اول اسبوع حب الله , تاني حاجه ورقة النعم من اخطر الورق اللي بيفرق مع الواحد في حب الله تالت حاجه ::: اللي بيحب حد بيتكلم عنه ::: عايزين الاسبوع ده , نازل تصور مذكره و لا رايح سيكشن ,انت نازل كده كده هتقابل الناس كده كده رايح الدرس هتقابل اصحابك و هتقابلي صحباتك نخلي كل كلامنا الاسبوع ده مع الناس عن الله مش بنحبه ؟ نتكلم عنه طب نتكلم عنه ازاي ؟ مبعرفش اجيب مدخل يا اخي سبحان الله ده انا كنت بسمع شريط امبارح لقيت الشيخ بيقول كذا كذا كذا و تتكلم بقى يا اخي ده انا بقرأ ايه النهارده الصبح سبحان الله وتقوم قاعد تتكلم الكلام ممكن الكلام ملهوش دعوه بالايه بس هو مش هياخد باله اول ما ينفعل معاك خلاص اقعدوا اتكلموا عن الله يا جماعه عايزين الاسبوع ده نتكلم عن ربنا كتير اللي فاكر اي ايه او اي حديث او اي معلومه قولناها عن حب الله يقعد يتكلم بيه بحيث اننا نتكلم عن الله كتير مره بقى ننال الشرف ده مره بقى الله يضطلع علينا من فوق سبع سموات يلاقينا بنذكره في ملأ فيذكرنا في ملأ خير منه و لا ايه يا جماعه ؟ خلاص متفقين ان شاء الله ؟ اللهم انا نسألك حبك اللهم انا نسألك ان تحبب قلوبنا فيك اللهم انا نسألك ان تجعلك حبك احب الينا من كل شىء اللهم انا نسألك حبك اللهم انا نسألك حبك و حب من يحبك و حب كل عمل يقربنا الى حبك يارب املأ قلوبنا حبا لك اللهم يا رب العالمين لا تجعل في قلوبنا الاك و لا تجعلك همنا الا رضاك و لا تجعل حبنا الا لك و فيك و لا جعل رهبتنا الا اليك و لا تجعل رغبتنا الا اليك و لا تجعلك توكلنا الا عليك و املأ قلوبنا حبا لك و رجاء في رحمتك و ثقة فيك و انابة اليك و يقينا بك و يقينا بك و بجنتك و نارك اللهم املأ قلوبنا بحبك و بالشوق الى النظر الى وجهك الكريم و بالشوق الى لقائك من غير ضراء مضرة و لا فتنة مضله يارب لا تردنا بعد ان اكرمتنا و رفعتنا و نصرتناعلى انفسنا و على شياطين الانس و الجن طهر لنا قلوبنا من شهواتنا و شبهاتها طهر قلوبنا من حب الدنيا و حب الغفلة انر لنا قلوبنا بحبك انر لنا قلوبنا بمعرفتك انر لنا قلوبنا و طهر لنا قلوبنا و اصلح لنا قلوبنا و احيي لنا قلوبنا و املأ قلوبنا بمعرفتك و املأ حياتنا بطاعتك يا ارحم الراحمين سبحانك اللهم و بحمدك اشهد ان لا اله الا انت استغفرك و اتوب اليك
__________________
|
|
| العلامات المرجعية |
«
الموضوع السابق
|
الموضوع التالي
»
العرض العادي
|
|
جميع الأوقات بتوقيت GMT +2. الساعة الآن 11:58 PM.
