سكي ع القهوة يا فوزية

[M.Sherif]

السلام عليكم

العرب زمان ... (( أيام ما كان فيه عرب )) كانوا بارعين جدا في علوم كتيرة أوي صدروها لكل الحضارات و كل البلاد ... حتي لقتلة الهنود الحمر (( أمريكا )) و كان من العلوم دي علم اسمه علم الفراسة
كان الواحد منهم يقول : تفرست وش الراجل ده فعرفت هوا مين و منين و بيفكر ازاي و اشتهرت أسر عربية كتيرة اوي بموضوع الفراسة ده يقولك ده وشه مربع مثلا ...
فيعرف انه شخصية قوية و منظم و قيادي
واحد تاني تلاقي وشه رفيع ... يبقا حساس و مرهف و مثالي و بيحبط من اقل حاجة ,,, واحد ثالث وشه مثلث ... يبقا عقلاني و متفاءئل و حاد الذكاء و ذهنه حاضر .. الشخص السعيد تلاقي حركته خفيفة .... شخص تعيس او مقهور ...تلاقي رجله تقيلة و منحني ... واحد تاني حاطط دايما ايده في جيبه يبقا شخص غامض و منسحب و عرضة للنقد
واحد تاني عنيه مراوغة يبقا خجول او خادع او مكار او منطوي ... الخ
ده من ناحية الشكل انما في فراسة ناتجة عن ايمان شديد بالله ...
فالشخص ده دايما بيشوف بنور ربنا فيقدر يعرف من وشك ...انت مين و بتفكر ازاي و حياتك عاملة ايه ... و ذنوبك ايه زي سيدنا عثمان رضي الله عنه ... لما دخل عليه واحد ... سيدنا عثمان قال له : (( أري في وجهك الزنا !! )) ... و الراجل أقر و اعترف !!تخيلوا لدرجة ايه ؟؟ طبعا هي قدرة خطيرة جدا لا تتسنى لاي حد لكن كتير مننا برضه ... شقي في الموضوع ده بمعني ... يقدر يعرف بسرعة الشخص اللي قدامه ده ايه و مصايبه السودة و أكيد كل واحد من حضراتكم قابل ناس كتير و فهمهم من أول نظرة في وشه مش كده ؟؟؟حتي في عالم النت و المنتديات في ناس كتير اوي عندها القدرة انها تقرا ما بين السطور و تعرف الراجل صاحب الموضوع ده ... مؤمن باللي هوا بيقوله ولا لا ؟ فرحان و لا مكتئب بيمثل و متكلف و لا تلقائي لما بيرد علي حد في منتدي مثلا ... بيحبه و لا بيكرهه ... بيبالغ و لا طبيعي قلبه ابيض و لا منفسن ؟يااااااااااه بيبان اوي سبحان الله ... كل كلمة بتطلع اللي ف القلب حتي من غير ما يشعر بس الناس الاواريب (( جمع أروبة )) بيقدروا يفهموا بسرعة طبعا كتير من حضراتكم ماشاء الله زي الفل و في ناس زي طور الله في برسيمه يتكتب الموضوع ... تلاقيه بيرد في وادي تاني خالص هههههههههههههههههههههه و هكذا
ـــــــــــــــــــــــــــــــــــــ
اكيد حضراتكم مريتوا بمواقف زي دي كتير و قريتوا عيون الناس من اول نظرة اكيد دخل عليك مرة واحد في بيتك و رحبت بيه جدا و طلبتله قهوة و عشا و حاجة ساقعة و لما قعدت معاه شوية كده و قريت عنيه و فهمته و عرفت اللي فيها ناديت بأعلي صوتك علي مراتك (( فوزية )) و قلت لها (( سكي ع القهوة يا فوزية ))
مش كده و النبي ؟أحكوا بقا ... ماتبخلوش علينا بحكاياتكو