وزير التربية والتعليم بيعمل ايه في امريكا

[كناريا الوادى]

وزير التربية والتعليم بيعمل ايه في امريكا


محمد عبد الحميد خطاب

15-8-2011 | 01:26



9


700










لو حضرتك وزير و عندك مشاكل متلتلة ومدرسي قرفانين و بيطالبوا باقالتك تعمل ايه :
( تسافر أمريكا و تاخد أبو سريع اللي وصف المعلم بالكلب عشان تطلع علي تجربة أمريكا في مدارس المتفوقين علميا !!! – ترجع بيتك وتريح الناس منك بعد فشلك في تقديم أي جديد – تحل مشاكل الوزارة و تحط خطة استراتيجية لمستقبل التعليم والمعلمين )
لو حضرتك وزير من اللي طفحوا الدم في العهد البائد و تأخرت ترقيتك بدل المرة ألف عشان حضرتك مش وطني قصدي مش حزب وطني أكيد و وقفت في الميدان مع الشعب الثائر علي الطغيان أكيد كنت هتحل مشاكل الوزراة و تقيل أبو سريع و سدنة الوطني المنحل اللي عششوا في الوزارة وخربوا التعليم عماد المستقبل و ترفع شأن المعلم عماد التربية والتعليم .
لكن لو حضرتك وزير من الفلول وعضو لجنة السياسات في الحزب الوطني المنحل اللي كانت بتخطط لعملية التوريث مؤكد هتجيب كل حبايبك و ترصهم في الوزارة و يبقي كل همكم امتحان الثانوية العامة يعدي علي خير و الكبار يرضوا عنكم و تدي الطرشة للمعلم و تسيبه يعترض /يحتج / يتظاهر / ينونو و في نهاية اليوم تبتسم و تقول دول قلة مندسة
و للا تسيبهم يتظاهروا و تروح لدورة بتنظمها بيبسي لان الدنيا حر و لازم تطري علي قلبك و مين عارف ايه تاني ؟
أقولك تروح حضرتك تتفسح في أمريكا شيكا بيكا و معاك حبيبك أبو سريع و الرئيس السابق لهيئة محو الأمية د/ رأفت رضوان اللي وصلت الامية علي ايده ل 70% برضوا جو أمريكا لذيذ و تعمل شوبينج ! و منها تشوف مدارس المتفوقين هناك برضه خبرة !
بدل ما يسافر خبراء حقيقين يطلعوا علي الخبرة الامريكية في التعليم و ينقلوها و التعليم يتطور و مصر تبقي احسن و يقولوا التعليم كان بايظ في عهد مبارك و بقي أحسن مع الثورة !
للأسف يا سيدي الوزير أنت الوجه الحقيقي لنظام مبارك ؛ نفس الأسلوب المتعجرف و نفس الخطوات التي لا تراعي مصلحة الوطن و لكن المصالح الشخصية لقد أعدت سيادتك رجالك بعد أن استبعدهم من سبقك لفسادهم ولكن ليس خطأك انه خطأ رئيس الوزراء الذي يعد و لا ينفذ .. لقد نسي السيد شرف رئيس الوزراء أنه سيستبعد كل الفلول من الاماكن القيادية ولكن مشاغل سيادته جعلته ينساك و ينسي رئيس المجلس القومي للرياضة و و رئيس المجلس القومي الشباب وها هي النتيجة : فشل + فشل = نهاية ثورة و عودة المخلوع الذي تجلت مظاهر عودته هو ورجاله في الحفاوة التي لاقوها في الجلسة الاولي للمحاكمة من رجال من الشرطة .
هل ننقذ الثورة من خفافيش النظام السابق و تجاربهم غير المحسوبة التي تقوض الوطن هل نأمل في غد بلا فلول