في ليلة 27 اللهم عليك بالليبراليين و العلمانيين!!

[محمد.فوكس]

سلام عليكم و كل سنة و انتو طيبين..
طبعا انا من اسكندرية و امبارح صلاة القيام في مسجد القائد ابراهيم كان اكبر عدد من المصلين لانها ليلة 27.
المهم الامام و هو بيدعي دعى اللهم عليك بالليبراليين و العلمانيين و طبعا كل المصليين وراه آآآآآآمين.
لان لازم نتبع الامام في الصلاة برغم ان ممكن جدا او اكيد ان كان في ليبراليين بيصلوا يعني دعوا على نفسهم من الآخر.
طبعا دي اهم دعوة كان مجهزها الشيخ قبل الصلاة يعني اكيد مكانش مركز مع حادث سيناء اوي و مش مركز مع اخواننا في سوريا ولا اخوننا في الصومال بالدرجة اللي مركز فيها مع الاخوة الاعداء.
الحمد لله انا صليت في جامع تاني بس ده خلاني اسأل نفسي يا ترى لو كنت بصلي في الجامع ده اللي كنا بنصلي فيه ايام الثورة و مليونيات حماية الثورة كنت هعمل ايه؟
ادعي على ناس معملوليش حاجة ناس كانو ماشيين معايا في مظاهرات الثورة و بيتضرب عليهم نفس اللي بيتضرب عليا و اكيد في منهم استشهد؟
و الخطر الاكبر ان كده بقت الجوامع_اللي هي لكل المسلميين حتى لو مسلم بيشرب خمرة و العياذ بالله مقدرش امنعه من دخول الجامع و الصلاة فيه_هل الجوامع هتبقى لفئة معينة ضد فئة معينة و تستغل العدد اللي جاي يعبد ربه عشان تستخدمه ضد فئة منافسة او مش جاية على مزاج الامام؟
او تخلي المصلين يدعو على نفسهم اذا كانو من الفئة اللي الامام مش مستلطفها؟
يا أخي طب على الاقل ادعليهم بالهداية لو انت شايف انهم مخطئين.
طبعا اللي موافق على التصرف ده فلا يمكن هيكون ليه تفسير منطقي لان الموضوع ابعد ما يكون على المنطق.
و هو ليه اصلا كل التركيز ده مع الليبراليين و العلمانيين (و لو اني ضد ان يتحطوا في سلة واحدة) طالما ان الاخوة في التيار الديني دايما يقولو ان دول فئة قليلة و مجرد نخبة عددها صغير و احنا عددنا كبير و لما عملو جمعة 29 /7 اعجبوا بكثرتهم و اطمئنوا انهم قضوا على الباقي؟
سلام عليكم و حسبنا الله و نعم الوكيل