معلومات تهم الطلاب الجدد فى كلية العلوم

[عـــادل]

انا هتكلم عن الاحتياجات المطلوبه بالنسبه لعلوم القاهرة واغلب الجامعات كذلك مفيش اختلاف


الكيمياء

فى الاول انت محتاج بالطو ابيض علشان معمل الكيمياء

ومحتاج حوالى 2 انبوبة محاليل زى ده


وماسك علشان وانت بتسخن تمسكها بيه زى اللى انت شايفه ده كده

والكلام ده ليه لان فى التيرم الاول بتدرس فى المعمل اللى كنت درسته نظرى فى الكيمياء الخاصه بالكشف عن الشق الحامضى والشق القاعدى
والموضوع كالتالى بعد ماالمعيد يقعد يشرح الخطوات اللى هتعملها للكشف هتلاقى الحيوان فنى المعمل بيطلع ملح ويحطه على التربيزه وكل واحد بياخد شويه بالانبوبه بتاعته ويكشف عليه
طبعا كتير منكم مش بيكون فاهم هيعمل ايه وبيقعد يشوف اللى حواليه بيعمله ايه ويقلدهم (بالاخص لو حد كان عايد: والاحسن انك تلزق للمعيد وتخليه يفهمك تعمل ايه ومتكسفش) لكن الموضوع سهل ومن تانى مره معمل بتكون فهمت ايه اللى هتعمله بعد كده بعد كده هتمتحن فى العمل برضه حاجه اسمها شيتات
وهى بتكون معادلات كيميائية وانت بتكتب الناتج وبتوزنها وفى امتحان معمل فى الاخر والمعمل درجته الكليه 30

بالنسبه للنظرى
بعد حوالى شهر بتستعد لامتحان الميد التيرم الاول وبتمتحن امتحان فى الكيمياء نظرى بيكون من 10 درجات

يبقى مجموع اعمال السنه 40 درجة وفى فى الاخر امتحان فينل بيكون من 60 درجه

وطبعا مطلوب للنجاح ان تكون حاصل على الاقل على 60 درجه علشان تعدى الماده


اما اللى تذاكره من كتب ثانوى فراجع الكيمياء وخصوصا تسميه المركبات والكاينات والالكانيات الخ
وراجع الفيزياء لان الكيمياء هتكون خليط بين الاتنين



----------------------

الفيزياء

هيكون فى عملى مره كل اسبوع اكتب الخطوات اللى المعيد بيشرحها وركز كويس علشان هتمتحن فى العملى بتجربه من اللى اشتغلت فيهم
والعملى درجته من 30
وعلى فكره التجارب ده متصوره ومحطوطه على اليوتيوب يعنى ممكن تشوفها كلها وبكده تبقى محضرها وفاهمها
علشان انت مطالب بعد المعيد مبيشرح التجربه انك تعملها وتطلع بالنتائج وتروح تصححها منه علشان تاخد الدرجة بتاع التجربه



10 درجات للتجارب اللى بتعملها فى المعمل و20 على الامتحان اللى هو بيكون تجربه من اللى اشتغلتهم قبل كده

وامتحان ميد تيرم اول بيكون من 10 درجات

يبقى اعمال السنه 40 وامتحان فينل ب 60 درجة وللنجاح طبعا من 60 درحه فى الماده

----------------------

الرياضه

هى اشبه فى الاول برياضه 2 ثانوى بس تختلف شكلا وموضوعا

المطلوب تدور على كتاب تانيه ثانوى وتذاكر المتابينات كويس

وتعرف تجيب منها الدومين والرينج ( النطاق والمدى ) لان هيكون عليه حدوته
وبعد كده التناقصيه والتزايدية

وتعرف تقسيمات الاعداد يعنى الاعداد الطبيعيه هى ايه والاعداد القياسيه والاعداد الصحيحه والاعداد الحقيقيه والاعداد الاوليه

وده المنهج اللى هتدرسه

1- مفهوم الدالة وامثلة
2- تعريف النطاق الطبيعى للدالة
3- خواص الدالة ( الدالة الزوجية والدالة الفردية )
4- اطراد الدالة
5- الدوال المحدودة والغير محدودة
6- تركيب دالتين
7- الدالة العكسية وتعريفها
8- دالة القوى
9- الدوال المثلثية
10- الدالة الاسية والدالة اللوغارتيمية
11- دالة الصحيح
12- نهاية الدالة
13- اثبات النهاية بالتعريف
14- نظرية وحدانية الدالة
15- النظريات الاساية لحساب النهايات
16- نهاية الدالة فى المالانهاية
17- اتصال الدوال
18- نظريات الاتصال
19- العلاقة بين اتصال الدالة ومقياسها
20- اتصال الدالة العكسية وتعريف المشتقة
21- التعريف الهندسى للمشتقة
22- معادلة المماس والخط العمودى
23- المشتقة اليمنى والمشتقى اليسرى
24- القواعد الاساسية لاشتقاق الدالة
25- مشتقة تحصيل دالتين
26-الدالة العكسية
27- تفاضل الدالة الضمنية
28- مشتقة الدالة الاسية واللوغاريتيمة والتفاضل اللوغاريتمى
29- التفاضل المتتالى للدوال الصريحة
30- المشتقة النونية
31- نظرية ليبنتز
32- نظريات القيم المتوسطة (رول-لاجرانج-كوشي)
33- متسلسلة تايلور
34- كيفية رسم منحنى الدالة بعد دراسة خواص الدالة

على فكره كتاب الرياضه متصوره مرفوع على الانترنت تقدر تحمله وتذاكر منه لو حبيت كنوع من التحضير هيساعدك فى الفهم لو موركش حاجه هتلاقى فى موضوع متثبت هنا

كلام فارغ وسهل وممكن بقعده واحده افهمك كل ده بس طبعا لوحدك هتتعب شويه لكن هتستوعبه بعد كده

وفى الرياضه امتحان ميد تيرم اول بعد شهر من 10 درجات

وفى امتحانات دوريه كل اسبوع اجمالى درجتهم من 10 درجات

وفى امتحان ميد تيرم تانى من 20 درجه

وفى الاخر امتحان فينل ب 60 درجه




وباقى المواد نفس الفكره مش مستهله شرح لانها بتختلف حسب التخصص لكن نفس الموضوع اذا كان فيها عملى بيكون من 30 وامتحان واحد فقط ميد تيرم اول ب10 وفينل ب60
واذا ماكنتش فيها عملى بتكون بنفس طريقة الرياضه فى توزيع الدرجات


على فكره انت هتاخد باسورد ورقم كود علشان تسجل جدولك

اتمنى اكون ساعدتكم بالمعلومات ده
واى شى انا فى الخدمه