حوارالغفير والمخلوع والضمير !!

[بورسعيدى]

الشاهد (نيازى الغفير) كان يعمل في حماية حدود البيت الكبير ضد اى هجمات خارجية وكان المخلوع ينام ويشخر وهو داخل البيت طالما في حماية الغفير نيازى وبناء على هذه الثقة من المخلوع في هذا الرجل لذلك قرر دفاع المخلوع طلب شهادة (نيازى الغفير) .. نيازى قام بزيارة المخلوع في المستشفي قبل الإدلاء بشهادته …ودار هذا الحوار الخيالى بين المخلوع (ونيازى الغفير)....
المخلوع: خلاص هتبيعني يا نيازى ؟؟
نيازى الغفير:معاش اللي يبيعك يا ريس .. بس أنا مزنوق فعلاً
المخلوع:لو مزنوق في ركن الزنزانة واديها
نيازى الغفير:مقصدش يا ريس ..بس أنا خلاص عرفت هتصرف..
المخلوع:هتقول للمحكمة مين اللي قتل الثوار يانيازى ؟
نيازى الغفير:نلبسها لـ عمر سليمان يا ريس
المخلوع:قشطه..طب هتقولهم مين اللي قطع الاتصالات ؟
نيازى الغفير:نلبسها لساويراس يا ريس
المخلوع:طب هتقولهم مين المسئول عن موقعة الجمل ؟
نيازى الغفير:نلبسها لـ زكريا عزمي يا ريس
المخلوع:زكريا عزمي ؟؟؟ .. أيه اللي بتقوله ده يانيازى ؟؟
نيازى الغفير:احم .. أنا أسف يا ريس .يظهر أتعديت حدودي..
المخلوع:مش القصد .. بس زكريا عزمي أنا ملبسه 13 تهمه تانية فمش ناقصة
نيازى الغفير:وماله يا ريس ما نخليها 14 عشان ياخد الإعدام المتين على طول ودى لعبتنا من زمان ياريس
المخلوع:طب و قضية الأراضي و تصدير الغاز يا نيازى ؟
نيازى الغفير:الحمد لله .. حسين سالم لبسها لوحده محدش قاله البس هو غاوى لبوس من يومة
المخلوع:طب وآنا يا نيازى ؟
نيازى الغفير:أنت هتبقى من شهداء 25 ينا...ير يا ريس
المخلوع:مينفعش يا نيازى
نيازى الغفير:ليه بس يا ريس
المخلوع:عشان شهداء 25 يناير ماتوا في أحداث يناير .زى ما حمادة هلال قال..وإحنا دلوقتي في سبتمبر ..وآنا مبحبش ازعل حمادة
نيازى الغفير:يا ريس اللي حصل في يناير اللي فات ده حمادة هلال ..واللي جي ده حمادة هلال تاني خالص
المخلوع:بس تفتكر الموضوع ده هيخيل ع الشعب يا نيازى
نيازى الغفير:مهو خال على الشعب 30 سنة ياريس ده شعب جميل واليف جدا ياريس اومال انت فاكر ايه
يا ريس الشعب اتهبل وعمال يدور على كوبون البلاي ستيشن في الكيمو كونو ومش فاضي لحاجه تانيه
المخلوع:كوبون البلاي ستيشن ؟ .على أيامي مكنش فيه كوبونات يا نيازى .. كان اللي بيفتح الكيمو كونو بيلاقي البلاي ستيشن في قلب القرطاس علطول
نيازى الغفير:صادق يا ريس .. هي أيامك دي تتعوض ..ده الشعب النمرود ده قطع عيش السفير الإسرائيلي وطرده .. و الراجل بقاله أسبوعين دايخ بالـ(سي في) بتاعه في تل أبيب ومش لاقي شغل
المخلوع:يعني أنا كنت طيب يا نيازى ؟!
نيازى الغفير:طبعاً يا ريس
المخلوع:بالحق ازي حسن شحاتة وسمير زاهر والوأد شوبير ؟ وازي دينا ، وسعد الصغير، وأنغام، ودياب
نيازى الغفير:كلهم زعلانين ياريس
المخلوع:يعنى زعلانيين ..أمال ليه بيقولوا اني كنت بلعب بالبلد سنجل ؟
نيازى الغفير:سنجل فين بس ياريس؟.أمال جمال وعلاء دول بيعلموا أيه .. ماهما كانوا بيلعبوا بالبلد معاك برضه
المخلوع:وبيقولوا إني كنت موقف الشعب نكست ؟
نيازى الغفير:موقف مين بس ياريس؟ ده أنت كنت حاططنا كلنا على حجرك وكنا متكيفيين ومتزبطين وأنت شغال لعب الله ينور
المخلوع:حلوة مقعدكم على حجري دي يا نيازى
نيازى الغفير:تحت أمرك يا ريس اومال ايه
المخلوع:أمال همه دلوقتي قاعدين على أيه بعد ما مشيت يا نيازى
نيازى الغفير:أخلاقي متسمحليش أقولك يا ريس ..
المخلوع :أنت خبيث يا نيازى
نيازى الخفير:ده أحنا عشرة عمر يا ريس. هسيبك بقى عشان صحبنا اللواء(( البربرى)) بيرن عليا ياريس وعايزنى فى سبوبة كده على ما تفرج انت عارف الحياة صعبة من بعدك ياريس
المخلوع :نيازى
نيازى الغفير :عيون نيازى يا ريس
المخلوع: اعمل الصح من غير ما اقول
نيازى الغفير :عيب يا ريس خدامك نام انت بس وشخر وحط فى بطنك بطيخة صيفى
المخلوع : مممممممممممممممم
نيازى الغفير : عيييييييييييييييب