هم آلهة ومعصومين من الخطأ.........??

[القلب التائه]

هم آلهة ومعصومين من الخطأ.........??

ــــــــــــــــــــــــــــــــــــــــــــــــــ ــــ

سألوا فرعون : يافِرعُون أيش فرّعَنك ؟ قال : مالقيتش حِد يلمنى !!

طول عُمرنا وأحنا عارفين أن القضاء والنيابة خط أحمر !! أوعى حَد يشكك فى نزاهة القضاء !! .أوعى حد يهاجم القاضى ، أو وكيل النيابة !! ..أوعى حَد يرّمش بعينه لأى فرد من الهيئة القضائية ..

أوعى ... أوعى ... أوعى !! لغاية ماعشش فينا الخوف من رجال القضاء بأى حال من الأحوال !!

وورثناه لأولادنا وأحفادنا !!

ليه يعنى .. هل هم آلهة ومعصومين من الخطأ ؟ هل القضاة مصنوعين من طينة فاخرة ، وأحنا مصنوعين من طينة درجة تالتة سودة ومحروقة ؟

كانت نتيجة هذا أن فرعون أتفرْعَن زيادة .. والقضاء بقى مَحْصُور ، ومَحْجُوز لأُِسَر القضاة فقط .. يعنى تلاقى الجد ، وأبوه ، وأمه وأبنه ، وبنته وحفيده ، وحفيدته قضاة .. وتلاقيهم حاطين ميزان العدالة على باب الشقة أو الفيللا .. وعلى كل عربياتهم !!.. فهو تحذير شديد وواضح ، أحترس هنا أسيادك وتاج راسك أنت وأهلك السادة القضاة !!

وتسمع حكايات عن ولد مفعوص لسه متخرج بمقبول وأتعين معاون نيابة بقاله يومين .. وزميله أبن الموظف أو البواب متخرج بأمتياز ، مع مرتبة الشرف الأولى ، وأتعَيّن فى المَجَارى ، أو جَمْعِية تعاونية ، أو لم يُعَيّن خالِص .. وقاعِد عَاطل لِغاية دلوقت !! وهذا المتعَيّن من يومين يدخل على لجنة مرور بسرعة قصوى .. ولما يسأله ضابط المرور الرخصة لو سمحت .. يصرخ غاضبا وثائرا : رخصتى أنا .. أنت مش عارف أنا مين ؟ وكأن مكتوب على قورته أنا من الأسياد والصفوة .. وينهال على الضابط بأقذع الشتائم ، وأقذر الألفاظ ، لأنه معاون نيابة فى نيابة أم التيبتى .. فى أصغر محكمة ، بأصغر مدينة بمصر ..

وماحدث مع المحامين منذ عامين هو أكبر دليل على طغى ، وتسلط ، وعنجهية ، هذه الفئة من المصريين !! كلهم بيتكلموا فى الإعلام المرئى والمقروء وكأنه على راسهم ريشة .. ممنوع أنتقادهم .. ممنوع مخاطبتهم إلا بسِيادتك ، وجَنابَك ، ومَعَالِيك .. ممنوع التعرض لهم أو لأسرهم بأى حال .. مافيش فيهم مرتشين إطلاقا .. ومافيش حد فيهم بيغلط .. ومافيش حد فى مصر أعلى منهم شأنا !!

مرتباتهم ، وبدلاتهم ، وحوافزهم ، أعلى فئة فى مصر .. حَصَانتهم ، وقوَتُهم أعلى وأقوى شىء فى البلد .. رئيس نادِيهم هو الزعيم المُلهِم لكل المصريين .. ولازم كلنا نكتب ونبْصُم له بالوَلاء والطاعَة .. لو هَددُوا يبقى الكل لازم يركع ، ويستجيب لمطالبهم .. هم خط أحمر على أكبر شنب فى البلد ومافيش حد يعديه ..

أنا عايزكم تشوفوا وتسمعوا موظفى المحاكم اللى عاملين إضرابات بقالهم يومين تلاتة .. أو بمعنى أوضح ..الفلاحين الغلابة اللى بيشتغلوا فى عزبة القضاء ، والمملوكة بالكامل لمجموعة محددة من الأسر المصرية المحظوظة ( الأقطاعيين الجدد ) .. وشوفوا تصرفات القضاة وشباب النيابة معاهم أزاى ؟

هى معاملة الأسياد والعبيد .. ولو أعترض أى من هؤلاء الغلابة ، يقوله معالى مُعَاون النيابة خللي بَالك أنا أسجنك بجَرَة قلم .. وده صحيح ، فمعاون النيابة اللى أتخرج أمبارح ممكن يسجن أى حد بجرة قلمه الأحمر ، من غير ماحد يحاسبه ، ولا يسأله ..!!

آه .. آه .. أتخنقنا ، وزهقنا .. كل الأمور دى لازم تنتهى فورا .. ولازم تتراجع كل ملفات القضاء من أول وجديد .. ولازم الثورة تكون ثورة شاملة .. مش بس ثورة على رؤوس النظام .. لأ .. لازم تكون ثورة على كل النظام .. ثورة على المحسوبية .. ثورة على الظلم .. ثوة على التفرقة .. ثورة على السلطوية المطلقة .. ثورة على الفساد .. ثورة على النفس الأمارة بالسوء ..ثورة على البيروقراطية .. ثورة على العقول المُتحَجرة .. ثورة على الضمائر الميّتة .. ثورة على الأسياد من كل نوع .. البلد خلاص مابقاش فيها أسياد وعبيد .. وشعبها كله مواطنين ، متساويين فى الحقوق .. وعليهم نفس الواجبات .. الكل أصبحوا أسيادا على أنفسهم .. والكل أصبحوا عبيدا فى خدمة مصر .
ali