الناتج القومي - الاستهلاك الوسيط - البورصة

[m - sayed]

السلام عليكم ورحمة الله وبركاته

بالنسبة للفصل الثالث فى الاقتصاد
في بعض الأمور مش واضحة بالنسبة لى
زى : الناتج القومي و الاستهلاك الوسيط والحاجات دى
ومعادلة الناتج القومي
وكمان البورصة في الفصل الخامس
فيا ريت لو حد عنده شرح مبسط وسهل ليها يحطوا هنا

وجزاكم الله خيرًا

[khaled_student1]

بص يا سيدى
الانتاج القومى ده هو مجموع ما ينتج من سلع وخدمات .....يعنى لو افترضنا ان فى مصنع حديد وصلب انتج ب 100 مليون جنية صلب ومصنع سيارات انتج ب 200 مليون جنية سيارات فيتم حساب الانتاج الكلى على انه 200 و 100 يبقى 300 مليون وطبعا الكلام ده غلط لان ال 200 مليون بتوع السيارات فى 100 مليون منهم انتاج الصلب لذلك فانتاج السيارات فقط هو 100 مليون جنية
يعنى فى حالة الانتاج القومى يكون مضلل لانه بيحصل حاجة اسمها الازدواج المحاسبى اللى هو تكرار حساب قيمة السلعة مرتين زى كدة ماحسبت مرة الصلب على انه انتاج بذاته من مصنع الصلب والمرة التانية على انه جزء من انتاج السيارات
والاستهلاك الوسيط هو مقدار السلع والخدمات التى يشتريها احد المشروعات من المشروعات الاخرى ثم يقوم ياستخدامها وطبعا فى المثال السابق الاستهلاك الوسيط هو الصلب اللى مصنع السيارات اشتراه من مصنع الصلب وقام باستخدامه
اما القيمة المضافة هى مقدار مايضيفة المشروع الى قيمة السلعة يعنى هو ال100 مليون اللى مصنع السيارات زودهم على الصلب اللى اشتراه
فبكدة يكون الناتج القومى (القيمة المضافة)= الانتاج القومى الكلى - الاستهلاك الوسيط
يارب اكون قدرت افهمك
بالنسبة للبورصة دى سوق نظامية بيجتمع فيها العارضون والطالبون للاوراق المالية التى سبق اصدارها فى السوق الاولية
بمعنى ان فى سوق اسمها السوق الاوليه يتم بيع الاسهم والسندات فيها لاول مرة ولو اى حد يملك الاسهم دى وعايز يبعها بعد كدة يتجه للبورصة عشان يبعها اذا استوفت الشروط لقيدها فى البورصة
لو انا مقدرتش افهمك تقدر بقى تشوف اى استاذ اقتصاد من اساتذتنا فى الموقع وتبعتله رساله خاصة وهو يفهمك

[m - sayed]

جزاك الله خيرًا أخي وبارك الله فيك