صرخة شهيد

[إلهام صلاح لاشين]

صرخة شهيد
خدتوا بالكوا من الشهيد
لما مات وسط الميدان
من رصاصة فى العنيين
من سلاح غادر جبان
من بجاحة الأمين لما داسه وراح ينام
موتوه دمروه
ضيعوا كل الملامح
رغم إن الحق واضح
والصراخ هز المكان
حد فاكر
ردوا قولوا
حطموا الخوف اللى ساكن وانزلوا يلا الميدان
مستحيل نرجع عبيد مستحيل عصر الحديد
يسخط الشعب لفيران
كل فار يرجع لجحره لأجل ماتعيشوا فى سلام
إحنا مش ممكن نعيش
والقفا مليان كفوف
كف أوعى الثورة تاخدك
كف عسكر ما اختشوش
كف أهلك يستقروا
هم مين سابوا الكلاب والديابة فى كل يوم يملوا النعوش
كف يلا اختار رئيسك
ولبسوا الناس اللبوس
رغم إن الشعب عارف مين عدوه ومين حبييبه
خافوا من الإخوان وغيرهم
ورجعوا أخبث نفوس
بس لما القاضى علا صوته
وقال لسان الحق قال
إدى للجانى البراءة
قال براءة وميت براءة واللى مش عاجبه يغور
فجأة كل شهيد فى بلدى
صحى أهله وقال قوام لازم نثور
إحنا أصحاب البلد دى
مش هنمشى مش هنرجع
مش هنسكت
جوه محراب الميدان
نملى كل الدنيا نور
قوم يا مصرى وأوعى ترضى
ذل طابق ع الصدور
كان زمان ممكن نطاطى
والنهاردة مستحيل أبدا هنجرى
ونستخبى فى الجحور