رساله الي مسئول

[Mr.Ahmed EL-hady]

المسؤول بيقول: في أوروبا والدول المتقدمة بيقفلوا المحلات بدري!

واحنا نكره نبقى زي أوروبا والدول المتقدمة ..
لو قفل المحلات الساعة 10 هيخلينا زيهم يبقى تمام وفل الفل ..
بس إيه رايك يا سيادة المسؤول في التالي:

في أوروبا والدول المتقدمة بيدفعوا بدل بطالة لكل واحد معطل عن العمل ومش لاقي وظيفة .. حضرتك مش بتدفع حاجة للعاطلين فإيه رأيك لو نبدأ بكل اللي هيقعدوا في بيوتهم بعد القرار كدفعة أولى!

في أوروبا والدول المتقدمة عندهم حد أدنى للدخل بيحصل عليه أي حد في قطاع عام أو قطاع خاص .. وبعض الدول زي انجلترا لو حد اتعين في قطاع خاص ومرتبه أقل من الحد الأدنى للدخل الحكومة بتدفعله الفرق! .. واحنا لسه بنتكلم عن الحد الأدنى للأجور لدكتور بياخد 300 جنيه مرتب و19 جنيه بدل عدوى!

في أوروبا والدول المتقدمة عندهم ضرائب تصاعدية مرتفعة بيدفعها رجال الأعمال والأغنياء وضرائب منخفضة على الفقراء (وفي كل انتخابات بيبقى الوعد بتقليل الضرائب على الفقراء) .. واحنا عندنا الضرائب متساوية على الجميع والملياردير بيدفع ضرائب نسبتها قريبة جدا من اللي بيقبضوا مرتبات عادية جدا وبيستفيدوا كمان من الدعم!

في أوروبا والدول المتقدمة عندهم تأمين صحي آدمي للإنسان .. واحنا عندنا تامين صحي الداخل فيه مفقود والهارب منه مولود ..

في أوروبا والدول المتقدمة لما ضابط شرطة بيقبض على مشتبه بيه في الشارع بيقول له Sir وبيقراله حقوقه في عدم الكلام الا في حضرة محامي .. واحنا عندنا دكتور في الجامعة بيتجر جرجرة من أوتوبيس السوبر جيت بنداءات تصف أمه بألفاظ قبيحة لأنه تجرأ وقال للضابط اتكلم معايا كويس!

في أوروبا والدول المتقدمة المسؤول بيتبهدل في وسائل الإعلام ولكن عشان هو عارف إنه أجير عند الشعب بيكون جزء من مهمته انه يوضح الحقائق لوسائل الاعلام ليل نهار ويستحمل اي اتهامات ويوضح اي اكاذيب .. وعندنا المسؤول بيقفل التليفون في وش المذيع عشان قال له قرار صارم وهيقطع عيش الناس!

عزيزي المسؤول ..
نفسنا زي أوروبا والدول المتقدمة على فكرة متفهمناش غلط ..
بس في حقيقة الأمر عندنا شوية مشاكل عشان نقدر نبقى زيهم ..
عارف واحدة من اهم المشاكل دي يا عزيزي المسؤول هي ايه؟ ..
حضرة سعادة جناب فخامتك


رساله الي وزير التنميه المحليه شاهد الفيديو https://www.youtube.com/watch?featur...&v=HTX3gcROG0U

[محمد محمود بدر]

وجهة نظر محترمة ولكن ودن من طين وودن من عجين
شكرا للرؤية وللموضوع

[راغب السيد رويه]

جزاك الله خيرا وبارك فيك

[السيد القهوجى]

عاوز بحث عن الفريق الصحى
شكرااااااا

[أ/رضا عطيه]

(ودن من طين وودن من عجين )

دا كان زمان

لكن الأن

( موتوا بغيظكم )

التغيير مطلوب طبعا

نفس المنهج

المقارنة مع أوربا فقط فى قوانين قراقوش

لكن هل دخل المصريين يعادل 10% من دخل من يقارنونا بهم

هنا تجدهم

صم بكم عمى لايفقهون كمن سبقوهم !

ربنا يتولانا برحمته

شكلرا جزيلا

[aymaan noor]

وجهة نظر تحترم
جزاك الله خيرا و بارك الله فيك

[غازي محمد]

هل القرار صدر من خراج مبنى البرلمان ؟

ان كان كذلك
هل يعني بان السلطات التنفيذي والتشريعية ليست لديها كافة الصلاحيات خصوصا في ظل هذه التغيرات التي طرأت بعد نجاح الثورة ؟



تحياتي