جامعة طنطا لا تعترف بوجود كلية التربية الرياضية كإحدى كليات التربية

[ymz258]

اااأقرأ الخبر جامعة طنطا وكلية التربية لا تعترف بكلية التربية الرياضية جامعة طنطا
الموضوع بإيجاز شديد أنا حاصل على بكالوريوس تربية رياضية جامعة طنطا عام 1997 وللعلم فإن طالب التربية الرياضية يقوم بدراسة المواد التربوية كاملة التى يدرسها خريج أى كلية تربية أخرى ركز معايا كل المواد التربوية كاملة والشهادة تفيد بحصول الطالب على درجة البكالوريوس فى التربية الرياضية يعنى حاصل على التربية معايا ولا أقول تانى
المهم تقدمت للحصول على دبلوم مهنى فى التربية شعبة ادارة مدرسية من كلية التربية جامعة طنطا
وبعد أن سحبت المظروف ودفعت المبلغ والمصاريف كاملة حوالى 930 جنيه
وأثناء تقديمى للمظروف فوجئت بالموظفة تقول لى بأن خريجى كلية التربية الرياضية ليس لهم الحق التقدم للحصول على الدبلوم المهنى فى التربية ولا أى دبلوم أخر وقالتلى بالحرف الواحد هو أنتم جايين ترموا بلاكوا علينا.
قولت لها طيب ازاى تيجي قالت أنت مش خريج تربية
قلت لها : أمال خريج إيه قالى تربية رياضية مش تربية واللائحة بتاعت الجامعة تمنع طلاب كلية التربية الرياضية من الحصول على أى دبلوم داخل كلية التربية جامعة طنطا.
قالتها طيب أشتكى لمين قالت روح نائب رئيس الجامعة للدراسات العليا
قلت ماشى رحت لنائب رئيس الجامعة للدراسات العليا اللى اتضح ان مفيش حد فى المكتب انه سمع بالكلام ده من قبل.
قالوا روح لواحد اسمه الأستاذ/ محمد البنا فى المكتبة المركزية بجوار كلية العلوم مسئول الدراسات العليا.
الراجل قابلنى بطريقة كويسة وفعلاً أكد لى أن لائحة الجامعة لا تعترف بخريج كلية التربية الرياضية كأنه خريج من كلية التربية وليس له الحق فى الحصول على أى دبلوم سواء مهنى أو خاص واتضح أن اى حد ممكن يحصل على أى دبلوم فى التربية مهما كانت الكلية الحاصل عليها ماعدا بتوع التربية الرياضية
قلت له طيب ازاى قالى اللائحة تقول كده.
قلت له طيب هافضل طول حياتى مدرس تربية رياضية ومفيش مجال أنى أطور من نفسى
قال لى الواقع كده .
طيب ياعم الحاج اشمعنى بتوع التربية الرياضية اللى كانت جزء فى الأساس من كلية التربية
قال اللائحة قديمة وهى دى التعليمات
واتضح من كل ده أن الجامعة جامعة طنطا وكليةالتربية يعترفوا بأى كلية أخرى مهما كانت ولا يعترفوا بوجود كلية التربية الرياضية بجامعة طنطا وكأن الناس اللى فيها من عالم تانى ولاد.........
وعجبى.

[ymz258]

نصيحة لأى حد يفكر فى الإلتحاق بكلية التربية الرياضية وبالخصوص جامعة طنطا
لو عندك كوسة فى الكلية دى التحق وانت هاتحصل على أعلى التقديرات ويمكن تتعين معيد فيها
بس خد بالك الكوسة دى يأما عمك أو أخوك أو أختك أو مراتك أو زوجك
والله العظيم بتكلم بجد
عايز أى حد يخش الكلية دى ويسأل على أى دكتور بقول أى دكتور إلا واحد تقريباً ويشوف ابنه متعين فين ولا بنته ولا مراته ولا أخوه ولا ابن عمه ولا ..........
والله العظيم بتكلم بجد
ولو ماعندكش كوسه فالأفضل لك تخش اى كلية تانية
معلش نبصله بصه تانية هاتطلع تعمل ايه بعد الحصول على الكلية هاتشتغل بكلية التربية الرياضية ايه
فين دى المصلحة أو الشركة الى بتشغل حد حاصل على تربية رياضية
دا حتى الجامعة نفسها مش بتعترف بالكلية دى حد تانى هايعترف بيها.

[kabtenM1]

الكلام ده غير مضبوط بدليل أن لى زملاء دفعة 1992 وماقبلها حصلوا على الماجستير مش دبلوم مهنى وإللى يسأل لا يتوه

[kabtenM1]

أما عن كوسة الكوسة التى ذكرهاYmz258 فهى فعلا كوسة بالمفروم وفى عائلات بعينها مكتوب عليها الكلية وطظ فى الكفاءات والتفوق والمتفوقين ...
ياناس ده فيه أحدهم عارف نفسه كويس أوى إتعين معيد لمادة السباحة وهو كان بيشيلها معاه للسنه إللى بعدها...وآخر إتعين معيد لأنه بيلعب تنس طاولة أه والله ومايعرف غيرها....وإللى لان أبوه فلان وقريبه علان ...ولا إللى مابيعرفش كرة القدم من الكرة الطائرة...ولا إللى حافظ حركتين جمباز...ولا إللى عنده لته فى الكلام .....وعجبى

[ymz258]

والله العظيم الكلام ده حصل فعلا
والله فعلاً دفعت الفلوس ووقت تقديم المظروف رفضوا استلامه ورحت مكتب نائب رئيس الجامعة ورحت للأستاذ محمد البنا
واللى مش مصدق يروح يسأل فى كلية التربية جامعة طنطا بشارع البحر أمام المحافظة

[ymz258]

طيب اسمع دى
الغريب أن لائحة جامعة طنطا وكلية التربية جامعة طنطا هم الوحيدين على مستوى الجمهورية اللى بيقولوا ذلك
أنا جبت جميع اللوائح بتاعت جميع كليات التربية على مستوى الجمهورية تقريباً وكلها بتقول
متطلبات القيد فى الدبلوم المهنية أوأى دبلوم تربوى أخر
أن يكون الطالب حاصلاً على درجة الليسانس فى الآداب والتربية أو البكالوريوس فى العلوم والتربية أو الدبلوم العامة من إحدى الجامعات المصرية أو أى مؤهل تربوى جامعى أخر أو على درجة علمية أجنبية معادلة