يادي الجدع

[عاطف حمدان محمد]

***** يادي الجدع *****
********************
صوتك نايات عازفة البدع
مواويل فرح وقت اللقا
متشوقة ساعة الغياب
تخطفني من قلب الوجع
وتشدني بحبل الغرام
فأرجع وأقولك بعشقك
صوت وشوشة جوه الودع
تتحدى نهنهة الحروف
والخوف ولخبطة الكلام
وبعلو صوتها تقول قدر
اني أعشقك يادي الجدع
شُقع بُقَع قلبي وَقَع
من غير دجل أو شعوذة
ولا رغي فاضي ونقوذة
طبيت ف حبك من سكات
وعشقت عيشة التلمذة
ف فصول غرامك والدلع
قلبك جمع قلبي وطرح
فوق سكتي بستان فرح
متقسمة ف عودك نغم
شافها البجم نط ورمح
والشمس ضحكت ع القمر
وف عز ليلنا النور طلع
أما انت فعلا مشكلة
وعليكي حبة أسئلة
ازاي وليه انا بعشقك
وانا روحي فيكي مسلسلة
بالذمة طيب هسألك
مين ده اللي يقدر يلمحك
ما يدوبش من نظرة ويُقع
يصرخ بعلو الصوت جدع