ملكش نفس تزاكر؟زهقان؟طيب ممكن تتفضل/ي؟

[أثِيل]

سلام عليكم ورحمة الله وبركاته
اولا وعشان اكون صريحة معاكوا الموضوع منقول من الفيس وعملته شوية تنسيق كده

اآلسَـلَامُ عَـلِيـكُـمْ ورَحمةُ اآللهِ وَبَـركآاتُـه
أَسْـعَـدَ اآلله يَـومَـكمْ؛
النهاردة في شوية حاجات مهمة لازم اقولكم عليها علي موضوع الامتحانات والمذاكر والفوبيا بتاعتهم..

اول حاجة لازم نكون عارفين اننا لازم نكون مزاكرين من اول السنة حاجة بحاجة عشان المراجعة لامتحانات الترم تبقي سهلة علينا، وكمان امتحانات الترم الاول لازم يكون مية مية عشان الترم التاني
ديت حاجة،
في حاجة تاني برده مهمة
اذا انا اصلا كنت ضايع ومش كنت بزاكر وحالتي حالة وكمان فوقت قبلها بشهر ولا بشهرين مثلا اعمل ايه؟

بص يا سيدي/ستي..
انا كنت الحاجة المهمة التانية ديه فمجرب الحركة دي
فعملت ايه؟ ..
كنت بحب اسمع د.ابراهيم الفقي يامة، واشوف نصايح في جوجل واليوتيوب عن المذاكرة وياريت يا عالم كنت بطبق!
مكنتش نفسي جاية علي الحاجة الي اسمها مذاكرة
لحد ما جيت وقفت وقفة كويسة شوية
وقولت ايه ..
اما اجرب، اشوف يمكن يحصل حاجة وقمت عملت زي ما عمو ابراهيم الفقي قال، فهو قال نحدد اهدافنا ونكتبها علي ورقة
وباختصار كده قال:
حدد هدفك بالتحديد..عايز ايه منه،وامتي،وليه،امتي عايزه، ولما توصل هتعمل ايه، واهم نقطة هل هو بيرضي ربنا ولا لاءة، واذا في رضاه يبقي اتوكل علي الله ويلا ابدأ خطوات اهدافك الي انت حطتها ..

فانا - الصلاة علي النبي - عملت كده وكتبت في ورقة زي ما قال وحددت كده.. مش هقدر اوصف ليكم شعلة النشاط الي اتفجرت فيا بجد .. وحسيت اني عايز اروح حالا ازاكر وبجد مش هتحسوا بي النشاط العالي عالي ده الا لما تطبقوا زي ما د.ابراهيم قال..

طيب ما النشاط ده لازم احافظ عليه، ممكن هيروح مني فعلا بسرعة!
طب اعمل ايه؟؟؟؟؟

فبرده الدكتور قال لازم يكون في تخطيط لكل اهدافك، اعتبر ان هدفك دلوقتي هو انك تزاكر وتنجح بمجموع عالي -ان شاء الله-
والتخطيط ده حاجة برده مهمة بالنسبة للاستراتيجيات المذاكرة

ندخل بقي علي المهم دلوقتي
فانت مثلا عندك عربي وكيميا او فيزيا مثلا -انا اصلا ازهر فمش علي علم بالعام سوري-
فهتيجي مثلا في العربي .. اكيد عندك النصوص والنحو وبقية اقسامه
فتعمل اييه؟
تيجي علي النصوص وتكتب اسماء الدروس كلها بالترتيب وايه الي عايز حفظ والي عايز دراسة ونظرة علي الامتحانات بتاعة النصوص لسنين فاتت وتشوف المهم الي تكرر فيها وتسجلها في دفتر بتاع اسماء دروس النصوص
وتعمل كده في الباشا نحو، وبقية البشوات التنيين
ده بالنسبة للعربي وتلاقي ده برده يتطبق بالنسبة للشرعي لطلبة الازهر

عندك بقي الفيزيا -عمو بوبع-
هو الحقيقة هي مش بوبع ولا حاجة
كل مافي الامر انك مش بعت اشارات لمخ ـك تقوله المادة حلوة وسهلة ولذيذة واديني التركيز الي ازاكر بيه المادة ديه
مش تستغرب من كلمة اشارات للمخ.. يا عم ماالمخ ده بايدك انت ودماغك ديه بتاعتك مش حد تاني بيتحكم فيها غير ان ممكن يكون -ابليس معاك في طرف
هديك مثل يمكن تصدقها،
دلوقتي ماما الله يديها الصحة والعافية حصل ظرف واتاخرت في وقت الغدا، وانت جعان ورحت تشوف جهز الاكل ولا لاءة، ولقيته لاءة .. ماما هتقولك استني شوية بس هو قرب ينتهي، فتصبر شوية وممكن تتشغل بحاجة تانية لحد ما يجي الاكل
هي ماما الله يخليها كانت بتكلم مخك الي بيبعت الاشارات لبقية الجسم..جسمنا كله اشارات بتتبعت لبعضها، فلو انت قعدت تقول انا عايز اكل دلوقتي دلوقتي لازم مش قادر.. لايمكن هتنسي الجوع، لو قلت كل شوية كده

واهوه لينا تلات وجبات في اليوم، وروح جرب
المهم بقي عشان مش نروح بعيد بيك

فَـ ازاي ازاكر فيزيا عدل ومش انساها -خلصنا من القلق ^-
انت هيكون عندك خمس ابواب علي ما اعتقد او حسب منهجك كام باب
الخطوة الاولي:
هتجيب ورقة وتقسمها جدول وتعمل ايه
الخطوة التانية:
هتقسم الي: مفاهيم-التعليلات-رسومات-قوانين-تجارب-اسماء العلماء-ملاحظات (متهيألي وكمان المقارنات)
وعندك في الجانب تكتب الباب الاول الثاني وكده
الخطوة الثالثة:
هتكتب عندك في خانة المفهوم في الباب الاول كام مفهوم عندك وكام قانون وكام تجربة وكام رسمة وكام تعليل وكام اسم عالم وعندك الملاحظات اكتب فيها ملاحظاتك
الخطوة الرابعة:
هتجيب ورق ابيض سادة وتعمل حاجة اسمها " الخريطة الذهنية "
مثلا عندك خمس مفاهيم هتعمل في نص الورقة دايرة وتكتب عليها مفاهيم الباب الاول مثلا، وتعمل تشعبات كده من الدايرة زي فروع الشجر، وتكتب مثلا في دايرة خارجة من الدايرة الي في النص تعريف مثلا الموجة وتكتب التعريف وتعمل عليها بيضاوي الشكل مثلا
وممكن تعمل بقي شكل علي هيئة موجة مثلا او هيئة التعريف ده لو بتحب تزاكر بالرسم او انك فنان رسم،تفننوا فيها بقي زي مثلا ورق شجر والفرع بتاعه وممكن تاخدوا فكرة اكتر بالصور في محرك البحث جوجل"الخريطة الذهنية"

معلومة: الخريطة الذهنية ديه زي الخلية العصبية في الاحياء فاحنا بنعمل الخريطة ديه علي هيئة الخلية العصبية عشان نوصلها للمخ بالضبط واحنا عندنا ملايين الخلايا منها الحمد لله

هتطبق الخطوة الرابعة ديه علي الرسومات والتعليلات والقوانين والتجارب وكمان اسماء العلماء
خلبالك في القوانين بيكون في تشعبات للقانون الاصلي فبرده مش تنسي تكتبهم
هيكون عندك في الاخر كده كل باب ليهم حوالي خمس او عشر ورقات علي حسب تجميعك للمفاهيم والتعليلات ....
والافضل انك تحط المفاهيم كلهم في مكان واحد يعني في ورقة واحدة، وتمشي بالرسم في الخريطة الذهنية بالمفاهيم من اليمين للشمال عكس عقارب الساعة في المفاهيم... مش عندي فكرة عن السبب بس يمكن يكون ليها سبب اقدر اعرفه منكوا

الخطوات الي فوق الاربعة دومت يطبقوا برده علي الكيميا وكمان الاحياء بتصرف لاني مش اعتقد الاحياء فيها قوانين

وبالنسبة للرياضيات
انت عندك تفاضل وحساب مثلثات وممكن ميكانيكا والجبر طبعا
اهم حاجة في الرياضة انك لازم تعمل رياضة دايما لمخك عن طريق الاسئلة الي تحلها كتير بافكار مختلفة
ولازم تشوف برده امتحانات السنين الي فاتت ايه المتكرر لان في اجزاء في المناهج الدراسية مش يقدر يطلعك السنة الي بعدها الا لما تكون انت فاهمها كويس فعشان كده خد بالك
اما انا بالنسبة ليا في الرياضيات
كنت لما يكون الدرس مش داخل دماغي وتاعبني كنت بروح علي الاسئلة المحلولة واشوف حلها والاسئلة الي مش محلولة ساعات بتتحل في جزء الاجابات الي ورا وكمان المحلق الخاص بالكتب الخارجية
والانجليزي:
عندك كلمات الدرس والجرامر لازم تتمرن علي الجرامر الي في الوحدات بالاسئلة وممكن كمان تعمل خريطة ذهنية لكلمات الوحدات
وعندك كمان القصة فانت تعرف السؤال والجواب بتاع كل فصل فيها وتحاول تفهمهم وبعدين تحفظ مش تحفظ من غير فهم كده مش صح..(ممكن تعملوا خريطة ذهنية لاسئلة القصة برده )

اخر النصايح:
* لما تيجي تزاكر مش اول ما تيجي تزاكر تبدا بحفظ وتسميع وكده لاءة وحدة وحدة علي المخ مش اول ما تيجي تعرفه بالكتاب يشدوا بعض، لانك هتلاقي نفسك مش قادر تحفظ ولا تسمع وتتضايق وممكن تروح تنام وتسيب المزاكرة واحنا مش عيزين كده طبعا
وممكن تبدأ بمثلا رياضة،
اول مثلا لو لازم بقي تبدا حفظ وكده انك تقرأ الفقرة الي عايز تحفظها اكتر من مرة، المرة الاولي تقراها وكانك مش بتحفظ ولا بتزاكر، وعشان المخ ياخد علي شكل الفقرة عشان تتحفظ، وتيجي بقي وتكمل بقية الفقرات بعد ما تخلص الفقرة الاولي خالص

*حاول لما تيجي تزاكر شيل من دماغك " السلبيات"
السلبياتاما تيجي تقول مش قادر مش عارف مش قادر احفظ والكلمات المحبطة ديه(متهيالي عشان برده منبعتش اشارات غلط لمخنا )

*عندك اوقات برده مهمة سدقني جربها وهتلاقي برده عندك نشاط ذهني زي وقت الساعة 3 بالليل او قبل الفجر بساعة ، كمان عندك بعد الفجر علي طول، بعد العصر
اوقات بجد مذهلة جدا لو جربتها .. هتلاقي فايدة هايلة فعلا

*اهم نقطة في كل الكلام الي قلناه النقطة ديه
وديه عن الجزء الروحاني
لازم تكون قريب من ربنا اوي مش بس عشان المزاكرة وتنجح وبعد كده هات يا عم السماعات والدي جي
عندك لازم تحافظ علي الصلاة في وقتها وانا بالنسبالي كنت بستغفر ربنا 100 مرة قبل ما ازاكر وكانت ليها برده نتيجة معاية (في ناس قالولي ممكن 500 مرة لو مجبتش معايا 100 نتيجة)
100 يعني .. زي ما بتقول التسبيح والتكبير 33مرة، اعمل 33+33+33 هيديك 99 وزود واحد وبكده تكون خلصت ال 100
حاول تطبقها وخلبالك الشيطان هيعقد يقولك لاءة بس عشان ده في مصلحتك

*خد بالك من نقطة كنت قريتها قبل كده انك كل ما تيجي تكسل تعمل حاجة افتكر ان الحاجة ديه كانت هتكون مفيدة ليك ولمصلحتك عشان كده الشيطان صدك عنها،
يعني مثلا كتير لما نقول اه لو كنت كلمته وقولته كذا مكنش حصل كده .. هو ابليس صدك عنها عشان اكيد في مصلحتك
زي مثلا لما تيجي برده بعد صلاة الصبح وتبقي عايز تصلي ركتين سنة وتكسل، ده بيبقي اكيد ابليس مش عايز الخير ليك طبعا مش عايزك تاخد حسنات اكتر خالص

*واخيرا مش تزعل ماما وبابا عشان " يا بركة دعا الوالدين " وربنا يرضي عليك

ملحوظة مهمة نختم بيها ..
لو انت في علاقة حب او خطوبة وكده، لازم توقفها شوية لحد ما تخلص دور الامتحانات او اوقات المزاكرة
لو مش قدرت توقفها شوية مش تقطعها ابدا مش بقول كده ، ممكن تحاول تقللل منها بس عشان بتاخد من تركيزك وابعد عن السرحان

اخيرا عايزك تتخيل حياتك في المستقبل لما هتكون ددكتور او مهندس او اي مهنة انت حاببها وربنا راضي عنك والناس مبسوطة منك وبالذات ماما وبابا فرحنين ليك
اتخيل كده لمدة خمس لعشر دقائق بس
وامشي علي الاقل في الفترة التفكير ديه كتنشيط رياضي

----- ممكن تدخلوا علي اليوتيوب وتكتب في البحث " المذاكرة، نصائح، استراتيجيات المذاكرة، " وكده وتابعوا الفقي علي اقرا يوميا بيجي، كمان دوري علي نصايح اكتر علي الجوجل

ومعلش لو طولت عليكم، بس انا عندي نصايح كتير ده الي جالي في تفكيري دلوقتي، يارب تكوني فهمتوني والكلام يوصل للطلبة كلهم ويفيدكم يارب
أرق سلاماتي ليكوا

واآلسَـلَامُ عَـلِيـكُـمْ ورَحمةُ اآللهِ وَبَـركآاتُـه
طَيَـب اآللهُ أوقَـآأتَكمْ بِـ كُـل خِـيرْ ^_"^

بس خلص كده الموضوع
الكلام في الاقواس بالبرتاني ده انا الي كتباه
بجد تعبت في التنسيق فيه كتير ويارب يفيد

سلام عليكم ورحمة الله وبركاته