نصائح ذهبية في الفيزيا للحصول علي اعلي درجة

[theprincemoh]

بسم الله الرحمن الرحيم
ملحوظة:الموضوت طويل ولكن للي يهمه الامر فقط
بأذن الله اقدر افيد الناس الجديدة في حكاية الفيزيا اللي عامللهم مشكلة دي
السنة دي حوالي ٥٠٠٠ واحد جابوا الدرجة النهائية في الفيزيا
ليه متكونوش منهم ؟
طب انا دلوقت هقول المشكلة الرئيسية اللي بتخلينا نجيب درجات وحشة فيها
ان انتوا بتكرهوها
طب ليه؟
الفيزيا من اكتر المواد الممتعة في الثانوية لو فهمتها
يعني مثلا
انا كنت بعشق طريقة التفكير في الفيزيا وخصوصا الكهربية
واللي عليها معظم الامتحان
حاولوا تدوروا علي مدرس يشرحلكوا الفيزيا بجد ويحببكوا فيها عشان عامل مهم جدا
وانصحكوا تدوروا علي شرح (محمد عبد المعبود) فيزيا ٢٠١٣
ثانيا : بتذاكروها غلط تماما
يعني الاقي ناس تفتح الدرس تقراه مرتين وبعدين تقعد تحل بالساعات مسائل كتير جدا
وللاسف كل ده وقت ضايع في الفاضي
عندك ٤٤ درجة من اصل ٦٠ درجة للنظري مش للمسائل علي فكرة
يعني اللي انت بتحله ده كله اقل من تلت الدرجة وسايب باقي ده كله
لو حليت امتحانات سابقة (باستثناء ٢٠٠٨) هتلاقي ان مفيش مسائل صعبة
لو عارف القانون هتحل
المشكلة كلها في النظري والمتعة كلها فيه كمان
فارجوكوا متضيعوش وقت كتير في المسائل علي حساب النظري
عايزك تسيب المسائل دي اخر حاجه
ثالثا ازاي تذاكرها من الالف للياء
طبعا انا عايز اشير لنقطة هنا في كل المواد
اكيد سمعتوا عن ناس كانت بتذاكر ساعات كتير جدا ومجابتش مجموع وناس كنتوا بتشوفوهل بتلعب وجابت مجموع
طب ايه المشكلة ؟
الاجابة
مذاكرة غلط + سرحان + عدم تركيز
يعني في الفيزيا متجيبليش ورقة وقلم وتقعد تحفظ التعليلات والمصطلحات وتكتب كل واحده خمس مرات عشان تحفظها
للاسف ده وقت ضايع بالهبل في شيء يمكن انجازه في ثواني
المهم يعني
ازاي نذاكرها بقي من اولها لاخرها؟
نيجي لارخم جزء وهو التعليلات
بسيطة جدا
لو فاهم الدرس بجد مش هتحفظ ٧٠٪ من التعليلات وهتكتبها انت اجابة نموذجية ١٠٠٪ من خلال حفظك (الاعتماد هنا علي شرح المدرس واستيعابك للدرس)
وهيتبقي حبة تعليلات كده رخمين اجابتهم بتبقي شبه غير منطقية هنضطر نحفظهم بس مش بورقة وقلم
انا عايزك تقراهم بصوط عالي شوبة بنفسك
حاول اشرحهم لنفسك
اقراهم اكتر من مرة واكتبهم مرتين
وسيبهم دلوقت وارجعلهم بعد اسبوع اقراهم تاني واكتبهم مرة وهكذا
طبعا علل=بم تفسر= ما النتائج المترتبة علي (في نفس طريقة المذاكرة) وعليهم جزء مش قليل من الامتحان من ١٠- ١٥ درجة تقريبا
طيب نيجي للنظري النظري زي مافكرة عمل والاسئلة اللي في الاختياري - برضه ٧٠٪ فهم والباقي حفظ
طب ازاي تحفظ الحاجات دي بسهولة وتفرق بينهم عشان بيبقي في كتير متشابهين وبيخشوا في بعض
احنا عايزين مثلا نربط مابين كل جهاز مثلا وفكرة عمله
زي الدينامو والماتور (مين فيهم حث ومين ازدواج)؟
بسيطة
اللي بحطله بطارية فيهم هو اللي شغال بالعزم
انا لو عارف تركيب اي جهاز هعرف فكرة عمله ولو فاهم الدرس هعرف شرح فكرة عمله
طيب بالنسبة للمصطلحات ؟ بص
نصهم قوانين والنص التاني هتحفظه تلقائيا لما تراجع ع الدرس اكتر من مرة
يعني مثلا عرف الامبير او التسلا والكلام ده بحط القانون واطلع انا التعريف
طيب والقوانين ؟ انا عايزك تحفظ قانون تطلع بيه بقية القوانين اللي معاه عشان ماتتلغبطش وتفتكر بسرعة
زي قانون كمية الحركة للفوتون اقدر اشيل الكتلة واحط بدالها قانون واشيل بعدين النيو واحط قانون الطول الموجي
واحفظه باني اقعد اكتب القانون كذل مرة واطلع منه التفرعات كلها في خلال نص ساعة تلت ايام ورا بعض وانساه بعد كده
المسائل معظمها تعويض مباشر بنسبة ٩٠٪ عشان كده ادي النظري وقت اكبر من المسائل
دلوقت ايه الدليل علي كلامي؟
الحمد لله بدون تفاخر انا الدليل
ماخادتش غير حصة فيزيا واحدة طول الثانوية العامة
وكنت بذاكر لوحدي ودي الطريقة اللي قدرت احقق بيها نجاح في الفيزيا في مدة قصيرة جدا وجبت ٦٠/٦٠ الحمد لله
كل اللي كنت بعمله اقرا الدرس مرتين بعد سماع الشرح من الاستاذ اللي ذكرته في الاول
وبعدين اسمعه تاني وبعدين اقرا الدرس بتمعن وفهم وتركيز شديد وبعدين اسمع الدرس مرة تالتة واخش في الحل علي طول من كتاب الامتحان ولازم تقروا الدرس بعد فهمه مرة علي الاقل من كتاب المدرسة
وبس كده
هنالك بقية للمواد الباقية ولو حد شايف اي
خطأ في اللي قولته ينبهني
واي استفسار
انا موجود