هل للازهر سلطة على صفحات او مجموعات الفيسبوك؟

[attic]

الازهر طلب غلق صفحات التواصل الاجتماعي على الفيسبوك وكلنا عارفين اهمية هذه الصفحات والمجموعات في افادة المدرسين بالاخبار والمنشورات والخبرات وما الى ذلك، السؤال: هل في عقوبة على مديري الصفحات والمجموعات دي لو استمرت خصوصا انها لا تدعي انها صفحات رسمية؟ طبعا لا والموضوع لا يتعدى زوبعة في فنجان والاستجابة لها هو اللي اداها اكبر من حجمها

انا ملاحظ ان بعض الصفحات اتقفلت والبعض اسمها تغير بدون سبب واضح وانا شايف ان طلب الازهر بقفل الصفحات امر غير موضوعي او منطقي ومش من حقه يطلب مثل هذا الامر لان الفيس مجاله واسع واللي عايز يقدم معلومة او خبرة او استشارة يبقى كتر خيره وبرضه مفيش قانون او مادة في الدستور مثلا تجبر ادمن صفحة او جروب انه يقفلها طالما لم تقدم اشياء مبتذلة او تحض على الكراهية بالعكس دول ناس بيخدموا زملاءهم وبيستقطعوا من وقتهم وجهدهم لافادة الازهريين دون مقابل فقط لوجه الله

لذلك اناشد مديري هذه الصفحات والمجموعات الازهرية بعدم الاستجابة لهذا الطلب المتعسف واضاعة جهودهم العظيمة السابقة هباء منثورا لمجرد نداء ليس له قيمة لان الموقع الجديد بتاع الازهر لن يقدم جديد ومش هيلبي احتياجات المعلمين ولو حتى بنسبة واحد في المية وكلنا عارفين كدة كويس، والاهم من كل ده انكم لو قفلتم طاقات النور والمعرفة مش هيعدي اسبوع وهنلاقي صفحات ومجموعات جديدة هتقوم بدوركم وتقدم خدمات بديلة خلال ايام قليلة

التواصل والافادة وتبادل المعلومات مش حكر على حد او صفحة او موقع بعينه وشكرا