إنتى جاية إشتغلى إيه؟

[حسين هدهد]

إنتى جاية إشتغلى إيه؟

بقلم د. غادة شريف ٢٥/ ٨/ ٢٠٠٩هل تذكر عزيزى القارئ المسرحية الشهيرة «إلا خمسة»؟ ماذا لو قلت لك إننى أمتلك النص الأصلى لها المختلف تماما عن النص الذى نعرفه؟.. طبعا أنت كالعادة لن تصدقنى.. معك حق.. فأنت لا تعلم أننى من المنقبين عن التراث.. وأنا أيضا عندى برنيطة وقعت عليها اسمى وأعطيتها هدية لأوباما..
المهم نعود لموضوعنا.. النص الأصلى الذى وجدته لهذه المسرحية يختلف عن الذى يعرض حاليا فى مشهد واحد فقط.. وهو المشهد الشهير بين مارى منيب وعادل خيرى، حيث كان الأخير يجرى إنترفيو للعمل «سواق» عند الهانم التركية مارى منيب.. فى النسخة المعدلة كانت مارى منيب تسأله السؤال الشهير: «إنتى جاية هنا إشتغلى إيه؟» فكان يجيبها: «سواق والله العظيم سواق».. أما فى النسخة الكنز التى اكتشفتها ﻓﺈليك منها عزيزى القارئ النص الأصلى لهذا المشهد:
يدخل عادل خيرى المسرح وتطل عليه الهانم من الشباك وتبادره سائلة: «إنتى جاية إشتغلى إيه ؟».
- وزير يافندم.
- إنتى جاية إشتغلى وزير! وزير إيه؟
- وزير خارجية يا هانم.
- أها.. إيفيت إيفيت وزير خارجية.. يعنى إيه وزير خارجية؟
- يعنى علاقات وحركات مع بلاد تانية يا هانم، جود مورننج جود نايت.. كده يعنى.
- أهاا.. يعنى إنتى تعرفى تنقذى صيادين مصريين من قراصنة صوماليين؟
- وننقذهم ليه يا هانم؟ ما كل صياد عنده أبوه.. والسح إدح إمبو المخطوف ينقذه أبوه.
- إنتى كده مش وزير خارجية.. إنتى وزير أحمد عدوية؟
- عدوية إيه يا هانم.. خارجية.. والله العظيم وزير خارجية.
- أها إيفيت إيفيت.. افتكرت، افتكرت.. طب إنتى تعرفى تنقذى مصريين من جلد كرباج فى بلاد سعوديين؟
- وننقذهم ليه يا هانم؟ دى حتى لسعة الكرباج ناعمة وقوية وكلها حنية
- إيه ناعمة وحنية دى؟! إنتى وزير ملابس داخلية؟
- ملابس داخلية إيه يا هانم .. وزير خارجية.. جود مورننج جود نايت.
- افتكرت.. افتكرت.. بس إنتى كل حاجة كده تحصل لمصريين انتى ما تتحركيش؟ إنتى جاية هنا إشتغلى إيه؟
- وزير يا هانم.. والله العظيم وزير خارجية.
- إيه خارجية خارجية.. عملتى إيه فى خارجية؟ تنقذى صيادين يوك.. تمنعى جلد مصريين يوك .. تاخذى حق مصريين يتقتلوا بره يوك.. إنتى أحسن حاجة تعمليها تاخدى تفسحى الكلبة زكزوكة ويبقى اسمك عبده.. تعرفى تغنى للكلبة يا عبده؟
- طبعا يا هانم.
- أنا برضه قلت كده.. إنتى أكيد مش وزير خارجية.. إنتى جاية إشتغلى إيه؟

[بروف انس]

هو فعلا مينفعش غير ان يفسح زكزوكه ماله ومال المصريين كفايه عليه زكزوكه بس يارب ميفشلش في المهمه دي كمان