هو انا اتجننت ولا ايه؟

[bosy .. mostafa]

بسم الله الرحمن الرحيم
السلام عليكم و رحمة الله و بركاته
انا بقى موضوعي النهارده مختلف شويه .. و جايز كمان يكون مكانه اجتماعيات طالب مش هنا كمان
تعرفوا فيه ناس كتير في حياتنا موودين (يعني ناس مزاجيه .. مزاجهم متقلب بمعنى آخر)
بس بقى انا كتير بسأل نفسي (هو انا اتجننت ولا ايه؟؟ )
هتقولوا لي ايه يا بوسي ليه بتسألي كده
اقولكم انا
يعني مثلاً اكون في فرح
رقص و هيصه و مبروك و لولولولولي و عريس و عروسه و ناس منفوشه :D
فجأه كده انا وبدون سابق إنذار ..
اسيب القاعه و اطلع بره و اقعد لوحدي و مش طايقه حد يكلمني ..
و انكد على اللي حواليا و ابوظ لهم اليوم ..
بلاش في فرح
في المصيف مثلاً .. حاجه حلوه اهي
بحر و رمله و هوا و آخر روقان ..
فجأه الاقيني عايزه اقعد لوحدي و مخنوقه و مش برد عالموبايل على حد ولا ليا دعوه بحد و انكد على اللي حواليا كلهم .. و على نفسي أولهم و ساعات الحاله بتوصل لإني بعيط

ليه و عشان ايه ولا ايه اللي حصل ؟؟؟ ولا حد يسألني لإني مش ببقى عارفه ..

أسكت خالص و مش أكلم حد و لا ليا دعوه بحد .. زي ما يكون فيه مشكله حصلت او مصيبه وقعت فيها و مش راح اطلع منها بسهوله !!
و أي حد يكلمني بصده و ابقى مش طايقه نفسي حتى !!
و انزل اتمشى في الشارع لوحدي .. و اصحابي يحاولوا يكلموني بس محدش عارف يوصلي

و فجأه برضو تلاقيني مبسوطه اوي و آخر فرحه و هيصه
و اي حد يكلمني اقعد اضحك و اهزر معاه زي ما يكون فيه حلم حققته كنت بحلم بيه من زمااان
و مش ببقى عايزه أبطّل ضحك ..
لدرجة ان مره واحده صاحبتي لاحظت عليا الحكايه دي و قالت لي (أيه يا بوسي , هي الحاله جت ولا ايه ؟ قاعده تضحكي و اخر روقان .. امال ايه الإنقلاب اللي كنتِ فيه من شويه ده .. يا مجنووونه)
و بلاش اكمل لكم بقية الحوار .. خلينا نقف لحد مجنونه دي :D

أنا بقى نفسي اعرف ايه يعني ..
مره ابقى نكد و انكد عاللي حواليا كلهم و اسمع اغاني حزايني و سابني وراح و ضاقت بيك و حاجات كتيره
و ساعات بعيط من غير سبب ..
و مره تلاقيني فرحانه اوي و ماليه الدنيا ضحك و هزار و اسمع اغاني فرايحي بقى و الليله ليلتك يا معلم و حاجات من هذا القبيل
تفتكروا ده جنان ولا ايه .. ؟

عايزه بجد الاقي حل قبل ما اللي حواليا يقولوا اني مجنونه فعلاً , و يسلموني للعباسيه :D
و ربنا مايرزقكم بحد موودي زي حالاتي .. كل دقيقه بحال