هام جدا الطب حيمزل و الهندسة حتطلع2009

[eng--zako]

اولا السلام عليكم و رحمة الله وبركاته انا احمد من دمنهور جيبت الحمد لله 91.2 علمي وكنت محتار بين ادبي و رياضة بس هما في البيت عاييزين رياضة لانهم شافو ان الهندسة 2008 واخدة 91.09 وانا لسة ما ختش درجة مستوي متوقعين اني لو شديت حجيب هندسة فقلت اعمل شوية احصائيات و اقلهالكو دلوقتي اللي جايبين فوق 90.2 في سنة تالتة اللي دخلو كليات السنادي عددهم 57 الف تقريبا(علمي علوم + رياضة + ادبي) بالنسبة لي السنة السابقة 81 الف بينما طلاب تانية الحاصلين علي 90.2 فاكثر 59.5 الف طالب بالنسبة لي 82.5 الف طالب تقريبا المعلومات ديه كنت جايبها من احصائيات المواد من موقع www.nemra1.com دلوقتي المهم ان لما كان في 57 الف طاب يتصارعو علي كليات القمة مثلا الهندسة اخدت من 91.09 و الصيدلة 95.3 و هكذا بينما في تانية 59.5 الف طاب بزيادة بسيطة و من المتوقع ان الامتحانات لو جت متوسطة حيكون التنسيق متشابه تقريبا لكن من وجهة نظري حيحصل قلبان في التنسيق و ياريت تفهموا و جهة نظري و تردوا عليا و تقلولي ارائكو (لاحظت من اول شهر 8 ان اللي داخلين رياضة بالهبل من 80 لي 99.5 معظمهم رياضة (من وجهة نظري ومن محادثات شخصية مع اصحابي اعتقد ان الشخص اللي جايب 97 او 98 داخل رياضة لانه يوم ما يقع في الفزياء يجيب الهندسة ده حتي في مجموعة درس الفزياء الاستاذ قال اللي رياضة يرفع ايده كل المجموعة رفعت ما عدا 3 تقريبا احياء و قال ان الهندسة حتولع و انا كنت بفكر في الموضوع ده من زمان و الادبي بقي مفيش خالص اللي فوق 90 فانا متوقع ان الهندسة تطلع 95 و كليات الطب توصل لي 94 ياريت الكل يقولي رأيه و ايه الحال في محافظتة و هل في نفس الظاهرة و لا لأ عشان ده موضوع مهم جداااااااااااااا

[طالبة 2 ثانوى]

انا جبت 86.5 فى تانية وكنت عايزة اكمل علمى رياضة علشان ادخل حاسبات ومعلومات
لكن غيرت رايى وقلت احول ادبى احسن واريح دماغى وادخل اداب اعلام ان شاء الله
على فكرة وجهة نظرك دى اعتقد انها ممكن تكون صح بنسبة كبيرة
فعلا كل اللى جايبين 90 او حتى حاجة و 80 بيفكروا يكملوا علمى رياضة فلازم هيرفعوا التنسيق السنة الجاية لان العدد اللى عايز هندسة وحاسبات اكبر بكتير من احتياجات الكلية

[samar_2010]

هو ممكن التنسيق يعلى بس فى حالة واحدة ان الامتحان يجى سهل
و دى بيتهيالى حاجة مستحيلة بالنسبة لامتحانات الرياضة السنة اللى فاتت

[bosy .. mostafa]

هو التنسيق اتوقع انه راح ينزل
سنه تانيه السنه دي دفعه فاشله
قليل اوي اللي جايبين فوق 95
و نسبة النجاح 62
بس يارب يكون توقعك صح ......
و ان شاء الله ربنا يوفقك للي فيه الخير

[samar_2010]

كده يا بوسى هو انتى عشان عايزة الطب ينزل!!!!!!!!!!!!!!!
طب قولى يارب الطب والهندسة ينزلوا راعى شعورنا

[ندى رامي]

كتير جدا من اللى اعرفهم حولوا رياضة 2 بس كتير برضة كملوا علمى علوم

[Dr|shereen]

ياياريت الطب والهندسة ينزلوا عشان كلنا نحقق احلامنا

[fathy 90]

بس من الطبيعى كل سنة ان عدد علمى رياضه بيبقى اكتر من علوم لان فى ناس مبتحبش طب وصيدله كتير ومجموع الهندسه بيبقى اقل من صيدلة وطب

[* dr.sara*]

يا جماعة متعتمدوش ع التوقعات دى اعملوا اللى عليكوا وخلوا الباقى ع ربنا

[السمراء]

مفيش حاجة اسمها ينزل ولا يطلع اهم حاجة ميولك ايه.....هدفك ايه ده المهم......................لكن لوعلشان النزول والطلوع ادبى فى نظرى مش ليه اهمية وانا كنت بحب احياء جدا علمى علوم يعنى حاسة ان مجالا ته واسعة جدا يعنى عندنا فى المنصورة كتير لو ملحقش حاجة فى علوم بيدخل معهد فنى صحى لذلك تلاقيه المحافظة الوحيدة المرتفعة لو نزلت قوى تدخل معهد تمريض او بصريات...........اقصد ده اللى انا فهماه انى بحس ان رياضة مفيهاش غير هندسة وحاسبات ونوعية قسم حاسب يعنى لو فلت مفيش حاجة بعد كده.....................واخيرا اهم حاجة هدفك وطموحك

[perfect-girl]

انا معاك فى موضوع الطب حينزل وده لان دفعتنا دفعه فاشله
لكن الهندسه تطلع ده صعب احسبها معايا
السنه الى فاتت كل شىء فيه رياضه جه صعب
رياضه واحد واتنين واحصاء فالاكل داخل متعقد من الرياضه
وكمان الى زود الموضوع ان الصيدله اخدت 95 فالاكل له طموح
لكن اتوقع انها تترتفع اكتر من السنه دى
لكن بمقدار معقول
ومتنساش ان الفيزياء مش سهله لكنها مشتركه بين المجموعتين
فالموضوع كله على الرياضه يعنى لو الامتحانات جت سهله فالطب 97 وفيما فوق
لكن الرياضه ربنا يستر
وعلى العموم ربنا يسهلنا كلنا