::: فانوس ومنور:::(( المسابقة الرمضانية ))

[سيلفانو]

فانوس ومنور على باب بيتنا
زينه اتعملت ب محبتنا
وانوار ماليه سقف حارتنا
وطبق حيران طول رمضان
من بيت جارنا وراجع بيتنا


وعم صبرى المسحراتى
كل ليله يعدى يوماتى
ويفضل طول الليل بيهاتى
بعصايه وطبله راجل غلبان
صوته بيزود فرحتنا

شهر وهل هلاله علينا
والفرحه تبان بقدومه فعنينا
وكل الناس مبسوطه حوالينا
*يتصالح فيه زعلان غضبان
ولا فى مكان غير لمحبتنا

شهر الصايم شهر الذاكر
شيطان متسلسل لينا مش فاكر
والمسلم قايم ليله وشاكر
ساجد طالب رحمة وغفران
وامان يملا كل حياتنا

زكاة واتفرضت على كل قادر
رايحه للى فالدنيا معافر
*وربك ليا وليك اهو غافر
ومحدش فينا معاه خسران
ورافعين ايدنا ليه بدعواتنا

قرأن ونزل فليله قدر
ليله بكل ليالى العمر
ليله خير من ألف شهر
واهي بردو من ليالى رمضان
وفيها متتردش دعواتنا

شهر التوبه والاحسان
شهر ميعرفش الحرمان
طول ما فى مسلم انسان
حاسس باخوه الغلبان
نعيش بفضل الشهر وكرمه
اللى باينه فى حروف اسمه
ر.... رحمه من الرحمن
م.... مودة من الحنان
ض...ضمان للجنة بصيام مضان
ا.... امان وطالع بيه كسبان
ن.... نور من ربك المنان


فانوس ومنور على باب بيتنا
زينه اتعملت ب محبتنا
وانوار ماليه سقف حارتنا
وطبق حيران طول رمضان
من بيت جارنا وراجع بيتنا

:::mrnoor :::