حوار بين البمب والمبمبن

[vivre1]

- انت عارف يا عباس .. انا قلبي بيتقطع على الشباب اللي في السجون دول .. خسارة عمرهم يضيع كده .. والله زي ما بقولك كده ..
= قلبك كبير يا ريس ..
- بس هنعمل ايه .. دا قدرهم اللي ربنا كاتبهلهم من يوم ما خلقهم .. ايوه .. ربنا كاتب لكل واحد في الدنيا دي نصيبه ومشوار حياته من يوم ما اتولد .. يعني دي حاجة مش بايدينا احنا بنفذ ارادة ربنا ..
= ربنا يزيدك ايمان وتقوى يا ريس ..
- هو صحيح يا عباس السجون زحمة اوي كده زي الاعلام ما بيقول ؟
= ابدا يا ريس دي مبالغات عاوزين يشوهوا صورة البلد ..
- ولو يا عباس .. الدنيا حر وممكن الزحمة دي تأثر على صحة الولاد .. دول مستقبل البلد يا سيادة اللوا .. اناعاوز الواحد منهم لما يطلع من السجن بعد عشرة خمستاشر سنة يطلع بصحته وعافيته عشان يقدر يفيد البلد ويكون اسرة ويفتح بيت ............... ابنوا سجون زيادة يا عباس عشان تخففوا الزحمة عن ولادنا .. انت متعرفش الحديث بتاع سيدنا النبي " من فرج عن مؤمن كربه من كرب الدنيا .. فرج الله عنه كربه من كرب يوم القيامة " ..
= احنا فعلا يا ريس ماشيين في الاتجاه دا .. وبفضل الله وتوجيهات سيادتك احنا بنينا خمس سجون في التلات سنين الاخيرة منهم سجن الجيزة المركزي اللي مصنف اكبر سجن في منطقة الشرق الاوسط وتكلفته وصلت مليار جنيه ..
- انا ميهمنيش الفلوس يا عباس .. اهم حاجة راحة ولادنا وشبابنا .. دول ثروة البلد الحقيقية وهما اللي هيعملوا الفلوس لما ربنا يكتب لهم خروج ان شاء الله ..
= ربنا يديك على قد نيتك يا ريس .. ويجزيك خير عن اللي بتعمله للبلد ..
- الحمل تقييييييل اوي يا عباس .. وانا خايف اقابل ربنا ويقولي موسعتش السجن الفلاني ليه يا عبدالفتاح .. او مخففتش زحمة السجن العلاني ليه يا عبدالفتاح ؟ هقوله ايه ساعتها يا عباس ؟ .. احنا مسئولين عن ارواح الناس دي لحد ما نسلمهم لايد ربنا سبحانه وتعالى ..
= والله يا ريس انت لك الجنة ومن غير حساب ..
- يا رب يا عباس يا رب ..

يا سلام على الحنية.....يا سلام الانسانية