كيف تراجع لطلاب الثانويه العامه؟

[مستر/ عصام الجاويش]

بما ان منتدانا اكبر منتدى تعليمى والهدف منه تبادل الخبرات ارجو ان يتفاعل كل الزملاء مع هذا الموضوع . باقى 3 شهور على الامتحان كيف ستراجع المنهج كله لطلابك فى هذه المده ؟

[جوفاني]

نشوف الوحدات اللي القواعد متشابهة و نراجعها و نعمل امتحان كامل عليها

[ا/مدحت طوسون]

من وجهتى نظرى دى أفضل طريقة للمراجعة واحب اعرف رأيكم فيها:
1-عمل امتحان شفوى ثم تحريرى ع كل 3واحدت وفصل من القصه
2-وبعد الانتهاء من المنهج جمع كلمات خارج المنهج تخص سؤال الspeaker والترجمة والأحداث الجاريه والعامه والتأكد من حفظ الطالب لها .
3-اذا كان الطالب ضعيف في فرع معين من الماده ياخد اسئله تخص هذا الفرع بكل الطرق يعنى لو مثلا ضعيف في القواعد ياخد اسئله تخص القواعد ع المنهج كله ولو ضعيف في الكلمات هكذا لو ضعيف في حروف الجر والفريق اللغوية وهكذا اما لو معندوش القدره ع التعامل مع سؤال معين زى سؤال mistake ياخد اسئله منه ع المنهج كله.
4-امتحانات وكل غلطة يقع فيها الطالب يتراجعون فرعها كله في الوحده او الفصل لو قصه أو الكلمات لو خارج المنهج

[محمد محمود بدر]

جزيل الشكر والتقدير لحضرتك

تسجيل متابعة

جزاكم الله خيرا وبارك الله فيكم

[ahmedbadra]

المراجعة اكيد بتختلف من معلم لأخر ومن طالب لطالب تانى
ولكن ممكن اوضح لحضراتكم طريقتى فى المراجعة مع الجيل اللى معايا حاليا وده اكيد مش قواعد للمراجعة ولكن اكيد كلنا بنستفيد من بعض: بعد ما انتهينا بفضل الله من المنهج من كتاب المعاصر بنشتغل من كتاب جيم (المراجعة)
ممكن نعمل حصتين فى الاسبوع للطالب بدءا من شهر فبراير...(نخلى واحدة مهارات وواحدة مراجعة جزئيات).
ويكون فيه هدف معين يوصل اليه الطالب بنهاية شهر 5
والهدف اللى يخص حصة المهارات كالاتى:
ان بنهاية شهر 5 يكون الطالب تم تدريبه على كل اسئلة المهارات كالاتى :ودى ارقام حتختلف طبعا من حالة لغيرها)
*500 speakers
*100 comprehension
*500 translation
*300 situations
*50 paragraphs

بنقسم حصة المهارات بما يتماشى مع مستويات الطلبة الموجودة.
فى كل حصة من حصص المهارات نعمل تشكيلة من الاسئلة المهارية وندرب عليها الطلبة.
مثلا
1-حصة المهارات ممكن تكون ساعة فقط .....ناخد فيها 15 الى 20 جملة ترجمة من امتحانات مصر السابقة.
2-فى نفس حصة المهارات ممكن نشتغل فى 20-30 جملة مواقف.
3- برده ممكن ندى فى حصة المهارات 2 او 3 براجرافات عن موضوعات عامة مشهورة من واقع امتحانات سابقة.
5- ممكن برده فى حصة المهارات نشتغل فى 3 او 4 قطع فهم من امتحانات سابقة والهدف هو التدريب عليها وما نسيبش الطالب يحلها فى البيت وخلاص .....ضرورى متابعته فى القطع وتدريبه عليها .
6-فى الحصة التالية نعمل امتحان للطلبة فى نفس الحاجات اللى خدوها فى الحصة اللى فاتت بقدر المستطاع علشان نشجع الطالب انه يحل وبعد كده نبقى ننوعله فى الاسئلة علشان ما يعتمدش على الحفظ بس.
7-الحرص على حفظ مجموعة كلمات تخص موضوع معين فى الترجمة من خارج المنهج بقدر الامكان فى كل حصة مهارات وبرده نمتحنهم فى الحصة التالية فى الكلمات دى .
اما بالنسبة لحصة المنهج يفضل ان الطالب يذاكر من بعدى (يعنى ما يسبقنيش) وهى محتاجة ساعتين تقريبا فى الاسبوع وممكن نقسمها كالاتى:
1- ممكن نشتغل ونراجع وحدتين فقط فى الحصة مع شرح الجزئيات الصعبة تانى سريعا.
2- نتأكد ان الطالب مذاكر كلمات الوحدتين كويس ونعمله فيهم كويز صغير.
3- ندى الطالب فرصة انه يراجع نفس الوحدتين من مكان تانى وتكون المراجعة بتاعته فى البيت على هيئة اسئلة زى كتاب جيم المراجعة فى اخره عامل كده او من كتاب دليل التقويم او من كتاب مراجعة تانى.
4- نعمل امتحان للطالب فى الحصة التالية فى نفس الوحدتين بس يكون صغير.

الكلام ده كله ممكن يخلص بنهاية شهر 4 وممكن نخلى شهر 5 كله امتحانات عامة على المنهج كله
يعنى لو شهلر 5 فيه 8 حصص للطالب ممكن يحل فيهم حوالى 80 امتحان....(5 فى كل حصة و 5 فى البيت)
اسف جدا للاطالة ولكنى احببت ان اوضح لحضراتكم نموذج من وجهة نظرى.
علما بأن كل ما سبق هو مجرد أخذ بالسبب ......والله وحده هو الموفق