هام جداااااااااا للطلاب المستنفذين وإللي جالهم كليات أقل من مجموعهم إدخلوا بسرعه

[love_queen_emy]

السلام عليكم ورحمة الله وبركاته
بعد إذنكم يا جماعه لازم تقروا كلامي كله لأنه مهم جدا للي مظلوم في التنسيق اللهم بلغت اللهم فشهد
طبعا يا جماعه كلنا شوفنا المهذله إللي حصلت في تنسيق القادمين من السعودية وأنا مصدقتش إن إللي جايبين أكتر من 100% جالهم إستنفاذ رغبات غير لما روحت النهاردة وشوفت بنفسي أقسم بالله لقيت أب وأم بنتهم جايبه 415 ومكتوبلها مستفذ طب تيجي إزاي مش فاهمه والله شوفت بعيني محدش قالي شوفت إللي جايب 100% و كسور وجاتله كلية دار علوم وهو أصلا مكتبهاش شوفت إللي جاتلوا تجارة وهو 98% والله أنا كنت هناك من حوالي تسعه صباحا إلي الساعه تلاته الضهر وشوفت كل حاجه بعيني يا جماعه والله في حاجه غلط يعني أنا كنت بقول يوم ما التنسيق يعلي هلحق هندسة وملحقتش حاجه خالص أنا مجموعي بالمستوي 409,19
مش صغير يعني علشان حتي ملحقش هندسة وواحده صاحبتي جايبه 98,9 % وداخله هندسة طب إزاي أقل مني وتدخل وأنا لأ ومن ده كتير لو جيتوا وشوفتوا اللي أنا شوفته هتتحسروا علي مستقبل الميات إللي ضاع أحلام الأباء والأمهات والأبناء إللي إتحطمت هتشوفوا الحزن في عيون براعم لسه بتفتح عينها علي الدنيا
وفي الاخر لما الشباب يبقي إرهابي ويورح يسافر بطرق غير مشروعه ويرجعوا جثث نقوله بتعمل كده ليه أنا مش بدافع عنهم بس أنا دلوقت حسيت هما ليه إختاروا الطريق ده لما يكون طالب جايب فوق 99% و100% ويتكتبله إستنفذت رغباتك قوقولي ده يعمل إيه يروح فين ؟؟؟؟ حد يرد عليا يجيب إيه أكتر من كده
بصوا يا جماعه أنا هروح بكره المكتب اللي في القاهرة علشان موضوع الإستفاذ ده وكمان علشان أدافع عن حقي في إني أدخل كلية من كليات القمة هدافع عن تعبي وسهر الليالي هدافع عن حلمي وحلم اهلي وعيلتي كلها هدافع لأخر نفس فيا ومش هتنازل لو إيه إللي هيحصل لو هبات هناك في مكتب التنسيق لغاية ما
يحققوا مطالبي وهي إنهم يساووا بين الطلبه مش واحده جايبه أقل مني وتدخل كليه وأنا لأ
بصوا إللي عايز يدافع عن حلمه سواء جاتله كليه أي كلام أو إستنفاذ يجي بكره من بدري والنهارده جريدة المصري اليوم جت وبكره إن شاء الله التلفزيون هيجي وهنوصل صوتنا لأبعد الحدود أما بقي لو إنت متخلي عن حلمك فخليك قاعد في البيت وإبقي قابلني لو نفعت في حاجه بعد كده لأن إللي يتنازل عن حقوقه و أحلامه يتنازل عن أي حاجه فكروا في كلامي ومستنياكم بكره في مكتب التنسيق إيدينا في إيدين بعض نجيب حقنا وعمر حقنا ما هيجيلنا علي البيت لازم نخرج ونجيبه
أختكم : إيمان
مستنياكم بكره في مكتب التنسيق بالقاهرة