النسيان

ahmedelfangary · #1 23-02-2014, 02:40 PM

النسيان مشكلة بتواجه اي طالب .. بس حلها بسيط
انتا الجزئية او الصفحة اللي مش هتقدر تحفظها تقراها كلها كده
وتبصلها من بعيد وتغمز بعينك الشمال مرتين ورا بعض
ورح سمعها هتلاقي نفسك حفظتها
ايه يا عم انتا .. ده لو عينك كاميرا مش هيحصل كده
مفيش طريقة اسمها كده ولا مكنش حد تعب
المهم .. النسيان علاجه سهل وبسيط .. اهم حاجة تعمل كام خطوة كده ..
1- الاستعانة بالله والبعد عن المعاصي ..
ادعي ربنا وقبل ما تزاكر ادعي ربنا انو يعينك على الحاجات الصعبة
وابعد عن المعصية لانها بتشغلك .. وبما انك في فترة مراهقة
غالبا المعصية دي بتكون عاطفية
وبالتالي هتفكر فيها علطول ..
وعلى فكرة القران ليه اثره في تقوية الذاكرة
2- اكتب ..
ايوه .. اكتب .. لان في الكتابة انتا بتربط بين حاستين
البصر واللمس وحاول تتكلم وانتا بتكت علشان تكون جمعت بين 3 حواس
وبالتالي المعلومة دخلت من 3 اتجاهات وان شاء الله مش هتتنسي
3- التكرار ..
كانو زمان بيقولوا في ابتدائي التكرار يعلم الشطار
ايوه بيعلم الشطار .. لان كتر التكرار وده غالبا بعد الكتابة
هيثبت المعلومة تمام .. ويا سلام لو تقعد تشرح لنفسك
وتقوم نفسك وتسال نفسك وتجاوب نفسك
انا عارف لو حد شافك هيقول ده مجنون رسمي
بس ده هيثبت المعلومة كويس ..
4- الفهم ..
طيب شوف المقولة دي
( اسرع طريق للتذكر الفهم .. واسرع طريق للنسيان الحفظ )
يعني حاول تستوعب كويس جدا .. بدل ما تحفظ وانتا مش عارف حاجة
لانك لو هتحفظ وانتا مش فاهم هتكون بتحرك شفايفك وبس
5- التخيل ..
اكيد هتقولي ده كلام على الورق وكتب البرمجة العصبية
ماشي بس انا لو كنت اعرف ان في حاجة اسمها التخيل وانا في ثانوي
كنت ارتحت كتير .. والله التخيل ده هوا طرريقة الطالب الذكي
ويا سلام لو تخلي التخيل ده مع حاجة مضحكة بحيث يكون تخيل وضحك
لان الحاجة المضحكة صعب انك تنساها ان شاء الله

واهم حاجة انك متحفظش من غير فهم لازم الفهم قبل الحفظ بحيث يكون الحفظ ده تدعيم علشان تزبط الصيغة وكده

الله يوفقكم
دعواتكم