حبيت أحكيلكم يومى إنهارده .. يا ريت تدخلوا

[أسيل رزق]

السلام عليكم ورحمة الله وبركاته

إزيكم يا بنات ويا شباب؟؟

يا رب تكونوا بخير دايماً

أول حاجة الموضوع مالهوش علاقة بالعام خالص بس .. أستسمح حضرات المشرفين يسيبوا الموضوع فى القسم يوم واحد بعد إذنكم

أنا عايزة أحكيلكم يومى إنهارده يا جماعة

بجد يوم أكثر من رائع .. أول مرة أحسن إنى بنى آدمة بجد

قال رسول الله صلى الله عليه وسلم " إن لله عباداً إختصهم لقضاء حوائج الناس وحببهم فى الخير وحبب الخير إليهم " صدق رسول الله صلى الله عليه وسلم

فعلاً يا جماعة إنهارده كان يوم جميل جداً جداً .. إنهارده كنا فى قرية برقاش فى الجيزة ..
إتجمعنا الصبح فى فرع رسالة المهندسين هنينا بعض بالعيد و صلينا الضحى وفضلنا نقرأ قرآن لغاية ما قالولنا يلا علشان هنمشى ..المفروض فى عجلين حوالى 500ك يتذبحوا ويتقطعوا ويتوزعوا فى القرية ..

والطريق للقرية بناخده فى ساعة ونص تقريباً

و ركبنا الباصات وقولنا دعاء الركوب ومشينا وفى بنت إقترحت لنقول كلنا التلبية سوا فعلاً فضلنا نص الطريق نقول : " لبيك اللهم لبيك .. لبيك لا شريك لك لبيك .. إن الحمد والنعمة لك والملك .. لا شريك لك لبيك " .
نص الطريق التانى قولنا تسبيح العيد :"الله أكبر, الله أكبر, الله أكبر.لا إله إلا الله.الله أكبر الله أكبر ولله الحمد الله أكبر الله أكبر الله أكبر لا إله إلا الله. الله أكبر

كبيره والحمد لله كثيرا, وسبحان الله وبحمده بكرة وأصيلا. لا اله إلا الله وحده, صدق وعده, ونصر عبده, وأعز جنده,

وهزم الأحزاب وحده. لا إله إلا الله, ولا نعبد إلا إياه, مخلصين له الدين ولو كره الكافرون.اللهم صلى على سيدنا محمد

وعلى آل سيدنا محمد وعلى أنصار سيدنا محمد وعلى أصحاب سيدنا محمد وعلى أزواج سيدنا محمد وعلى زرية محمد

وسلم تسليماً كثيرا . الله أكبر, الله أكبر, الله أكبر.لا اله الا الله.الله أكبر الله أكبر ولله الحمد الله " .

وصلنا القرية وقولنا دعاء دخول القرية

قسمنا نفسنا مجموعات ( مجموعة تقطيع اللحمة / مجموعة تكييس وتكييل اللحمة / مجموعة توزيع اللحمة ) .. و كان مطلوب مننا نخلص كل حاجة قبل المغرب بدأنا نشتغل ونبدل من مجموعة لمجموعة .. والحمد لله خلصنا كل شىء على العصر بالظبط ..صلينا جماعة الظهر والعصر ..
و إحنا راجعين فضلنا نقرأ قرآن ونقول أذكار وكل واحد فينا إتصل بإصحابه وقرايبه وجرانه على قد ما قدر علشان يهنيهم بالعيد .. كان يوم رائع جداً يا جماعة .. يا سلام لما تمسك سكينة وتقطع لحمة وتجهزها لناس محتاجاها فعلاً ( خافوا منى بقا أنا بقيت معلمة قد الدنيا ) .. ولا لما تروح توصل الكيس البسيط ده بإيدك للمحتاج وتبتسم فى وشه وتقوله كل سنة وأنت طيب .. وما أجمل الدعوة اللى يقولهالك .. ربنا يستركم ويبارك فيكم ويرزقكم من وسع ولا يرميكم فى ضيقة أبداً ..

الله .. الله .. الله

الله لما تكون صايم ومش أى يوم دا يوم عرفة .. و واحد أو واحدة غلابة يدعولك دعوة بسيطة من قلبهم

تفتكر ممكن ربنا مايقبلش الدعوة دى

طبعاً لو بنية خالصة لوجه الله .. ربنا مش هيرفضها

لبيك اللهم لبيك لبيك لا شريك لك لبيك .. إن الحمد والنعمة لك والملك لا شريك لك لبيك

أنا بس حبيت أعرض عليكم تجروبتى .. بجد أنا كنت بشوف أخويا رايح يعمل خير ويقولى تعالى وأكسل أروح معاه .. بس الحمد لله ربنا هدانى لطريق كله خير والحمد لله .. وربنا يهدينا أجمعين
فقد ثبت عن الرسول صلى الله عليه وسلم أنه قال " من فرج عن مسلم كربة فرج الله عنه كربة من كربات يوم القيامة ومن ستر مسلما ستره الله يوم القيامة " صدق رسول الله صلى الله عليه وسلم
بجد يا جماعة طريق الخير ده جميل جداً خسارة يكون فى إيد كل واحد فينا ومانستغلهوش .. بالله عليكم بلاش نكسل ونضيع وقتنا فى حاجات مالهاش فايدة لينا .. وحاولوا أى وقت تكونوا فاضيين فيه على قد ما تقدروا ساعدوا أى حد محتاج

ولما تقع فى ضيقة أو مشكلة لا قدر الله وتتحل بكل سهلة عقلك هيفكرك بالخير اللى عاملته علشان تفك ضيقة شخص .. و إزاى ربنا ردهولك تانى

على فكرة أنا دعيتلكم فى كل صلاة إنهارده .. إنتوا بقا دعيتولى ولا إيه نظامكم

::::::::::::

إن شاء الله فى قافلة توزيع لحمة فى الجيزة ( العياط ) تبع جمعية رسالة فرع المهندسين خامس وسادس أيام العيد ( يوم الجمعة 12/12/2008م والسبت 13/12/2008م) التجمع فى الجمعية بالمهندسين الساعة 8,30ص والتحرك بمشيئة الله 9ص بالظبط .. نتمنا تشاركوا معانا فى الخير .. وجزاكم الله خيراً وأكلتم لحم طيراً ورُزقتم من الجنة منزلاً .. وكل عام وأنتم بخير