بخصوص مواد الفرقه الاولى

[ahmed abo baker]

بسم الله الرحمن الرحيم

فكرنى انا احمد خلاص قررت احضر من بكره و امرى لله بقىو هبقى منتظم و كفايه لعب بس معلش انا عايز اعرف مواد الترم الاول بدل ما اروح بكره اتخض و شعرى يوقع للفرقه الاولى عين شمس

و احب اشكر مراقبنا الكبير فام بير على مساعدته الكبيره لى فى موضوعى السابق

[vampire1188]

ربنا يخليك يا احمد ..

بس اولا ليا ملحوطة صغنونة اوي .. ياريت بعد كدا لو ليك اي استفسار فيه موضوع مثبت اسمه "لو اولي جامعة اسأل مجرب" .. خش واسأل براحتك فيه .. عشان مش معقول كل سؤال تعمله موضوع منفرد ..

بالنسبة لسؤالك بقي . انتا ياسيدي ماعرفش جامعة ايه الاول .. عشان من جامعة لجامعة بتفرق

بس في العموم انتا المواد عندك مش هاتقل عن 5 ..

> محاسبة مالية .. ودي بقي عقدة تجارة .. ركز فيها جامد

> سلوك انساني .. عبارة عن علم نفس بس من الطريق الاداري .. يعني ازاي انك تعامل البشر بالطريقة الادارية .. هيا مادة كلها رغي ودش .. بس لذيذة لو تمعنت فيها وفهمتها

> رياضة تجاريين (رياضة بحتة) .. زيها زي الاحصاء بتاعة ثانوي كدا .. بس تجارية شوية .. اتمرن وخلي ايدك ماشية في المسائل كتير .. عشان هيا عاملة زي البساتم بتاعة العربية كدا .. لو مافيهاش زيت ماتمشيش ..

> تنظيم وادارة .. مادة نظرية وحلوة ودماغ .. مقدمة كويسة عن مبادئ الادارة في الحياة العملية .. (تخطيط ، تنظيم ، توجيه ، رقابة) اربع حاجات تحفظهم زي اسمك .. وفي اي سؤال ارزعهم !!

> موارد اقتصادية .. زي الجغرافيا بتاعة ثانوي .. شوية ارقام ونسب وقارات ومحيطات .. دراسات عن البترول والقمح والقطن والموارد البشرية والطبيعية بصورة عامة .. احفظ الارقام على قد ماتقدر .. والاهم انك تحفظ العنوانين الرئيسية عشان بتخدم في الامتحان ..