إهداء إلى شهداء الحريه

[محمد محمد زيدان]

إهداء إلى شهداء الحريه

يا شعب عايش عالفتات
صامت وراضى بالقليل
قول مره لأ و كفياك أهات
ريسنا مش ناوى الرحيل

ثوارنا عملوا المستحيل
قالولو أمشى قال دى بلدى وليا فيها ذكريات
و الطيبين بكوا وقالوا مش ها يمشى مش هايمشى
و أحنا برضو مش ها نمشى م الميدان
أحنا أقوى من الصنم
أحنا أقوى من فرعون و من هامان
ثوارنا ماتوا تحت أقدام النظام
و على وشهم دموع فرح و دم أغلى من تاريخ ريس جبان

مش ها نمشى مش ها نمشى
مش ها نمشى هو يمشى
هو يمشى غصب عنه
هو و أبنه
و المليون حرامى اللى جنبه

هو فاكر نفسه حاكم على شوية غنم !
دانا المصرى اللى عمره ما سجد لصنم
دا أنا حارس بوابة التاريخ
و أنا صانع المجد و بانى الهرم

قالولو يافرعون أيش فرعنك
قال مالقيتش حد يردنى
قالولو طب و الشعب اللى نازل فى الميدان يخلعك
قال و الله ما يهمنى
دستور يا مصريين حارس على أمين
دستور بيقول أنا الإله على طول
دستور بيقول أنا ربكم الأعلى
و أنا اللى فــــــــ أيدى أمنكم
و أنا اللى فـ أيدى خبزكم
و أنا اللى هاحكم أرضكم
و أبنى أله تحت التمرين
بكره هايورث أرضى أنا مش أرضكم

أرض الميدان اللى رواها دم الشهيد
قالت للتاريخ لازم تقف على أرضنا
و تسجل فى الميدان أعظم ملحمه
خرجنا خلاص و ماعدش يهمنا
حديد ونار خيول جمال
خلاص خرجنا ومش هانرجع للعيال
عيالنا اللى بدون رصيد
مات عشانهم تلتمية شهيد

مش هانرجع البيوت
مش هانرجع للسكوت
مش هانخاف فى يوم نموت
و أحنا بنكتب التاريخ بدمنا

هانحاكم اللى داس بخيوله كرامة شعبنا
ها نحاكم اللى خرب البلاد
و اللى ناوى عا القعاد على قلبنا

خدعوك ياريس اللى وراك
و قالولك أن الناس معاك
الناس شاغلها رغيف و زيف
الناس قاتلها ألف خوف و خوف

قوم يا مصرى
مصر أمك مش مرات أبوك
قوم يا مصرى
دا اللى فى التحرير أبنك و أخوك
قوم ولبى ندا الثوار
أكتب بأيدك نهاية اللى بيسرقوك
و بيشتموك و بيهنوك
و يكهربوك و يعزبوك و يقطعوك
و فى ألف مليون طابور بيوقفك

المصرى ثار عشان يقول للظلم لا
عشان يقول أن الرئيس موظف عندنا ما هوش إله

ياشعب صايم ع الطعام و ع الكلام
اللقمه بتبوسها وتقول عايش تمام
الدم سال و الرجوع أصبح محال
دم الشهيد لون العلم فى صمته أبلغ من مليون كلام
وسط الميدان فى يوم غضب ورونا جبروت النظام
مدرعات و سيارات ما لهاش عدد
كتل حديد مالهاش ضمير بتدوس على ولاد البلد
الدم شلال أنفجر رسم العلم وسط الميدان
و ندا الشهيد رغم الألم أصبح أدان
و سط الميدان
وبدم طاهر أتحنت مصر ليلة عرسها
و الشعب كله زفها على لحن كان مات من زمان

طلعت على الدنيا و دم الشهيد على وجهها
أتهزت عروش الأرض و الدنيا وقفت كلها
وسط الزهول و قفت تقول مبروك لمصر عودة أبنها لحضنها

فارس نبيل مصرى أصيل
ودمه يومها كان دليل على حبها
هزم الرصاص و البصاصين و الجلادين والمرشدين وقالها
يامصر قومى ماتزعليش و ما تخافيش أنا قدها

مجنزرات وسيارات مالهاش عدد
ودبابات بتستجير وتقول مدد
من خوفها واقفه بتترعش و تحتها مليون ولد
و فى عز عز صدقها بتنحنى وتبوس أيديهم و الدمعه على وجهها

مش دبابات دى سلاحف طيبه مغلوبه على أمرها
و اللى يقرب منها يشوف دموعها و يسمع همسها
و هى بتبكى وتستغيث
الشعب يريد إسقاط الرئيس
محمد زيدان
كتبت بعد الخطاب الأول للرئيس السابق