يمكن يكون مش مكانه

[:: [ K A B B O W ] ::]

السلام عليكم و رحمة الله

ازيكم يا مهندسين اخباركم ؟

يا رب تكونوا بخير

نخش فى الموضوع

انا ليا طلب عندكم

انا ملاحظ ان كل اللى هنا مهندسين و مفيش ناس بسن اصغر

( يا راجل انت جيبت جديد يعنى ما هو قسم المجموعات الهندسية عاوز ايه منه ؟ )

اصبر بس انا قصدى ان الاقسام دى المفروض يكون ليها نشاط هدفه تعليم الصغيرين

يعنى مثلا اصحاب المجال الاليكترونى يعملوا دورات تعليم المكونات و شرح دواير بسيطه و تنزيل داتا شيت مبسطه لـــ ic

( هممم و بعدين ايه الفايده ؟ )

الفايده اننا هيكون عندنا جيل جديد فاهم الحاجات دى كلها من و هو صغير و هيقدر يبدع لما يدخل اى كليه هندسية

و هيكون عنده خبره كبيييييييييييره جدا لانه من صغره شغال فى المجال ده

( طيب ما هى الكتب و الداتا شيت موجود على النت كتييييير جدا الللى عاوز يتعلم كان راح اتعلم )

يا راجل حرام عليك الكلام ده انا بشوف ناس متخرجين من هندسه و مميعرفوش يقرأوها تقولى ناس اعدادى و ثانوى هيقرأوها

احنا المفروض نبسط ليهم الموضوع ده

( طيب ما تعمل اللى انت عاوزه نزل شروحات و دروس زى ما انت عاوز ايه اللى مانعك ؟ )

يعنى مينفعش واحد لسه تانيه ثانوى يتكلم و الناس الجمال دول موجودين هنا
و كمان انتم اكيد عارفين اكتر منى بكتيييير يعنى انا مهما قلت و علمت انتم هتكونوا احسن منى

( احم فى حاجه صغيره هنجيب الناس الصغيره اللى عاوزه تتعلم دى منين ؟ )

كده انت بدأت تفهمنى بص يا سيدى المنتدى ده منتدى بوابة الثانوية العامه يعنى هتلاقى فيه كل الجيل الجديد
لو اعلانا فى بداية الأجازة الجايه عن مثلا دورة لتعليم مبادىء الاليكترونيات و كان الاعلان ده الادارة مهتمه بيه و الأشخاص اللى قايمين على الدورة دى قدموها بشكل كويس سهل هتلاقوا عندكم اعداد كويسه

( انت بتقول ايه بداية الاجازه الجايه و جاى تتكلم دلوقتى طيب روح نام بس )

ثوانى ما المفروض نجهز للموضوع ده كويس جدا و نكون عاملين حسابنا من دلوقتى و كل ما كنا مستعدين بدرى كل ما كان احسن






يا رب تكون فكرتى وصلت
الموضوع ده بدأ فعلا يتنفذ فى بعض الاماكن هنا فى مصر
و ناس ربنا يكرمهم و يزيدهم علم ( قولوا امين ) بدأوا يشتغلوا فيها
مش هقولكم ان الموضوع سهل فى الاول
لا الموضوع صعب جدا ممكن اول سنه يكون عندك شخصين بس و انت تكون عامل حسابك اقل حاجه خمسين
و تحبط و الكلام ده
لكن صدقنى اول ما هتشتغل فيها شويه تانى سنه هتلاقى عندك اضعاف الرقم ده
و الجيل اللى انت علمته ده يعلم الجيل اللى بعده و هو اصغر
و بكده يبقى احنا منتطور بجد لان عندنا اشخاص عندها خبره كبيييره جدا و هم فى سن صغير
متستصعبش الفكره يالا نفكر ننفذها و نكون عاوزين فعلا ننفذها و صدقونى هييجى الوقت اللى هنفرح فيه كلنا
بأننا اخدنا ثواب عظيم و اننا عملنا حاجه فعلا عظيمه
فى رعاية الله