هل هذا هو مجلس الشعب الذى نثق به لانتخاب لجنة تعديل الدستور !!!!!!!!!!!!!!!!

[عاشق البلانكو الابيض]

خلينا ببساطة نتكلم تانى و نفكر الناس بشكل مجلس الشعب القادم اللى هيختار لجنة وضع الدستور الجديد

اقوى تيارين مرشحين لحصد المقاعد فيه هم الاخوان و الحزب الوطنى

لو بايدى انا اخلى الاخوان يحصدوا كل المقاعد و ابقى ضمنت بنسبة مليون فى المية ان الثورة نجحت خلاص و اللجنة اللى هتعدل الدستور هبقى واثق فيها تماما و انا مغمض

طيب نبص نشوف فرص نجاح الوطنى و الاخوان عاملة ازاى

الكلام ان الحزب الوطنى و ذيوله انتهت ده كلام غير صحيح بتاتا

تعالوا نشوف ازاى الوطنى و أذياله هيكتسحوا تانى فى مجلس الشعب اللى جاى

منتفعو الوطنى الطلقاء يملكون المقار، والمال المسروق، والأعوان البلطجية، وخبرة الانتخابات وتربيطاتها، التى ستمكنهم من حصد الأصوات (فى غياب أى حزب آخر)، ومن ثم السيطرة على الحياة فى مصر، بغطاء دستورى سيكتمل بانتخاب رئيس، يملك من السلطات نفس سلطات الرئيس المخلوع!

اول حاجة مفيش ولا حزب ليه تاثير فى الشارع حاليا و لا بياثر فى الناس و لا الناس هتنتخب مرشحيه لمجرد انهم فيه ... يعنى غد ولا وفد ولا تجمع ولا 25 يناير و كل الحاجات دى

ثانيا الحزب الوطنى هينزل شخصيات جديدة الناس بتحبها و بتقدرها لكن هم فى الاساس عملاء ليه و لامن الدولة ... زى ما شوفنا فى وثائق امن الدولة كم الناس المتعاونين معاهم و الجميع كان فاكرهم ناس عظيمة ... و اعتقد اكتر حاجة ركز عليها امن الدولة فى حرق و اخفاء الوثائق هم المتعاونين معاه

ثالثا فيه ناس كانت تابعة للحزب بس هتنزل مستقلة دلوقتى و ترفع شعارات الثورة و نعم للتغيير و الناس هتنتخبها عادى لانها كانت بتقدم خدمات كتيرة اوى لناس دايرتها

رابعا الناس اللى ليها مصالح فى مرشح معين ... زائد كم الغلابة اللى بيبيعوا اصواتهم عشان 20 جنيه ... كل دول هيساهموا فى نجاح الوطنى و اذياله

نسبة العمال و الفلاحين ال 50 % ... الوطنى و اذياله هيكتسحوا النسبة دى تماما ... ده غير اصلا احنا من الاساس ازاى ممكن نعتمد على النسبة فى اختيار من يعدل الدستور !!!!!!!

نيجى بقى للصعيد اللى انا منه

عندنا فى الصعيد فى اكتر من 90 % من الدوائر مفيش حاجة اسمها حزب وطنى و غد و اخوان مسلمين و كل الكلام ده ... فيه حاجة اسمها العيلة و القبلية ... و لو مرشح العيلة كان او مازال مرشح لحزب اسمه تتحرق مصر بجاز ... فبرضو كل افراد العيلة هينتخبوه ... يعنى اللى بينجح هو تابع العائلة الاكبر و ذات النفوذ الاوسع و الاقدر على حشد الاصوات ... مفيش اى تاثير لافضلية المرشح و لا تاريخه ولا توجهاته و اهدافه ولا الكلام ده

زائد انه بعد كل ده ... الاخوان اصلا مش هيترشحوا غير على 40 % بس من المقاعد

تقدروا تتخيلوا بقى شكل مجلس الشعب اللى جاى و اللى هنعتمد عليه فى الدستور الجديد هيبقى عامل ازاى !!!!!!!!!!!!!!!!!!!!!!!!!!!!!!!!!!!!!!!!!!!!!!

ازاى ممكن يبقى فيه حد ولو لثوانى ممكن يثق فى المجلس ده

.....