رساله............

[شيشانا]

دى يا جماعه رساله منقوله عن احد الاشخاص طلب ينقلها وحبيت انقلها على المنتدى المبدع دائما
صاحب الرساله شخص اسمه محمود الاشقر
السيد الدكتور / وزير التعليم العالى
بعد التحية
هناك عدة مسائل احب ان اعرضهم على سيادتك وبعدها أفوض امرى للذى خلقنى وخلقك وخلق البشر اجمعين
أولا: انت صدمت الطلاب الذين قضوا سنتين من عمرهم محبوسين عن متع الدنيا وقضوها فى المذاكرة وكمان صدمت اولياء امورهم الذين خربت جيوبهم نتيجة الصرف سنتان متواليتان على الدروس الخصوصية التى تتكلف شىء وشوييات وذلك نتيجة الارتفاع بالحد الادنى للقبول بالجامعات فحرمت بذلك اعداد من الطلاب للقبول بكليات القمة التى كانت حلم حياتهم طوال عناء السنتين السابقتين وذلك بحجة ان نقابة الاطباء عايزة تقلل الاعداد المقبولة هذا العام
ياسعادة الدكتور الوزير الم تعرف سيادتك ان هناك كليات خاصة تتسابق على اجتذاب الطلاب بمبالغ خيالية وهل من الممكن بعد ذلك ان تمنع النقابة هؤلاء الخريجين من منحهم الكارنية الخاص بمزاولة المهنة اذن التعليم بقى مقصورا على اللى يدفع ثمنة وممنوع على اولاد الفقراء يعنى الفاشل ابو 75 % يبقى طبيب ولا مهندس والحاصل على 90 %فما أكثر يخبط دماعة فى الحيط
يا سعادة وزير التعليم العالى لو انت عاوز تخفض الاعداد المقبولة صحيح يبقى تقفل جامعات الفشلة الجامعات الخاصة اللى بيدفعوا ثمن الشهادة مش تحرم طالب متفوق من الالتحاق بالجامعة علشان تبيع الشهادة لاولاد الاغنياء الفشلة والله العظيم اللى بتعملوة دة اكبر حرام وعاوز حد يقنعنى ان اعطى شهادة طب او هندسة لطالب جايب
75 % واحرم منها طالب حاصل على 90 % فاكثر ياترى هو دة ثمن التفوق فى نظركم
ثانيا : موضوع القدرات اللى انتو بتلموا عليها فلوس قد كدة ياناس هو دة وقتة برضة هو فية حد بيكسب ولا بيربح الايام دى علشان يدفع المبالغ دى كلها شوف حضرتك الحسبة كام 25 جنية ملف + 125 رسوم امتحان + 200 جنية دورة تدريبية علشان اية يعلموهم كام رسمة كدة على ما أؤسم يعرف يخش بيهم الامتحان + 50 جنية قيمة اسكتش واقلام لزوم الكام راسمة يعنى المجموع الكلى = 400 جنية بالذمة دة حرام ولا حلال وخصوصا كمان لما تعرف سيادتك اناختبارات القدرات دى تمت دون ان يعرف الطالب اصلا هو محتاج الكلية دى ولا لا و لان الطالب اصلا يلجأ الى ذلك تحسبا يعنى يمكن اة ويمكن لا …. انا عاوز اعرف ازاى تقبلوا فلوس على نفسكو والطالب اصلا يمكن ميخشش الكلية دى وذلك نتيجة ان قدم خوفا ان يكون محتاجها او ان يكون مجموعة لايقبل فى كلية غيرها اويكون مفيش بديل تانى وبعدين هما الكام راسمة دول مينفعش يخودهم الطالب بعد ما يلتحق فى الكلية وبعدين الموضوع اصلا كلة 6 ساعات تدريب ياترى قيمة ال 6 ساعات دول يستاهلوا اننا ندفع فيهم 400 جنية وبعدين هى الناس ناقصة اصلا فى الايام ان احنا فيه دى كمان نحملهم فوق طاقتهم والله العظيم انتو ما تعرفوا ولى الامر بيدفع الفلوس دى ازاى ولا منين يا دكاترة عيب الابتزاز واحنا لسة لم نرى ابواب الجامعة
ثالثا : انا روحت مع ابنى علشان اقدملة الدورة التدريبية وامتحان اللى ميسماش دا اللى بيقولة علية قدرات لاحظت ان المدرجات بها اعداد كبيرة من الطلاب يدرسون نفس الدورة التدريبية … كنت عاوز اسأل سعادة الوزير سؤال ياترى هى الكلية الموقرة دى هتقبل كل الاعداد دى وياترى هى النقابة بتاعة الكلية دى ماقالتش عاوزين نخفض الاعداد برضة ولا الكلية محتاجة شوية فلوس زيادة فعلمت الدورات دى عشان تلم قرشين من الغلابة الفقراء ولا انتو عارفين ان كل الطلاب اللى بيدورا على الجامعات الحكومية معاهم فلوس
واخيرا ياريت نراعى الطلاب المتفوقين دول شوية انا فى اعتقادى ان كل طالب يحصل على مجموع 90 % فاكثر فهو طالب غير عادى يستحق اختيار المكان الجامعى الذى يكمل فية تعليمة ولا حضراتكم فاكرين انهم مؤلفو مناهج وكتب ولابد من حصولهم على مجموع 97 % فأكثر للالتحاق بكليات القمة انا عاوز اعرف سعادتك كنت جايب نسبة كام فى المية فى الثانوية العامة ياريت تعلنها على الطلبة وتفتخر وتقول لهم انا كنت جايب مجموع اكبر منكو عشان كدة انا اخترت الكلية اللى انا عاوزها ومحدش فرضها عليا وانا دخلتها بمزاجى وكمان مدفعتش 400 جنية لتدريب واختبار القدرات
ياريت كل من يقرأ هذة الرسالة ان يقوم بنشرها على الجروب المشترك فية او على اصدقائة وعلى صفحة التعليم العالى وصفحات الاذاعات


واسفه معرفتش اكتب مصدر الموقع عشان ممنوع الا بعد 25 مشاركه