يوميات التحويل في المنصورة 2

[ningooooo]

بسم الله الرحمن الرحيم

استكمالا لما بدأناه في ذلك الموضوع يوميات التحويل في المنصورة نقولكم إيه اللي حصل النهارده
انا قولت اطلع ذكي النهاردة و اصحي بدري علشان ألحق في الأول فصحيت الساعة 8 و وصلت هناك علي 9 إلا 10 كده و كانت الصدمة بوجود أعداد كبيرة جدا و إذا بشخص يقوم بلصق ورقة توضح انه تم تقسيم التحويل علي دفعات يعني كان المفروض النهاردة طب و بكرة هندسة فلقيت الأعداد زي ما هي و تساءلت هل كل هذه الأعداد طب !!!!!!
و في تمام الساعة التاسعة و خمسة بتوقيت المنصورة تم فتح الباب و إذا بأعداد غفيرة تقتحم المدينة و وجدت كل شبابيك الدفع عليها زحمة فلقيت واحد خفيف شوية و روحت وقفت و طبعا ولا كان في نظام و لا طابور و لا أي حاجة عبارة عن همج و كمان مكنش في مكان للبنات نهائي و الأمهات عماله تزعق للي واقفين علشان يسيبولهم مكان و لا حياة لمن تنادي
و لكن معقول كل دول طب و الاجابة طبعا لأ علشان البهوات بتوع الكليات التانية لم ينسوا انهم مصريين و كان معظم اللي قدام الشباك مش طب و الراجل مش راضي ياخذ منهم الورق و البهوات بيرزلوا و مش راضيين يمشوا يعني حاجة قمة في التناحة و طبعا علشان الحكومة ما بتجيش غير ب ..... فالراجل اللي بتدفعله الفلوس اخذ من كله يعني يرضي مين ده يعني ما المفروض كل واحد يحترم نفسه و يجي في يومه لكن طبعا الناس المحترمين بس اللي عملوا كده
المهم طبعا كان مسلسل زي بتاع امبارح و بعد كده وصلت للشباك بعد وقت طويل لاني كنت مخنوق و مرضيتش أزق و كده و فضلت واقف و خلاص مش فارقه الاول من الآخر و و كان في جوه اثنين رجاله و واحده ست و كان واحد من الرجاله بياخذ الورق يفحصه و الثاني كان بيعمل الوصولات و يدبسها في الورق و طبعا انتم عارفين الست دي كانت بتعمل ايه ؟ اكيد كانت بتكلم و تنظم الورق و بعد ما الراجل أخذ مني الورق مشيت و انتهت رحلة العذاب مع التحويل .

. تمت .
24 أغسطس 2011

و للأخوة هنا أقولكم بعض الملا حظات :

1 - الورق المطلوب هو ( طلب التحويل - شهادة نجاح الثانوية العامة - بطاقة الترشيح - وصل نور أو ميه أو كهرباء معدي عليه أكثر من 6 أشهر )و أنا كنت مديله وصل نور من 2009 و وصل غاز من 2010 و وصل تليفون من 2011 و هو أخذ وصل النور و الغاز بس و مأخدش صور البطاقة و لا شهادة الميلاد بس أكيد الحكاية دي بتختلف من جامعة لتانية .

2 - و بخصوص الوصل مكنش في حد بيأخذ الوصل لأنه كان بيدبس في الورق و لو كان في حد أخذه امبارح كان بيروح يوديه لشباك تاني فهما طبعا شعارهم راحة المواطنين فسهلوا علينا الحكاية دي يعني اللي مأخدش وصل ما يقلقش و يسأل برضه لو كان حد أخذ وصل امبارح و لا لأ علشان يطمن .

3 - و بخصوص النتيجة واحد سأله انا اعرف أزاي نتيجة التحويل فرد عليه بقرف كده و قاله تعالي أول يوم في الدراسة و واضح كده انه ما يعرفش حاجة .

4 - و آخر نصيحة بقه محدش يروح بدري علشان هيلاقي زحمة يعني روحوا بعد الساعة عشرة كده هتلاقوا الدنيا أهدي شوية .