شوية حاجات و محتاجات عن حاسبات للجداد

[فهف]

سلام عليكم :
أنا اخوكم أحمد عادل ( تانيه ( لو ربنا كرمني و نجحت السنه دي ) حاسبات و معلومات أسيوط )
أنا هنا هرد على شوية إستفسارات أنا نفسي كنت بسألها السنه للي فاتت :
1- إيه الفرق بين حاسبات و تجاره ؟
الفرق إنك في حاسبات بتتعلم برمجه و تجاره محاسبه
البرمجه : بكل بساطه حضرتك دلوقتي قاعد\ه على جهاز الكومبيوتر و داخل على منتدى الثانويه العامه ... اللي عمل المنتدى ده عباره عن شوية ناس ناس عملت تصميم الشكل و ناس عملت البرمجه اللي فيه اللي مثلا تخليك تكتب التعليق بتاعك عندك و يظهر عند كل الناس اللي تشوف الموضوع ..... يعني بكل بساطه ملها أي علاقه بتجاره :D
2- طيب م أنا ممكن أخد كورسات web مثلا بره ايه اللي يخليني أدخل حاسبات ؟؟
الفرق إنك بره مثلا هتدرس لغه واحده فى ال course مثلا جافا ... لكن مش هتبقى محترف يعني مثلا إنت فى حاسبات مش بتاخد في التيرم غير لغة برمجه واحده و باقي التيرم بتاخد لغات مساعده مثلا رياضه و فيزيا و دوائر كهربيه و تصميمات و خوارزميات و عك كتير كده .... العك الكتير ده انت في حاجات منها بتستفادها مع البرمجه علشان تخلي البرنامج بتاعك سريع و ميقعش بسهوله و ياخد مساحه فى ال RAM قليله و ميتعبش الجهاز بتاعك .... وده هيكون الفرق بينك و بين اللي واخد الكورس
3- ايه الفرق بين حاسبات و هندسه قسم كومبيوتر ؟؟
الجهاز اللى انتوا قاعدين عليه بيتكون من حاجتين ... ال Hard ware و ال Soft ware الهارد و البروسيسور و الكلام الكبير ده Hard ware اما اللعب و الويندوز و البرامج soft ware طالب هندسه كهربا بيتعلم إزاي يصمم ال Hard ware بتعمق و بيدرس برمجه أما طالب حاسبات هو اللي بيدرس ال Soft ware بتعمق جامد أكتر من هندسه كهربا و بيدرس hard ware على خفيف
4- أبدأ أدرس إيه من الأجازه ؟؟
أنا السنه اللي فاتت و أنا فى الأجازه إتعلمت شويه صغيرين في لغة ال C اللي هتدرسوها أول تيرم إن شاء الله ... و فادتني جدا لما دخلت الكليه و بتبقى حاجه ممتعه جدا مش مذاكره زي المدرسه :D و ده موقع أنا كنت بذاكر منه www.thenewboston.com
5- أحدد مجالي إزاي ؟؟
خلينا متفقين أن الكليه هتديلكم أساس جامد جدا بس الكليه مش كفايه .. يعني مثلا لو حد نفسه يشتغل Android ( برمجة موبايل ) مش هيدرسها في الكليه .... لازم يكون عندكم جزء التعلم الذاتي و البحث عن المعلومه .... دور و عك و أغلط هتتعلم ... لما هتدخل الكليه هتلاقي مجالات كتير جدا قدامك ( برمجة موبايل , تصميم و برمجة مواقع , تصميم و برمجة الألعاب , الحمايه ,........ و مجالات كتير تانيه ) أحضروا اى ندوات هتتعمل عندكم في الكليه و شوف اللي أكبر منك بيعملوا ايه لحد لما تلاقي ان في مجال شدك و هو ده الل تبدأ مثلا من سنه تانيه أو أجازه أولى تدرسه مع نفسك لحد سنه هتطلع حاجه جامده جدا في المجال ده ان شاء الله
6- الكليه صعبه ؟؟
الكليه زيها زي أي حاجه فى الدنيا عايزه شوية تعب ... هتذاكر محاضراتك و سكاشنك أول بأول هترتب على الدفعه .... غير كده دي كليه عملي و هتلاقي التيرم جري منك و هتتعب في الأخر
7- في شغل ؟؟
الحمد لله حاسبات من أكتر الكليات اللي ليها شغل ..... لسبب بسيط عدد الكليات قليل و دفعاتها صغيره و ده مجال واسع و في القريه الذكيه في 6 أكتوبر فيها معظم الشركات الكبيره زي microsoft , oracle ده غير شركات الدعايه اللي بتحتاج مصممين مواقع ده غير حاجات تاني ... بس أهم حاجه إنك تطلع بتفهم :D
أخيرا :
أسف إني طولت عليكم ... و ده ال facebook account بتاعي اللي يحتاج أي حاجه يسأل و إن شاء الله ربنا يقدرني و أساعدكم
https://www.facebook.com/A.3Adel
.... ( أحمد عادل )

[moataz707]

حبيب قلبي انا إن شاء الله ممكن ادخل هندسة حلوان او ادخل كمبيوتر ساينس و محتار اعمل اية و ادخل اية >>> للعلم انا بشتغل في شركة خدمات ويب و استضافة مواقع و تصميم مواقع <<< و محتار و عايز اعرف هوا الدراسة بالعربي ولا بالإنجليزي و خصوصا الرياضة علشان انا اصلا لغات و هوا فية اقسام خاصة بفلووس يعني جوا عين شمس ولا لأ

معلش انا هطول علييك عايز اعرف سوق العمل دلواقتي

فية شغل و المرتبات بتبدأ من كام بعد اول سنة تخرج >> انتا تانية بس عايز اعرف المعلومات الي انتا سمعتها <<<

و الكورسات اللي انا هأحتاجها في اول سنة غير ال c و هل هيكون في كمان c# او c++

[Eng.Mo'men]

اتوكل على الله وادخل حاسبات لأنها كلها انجلش ودراستها لذيذة وهتناسبك , بالنسبة لسنة اولى هتاخد مادة اسمها برمجة هيكلية دي بتختلف من حاسبات لحاسبات ممكن تاخد c++ او c# او c المهم دي كلها لغات بتأسسك عشان لو هتكمل برمجة وبالنسبة للمرتبات بتبدأ من 1500 وبتبدأ تعلى بالخبرة , بس لو انت متميز وعندك خبرة وكنت شغال اثناء الدراسة وسمعتك كويسة هتلاقي الشركات بتتخانق عليك وهتحط السعر اللى انت عاوزه .

[فهف]

المشاركة الأصلية كتبت بواسطة moataz707

حبيب قلبي انا إن شاء الله ممكن ادخل هندسة حلوان او ادخل كمبيوتر ساينس و محتار اعمل اية و ادخل اية >>> للعلم انا بشتغل في شركة خدمات ويب و استضافة مواقع و تصميم مواقع <<< و محتار و عايز اعرف هوا الدراسة بالعربي ولا بالإنجليزي و خصوصا الرياضة علشان انا اصلا لغات و هوا فية اقسام خاصة بفلووس يعني جوا عين شمس ولا لأ

معلش انا هطول علييك عايز اعرف سوق العمل دلواقتي

فية شغل و المرتبات بتبدأ من كام بعد اول سنة تخرج >> انتا تانية بس عايز اعرف المعلومات الي انتا سمعتها <<<

و الكورسات اللي انا هأحتاجها في اول سنة غير ال c و هل هيكون في كمان c# او c++

بص يا كبير :D
الدراسه فى الكليه بالإنجليزي كل المواد ماعدا حقوق الإنسان ( ماده مش بتضاف للمجموع و هتاخدها ترم واحد بس )
أما عن الأقسام أعرف أن جامعة عين شمس فيها أقسام خاصه و ده link كنت شفته السنه اللي فاتت زي دلوقتي و أنا عاور أعرف أى حاجه عن الكليه و فادني جدا و أي أستفسار أسألني هنا أو إبعتلي رساله على ال facebook لأني مش بفتح هنا كتير

http://thanwya.com/vb/showthread.php?t=151552
إنت مش هتحتاج فى أول سنه كورسات أصلا و زي ماقلت إتعود إنك تعرف تتعلم لوحدك ... يعني مثلا ال C ما تخدش فيها كورس إتعلم من على الإنترنت الأساسيات لحد لما تدخل الكليه و تشوف ميولك لإيه و منه تبدأ تاخد كورسات في المجال ده .... يعني مثلا لو هتشتغل web هتركز على ال web و تحدد مثلا ASP.Net ولا
php
بالنسبه لسوق العمل .... اللي أنا سمعته إنت مش بيفرق إيه تقدريك لما تتخرج ... انت هتروح تقجم في شركه هيدولك مشكله اوو برنامج عملتها قشطه إتقبلت .... بالنسبه لسوق العمل واسع لأن زي م أنا قلت عندنا القريه الذكيه ده غير شركات كتير صغيره او كبيره بس مش في القريه الذكيه ... إحنا مثلا فى أسيوط عندنا 3 شركات برمجه ..... على الرغم من انها محافظه صغيره .....
أكتر حاجه سمعت انها شغاله ال Data base و ال web و ال mobile ...... أما عن المرتبات في الشركات التعبانه من 1000 جنيه في الشركات النضيفه ممكن تعدي ال 5000

[Eng.Mo'men]

تمام ........

[!KIMO!]

انتا فى السؤال الاول حصرت الكمبيوتر ساينس فى ال web design
مع ان ده انا شايفه من وجهة نظرى انه من ابسط المجالات ممكن بكام درس من ع النت تتعلمة :D

انتا فى حاسبات و معلومات المفروض انك بتتعلم لغة البرمجه ازاى بتشتغل و بعدين ازاى تستخدمها و كده :D

[Eng.Mo'men]

بالتوفيق ان شاء الله