تعليم من غير مناهج

[هتـــلر]

السلام عليكم



للاسف محدش مر بالتعليم المصرى الا و شتم فيه عشان الحفظ فيه كميته كبيره جداً + مناهجه قديمه و مش بتواكب التطور العلمى الموجود فى الدول المتقدمه

انا فكرت فى نظام للثانويه العامه ممكن يكون كويس و ممكن يكون لا
هو هيكون فيه 3 فروع (علمى رياضه . وعلمى علوم . وأدبى ) عادى
بس كل قسم هيبقى ليه مواد عليها درجات و مواد نجاح وسقوط
علمى رياضه
المواد المضافه للمجموع :رياضه و فيزيا وكيميا (بس يكونو بالانجليزى)
مواد النجاح و السقوط :عربى (نحو وبلاغه) و انجليزى (اختيار و براجراف ) و لغه تانيه (اختيار وبرجراف)

علمى علوم
المواد المضافه للمجموع :احياء و فيزيا و كميا (بالانجليزى)
مواد النجاح و السقوط : نفس مواد علمى رياضه

الادبى
المواد المضافه للمجموع :فلسفه . تاريخ . جغرافيا .علم نفس (بالعربى ههههههه)
مواد النجاح و السقوط : نفس مواد علمى رياضه


النظام ده هيحتاج وقت كبير فى المدرسه و هيحتاج تفاعل كبير بين المدرس و الطلاب
الفكره كلها ان المواد اللى هتضاف للمجموع مش هيكون ليها منهج محدد
يعنى المدرس هيقول للطلاب مثلاً انا عاوز بحث عن تركيب الذرة و يديهم اسماء مراجع و كتب و يبدأو يدورو بنفسهم ويجيبو المعلومات وبعدين يعرضوها باستمرار على المدرس وهو يساعدهم ويعدل عليهم

وكل فتره محدده هتيجى لجنة معينه تشوف ابحاث الطلاب و تناقشهم فيها و يقيموهم و يدوهم درجات وبعد فتره تانيه يجو تانى ويشوفو البحث التانى و يدوهم درجات و هكذا
و فى الاخر يحسبو توتال الدرجات لكل المواد التلاته او الاربعه و على اساسه يدخل الكليه اللى يستحقها


انا عارف النظام ده ناس كتير هتعترض عليه
بس بجد لو اتعمل هنلاقى فعلاً زى زويل و سميره موسى كتير اوى لان هينمى عندهم حتة البحث و التعب على المعلومات و المناقشه وحاجات مهمه كتير

وكمان فيه نقطه تانيه
ان وقت الدراسه مش هيكون ترمين و الهبل ده
هيكون على مدار سنتين بحالهم و هتكون الاجازه اسبوع بعد كل شهر

و طبعاً فيه ناس هتقول ازاى هيذاكر بالانجليزى و يطبق النظام ده والسنين اللى فاتت كان واخد نظام تانى مش متوافق خالص معاه
هقولك ان السنين اللى قبلها هتتغير كلها بس هتكون بمناهج محدده و طبعاً المواد العلميه هتكون بالانجليزى و المواد الادبيه هتكون كثافتها قليله فبالتالى لما يوصل للثانويه العامه مش هيلاقى صعوبه فى التعامل مع النظام ده


هو مش هيحتاج فلوس كتير عشان يتطبق
محتاج بس تغيير فى مناهج كلية التربيه و انها تكون بالانجليزى للمواد العلميه
و تغير فى مناهج السنين كلها
و مرتب المدرس يزيد بشكل كبيير و تكون المهنة ديه زيها زى طب و هندسه واكتر كمااان



بجد التعليم مهم جداً فى اى دوله لانه المسؤل عن تكوين فكر الطلاب و يمكن اخلاقهم كمان
و للاسف تعليمنا ده خلى اللى يطلع الاول يتغر فى نفسه و يفتكر انه حقق حاجه ناس كتير بتتمناها و هو اساساً مش عارف ان التعليم ده بيعتمد على الحفظ 70 % و انه مش بيراعى الفروق بين الطلاب و انه بيقضى على وقت الطالب تماماً و ميخلهوش يعرف يماسر اى موهبه تفيده او حتى يراجع القران اللى حفظه فى الاجازه
بجد حاجه تحرق الدم لما نشوف نظام التعليم بره و نظام التعليم هنا
وللاسف ناس كتير اتكلمت عنه و ناس كتير عرضو خطط لاصلاحه بس للاسف لا حياة لمن تنادى


انا بجد حاسس انى لغاية دلوقتى مخدتش علم نضيف و لا حاسس انى بتفوقى فى السنه الغبيه ديه ولو حتى طلعت الاول انى استفدت بحاجه غير انى ارهقت دماغى بحشو كتيير و بوظت نفسيتى و اعصابى و بس

انا شكلى نسيت نفسى و رغيت كتير انا هسكت بقى
اسف ع الاطاله