"لا تأخذكم بهما رأفة" !!

[أبو العلاء]

[IMG][/IMG]

أصحى الفجر
أصلّي جماعة
أقرا الورد
أعمل تمرين ضغط واخلي
كل عروقي تجري بدمي
بعدين اذاكر
أخرج بدري
بعد ما ابوس إيد أمي وابويا
آخد كل حجاتي معايا
إللي بذاكر فيها تملي
أركب باسم الله أتوبيس
وِقْفِتْ جَنْبِي...
في الأتوبيس
بيني وبينها مكان دبوس
هي جميلة ؟!!
أيوة جميلة
ممكن نبقى اصحاب على طول
انطق يابني يَلّه وقول
طب أقول إيه؟
هِيَّ هاترضى؟!!
أيْوة هاترضى
أمال عاملة فْ نفسها ليه؟!!
حاول ....حرَّك نفسك ... يللا
آه لو كان الأتوبيس فاضي؟!!
يبقى الموضوع سهل وعادي
جاتني الفكرة
أعمل إن الأتوبيس مَيّل
أحدف نفسي عليها واميّل
لأ , دي حكاية قديمة يا عيّل
قلت أحطّ إديَّا فْ جيبي
يمكن إيدي تيجي في إديها
تضحك ليا ... أضحك ليها
بعدين نبقى اصحاب على طول
يلا اتشجع
لحسن تنزل بعد محطة
أو هاتحط في جنبك شنطة
يبقى طلعت صراحة أونطة
يلا اتشجع ... يلا اتلحلح
لأ دا حرام
لأ ,داهتبقى علاقة بريئة
تبقى الناس شيفانا كمان
نقعد نتكلم في محاضرة
نشرب ساقع نلعب طايرة
حطيت إيدي في جيبي بسرعة
يمكن إيدي تيجي في إيديها
حطيت إيدي في جيبي بسرعة
حسيت إن إيديّا فْ وِلعة
لما عرفت ان انا غلطان
إزاي أنسى ؟!!
إزاي أقسا؟!!
بعد ما حطيت إيدي في جيبي
حسيت إن في جيبي كتاب!!
جيبي ده كان فيه كتاب قرآن
................................
بيني وبينها كتاب قرآن
إزاي نسّاني الشيطان؟!!!
جيبي ده كان فيه مصحف ليَّه
أقرأ فيه ورد اليومية
.........................
رب اغفر لي
رب ارحمني
إني نسيت ـ وفْ لحظة ـ عدوّي
بيرتبلي
ويخططلي
ويخليلي الغولة حورية
ويخليلي جهنم مية
حسيت إن ما بينا اسوار
حسيت إن انا جوا النار
لما فتحت المصحف أقرا:
"لا تأخذكم بهما رأفة"
رب اغفر لي
رب ارحمني
رب ما تجعل ليّا الدنيا
واجعل ليّا الآخْرة تملي
واديني كتابي بيميني
والجنة دوما تناديني
وابقى من حزب الرحمن
أصحى الفجر
أصلي جماعة
أقرا الورد
أعمل تمرين ضغط واخلي
كل عروقي تجري بدمي
بعدين اذاكر
أخرج بدري
بعد ما بوس إيد أمي وابويا
آخد كل حجاتي معايا
إللي بذاكر فيها تمللي
أركب باسم الله أوتوبيس
وقفت جنبي
في الأوتوبيس
بيني وبينها كتاب قرآن
هو حميني من الشيطان
لما فتحت المصحف أقرا
"لا تأخذكم بهما رأفة"
"لا تأخذكم بهما رأفة"
"لا تأخذكم بهما رأفة"