الحب .. و الفراغ العاطفي

[bosy .. mostafa]

بسم الله الرحمن الرحيم
السلام عليكم ورحمة الله وبركاته
انا النهارده عايزه اتكلم معاكم
و انا هتكلم ان شاء الله عن موضوع مهم اوي , و اعذروني لإني هطوّل عليكم شويه
انا النهارده هتكلم عن الحب ..
ممكن نكون اتكلمنا عنه قبل كده بس انا هتكلم عنه بشكل تاني

مــا هو الحب ؟؟
الحب ده كلمه صغيره بحروفها كتيره بمعانيها و هو عباره عن احساس بيتولد تجاه شخص معين متعرفش ليه و امتى و ازاي حصل كل ده لكن بتحس انك نفسك تعمل اي حاجه عشات تسعد الشخص ده , و بتحس انك تفضل معاه على طول و مش بتشبع منه و بتكون زعلان جداً جداً لما تسيبه او تبعد عنه و انت عارف انك هتشوفه تاني .

الحب احساس جميل اوي اوي .. فيه كتير مننا اوي بيدور على الحب و فيه اللي نفسه يحب وده لإن الحب بيعتبر أساسي في حياتنا مين فينا يقدر يعيش من غير حب
مش شرط حب الحبيب لحبيبته .. فيه عندك حبك لربنا .. لأهلك .. لوطنك .. لجيرانك .. لأصحابك
مين فينا يقدر يعيش من غير حب كل دول؟؟
أكيد صعب الواحد يعيش من غير حب
يمكن و احنا صغيرين بيكون حب الأهل مهم اوي بالنسبه لنا و هو الأساسي في حياتنا لكن لما بنكبر ومشاعرنا بتكبر معانا بيكون فيه حب تاني اهم
و هو .. حب الحبيب
تبقي واقف كده في حالك و في امان الله و واحده معينه تلاقيك بتنجذب ليها مره واحده و بتفكر فيها على طول تعرف انك وقعت في الحب .. و ترتبط و تعيش احلى ايامك
و تبقى نفسك تعيش مع حبيبك طول العمر .. و يحصل اللي انت ماكنتش عامل حسابه
و لظروف معينه تفترقوا .. و تعيش حزين
و يحدث ما يعرف بالفراغ العاطفي
بتبقى حاسس بفراغ عاطفي
تعالوا نتكلم في النقطه دي
والفراغ العاطفي انه فيه ناس بتعيش على الحب ده و مايقدروش يعيشوا من غير ما يحبوا لازم يبقى فيه حب في حياتهم و دي مشكله و عايزين نعرف حلها ..
ليه يعني بيكون الحب ده مهم لناس كده و بيمثل لهم كل حاجه و هو مش بيمثل اي شيء لناس تانيه ؟؟
و فيه ناس لو قعدت فتره بدون حب تلاقيها هتجنن و تحب و تحس بفراغ عاطفي و بيسبب اوهام و مشاكل كتيره

هل الحب اتحول لمرض نفسي؟
في بعض الأحيان الحب ده بيتحول لمرض نفسي , لإن الإنسان اللي بيحب ده ممكن تيجي له حالة اكتئاب او قلة نوم او قلق او هواجيس و تخاريف مالهاش معنى , و تزيد عصبيته و ممكن ده يخلي الإنسان يفقد صوابه فبدل مايكون الحب احساس جميل بيسعد صاحبه , لأ ده بيتحول لغيره عمياء تحوّل حياة صاحبها إلى جحيم .. اللي بتخلي صاحبها اكثر عرضه للمرض النفسي ..
لإن زي ماكلنا عارفين ان الحب عاطفه بتتعلق بالنفس البشريه و عندنا امثله كتيره اوي بتبين ان الحب بيكون في بعض الأحيان مرض نفسي ..

و اي حد بيسمعني بقول الكلام ده اكيد هيقولي يعني انتوا عايزين تعملوا الناس اللي عايزه تحب مجانين ولا ايه النظام يعني ؟؟لا لانه كتير من الشباب بيحس بيه و بيبقى نفسه يحب و بالاخص بقى اما يجي يوم الفلانتين كده و الدنيا تزهز و تبقى احمر في احمر و محلات الورد يبقى جوها ربيعي مع انه بيكون في عز الشتا على الاخر و الهدايه رايحه جايه و انت شايف الكل في حاله جميله و انت اللي مش قادر تعيشها ... اكيد بتتأثر نفسيا و تحس انك مكتئب حبه ....
و لا فيلم اجنبي رومانسي او حتى عربي و البطل و البطله عايشين احلى قصه حب و ياه على احلى كلام و اجمل مواقف و ارق احساس و تقول لنفسك ....

نفسي بقى احب ... هحب امتى بقى؟؟؟

و اللي حب و انفصل تبقى حالته اوحش
عارفين ليه ؟؟ ... اصله عاش كل الحاجات الجميله دي و مره واحده اتحرم منها ...
و تعدي عليه الايام دي ايام الذكريات في شريط
مره اما يجي الفلانتين و يفتكر اما قابلها و مره اما يقعد في مكان كانو فيه و مره اما تعب و اتصلت بيه و مره اما اتأخر و قلقت عليه
احاسيس كلها جميله اوي.. بس للاسف كله راح ...
و يااااااااااااااااااااه انا نفسي اوي احب و متحتاج الحب جداً

و هي دي المشكله ... محتاج الحب ... الفراغ العاطفي ... الذكريات الرقيقه ... و الاحساس الصادق اللي نفسي اعيشه ... و الشعور اللي عمري ما حسيته غير اما حبيت حبيبي ...

عارفين ليه احنا قلنا ان الحب ممكن يتحول لمرض نفسى
انا هقولكم .....

سبب ان الحب يتحول لمرض نفسي لإننا بنسمع عن الحب كلام غلط .. و بنسمع عن بلاوي كتيره اوي سمعناها و كلها بيرموها على شماعة الحب .
فيه مفهوم صحيح للحب و مفهوم خاطيء
نبدأ بالمفهوم الخاطيء: و هو الإنجذاب لشخص من اول نظره (و ده بنسميه الإنجذاب السطحي)
اي يعتمد على الشكل و المظهر الخارجي و مادام الشخص ده بقى مظهره حلو تبقى كل صفاته تمام و فل و قشطه بقى .. لكن مع التعامل و بعد الإرتباط تظهر الحقيقه و تبدأ المشاكل و يضيع الحب .. (عشان كده بعض الزيجات بتفشل لإنها بتاخد المفهوم الخاطيء للحب)

تعالى معايا بقى كده للمفهوم الصحيح:الحب هو عباره عن قرار فالمشاعر هي الخطوه الأولى اللي بتبدأ بيها المشوار ولازم تكمل عشان الطريق يكمل

1.العقل و الإقناع:لازم يكون العقل مقتنع بإن الإحساس ده سليم و في محله ومش شوية خوزعبلات
لازم الإتنين يقعدوا مع بعض و يتكلم عشان كل واحد فيهم يفهم التاني فبالتالي الحب هيعيش اطول فتره ممكنه او بمعنى اصح يعيش للأبدو اقرب مثال علي كده
انا ذكرته قبل كده و هو ان الزيجات بتفشل لإنها اتبنت على المفهوم الخاطيء بتاع الإنجذاب السحطي و الإنجذاب ده لا يسانده لا العقل ولا الإقناع
كل واحد مش شايف عيوب التاني و لما يظهر كل واحد على حقيقته مش بيقدروا يكلموا مع بعض فالحب بيضيع و بيفشلوا

2.تاني حاجه و هي مهمه اوي و هي الإحترام لازم يسود الطرفين الإحترام عشان الحب يستمر

3.تالت حاجه و هي مهمه برضو و هي الثقه و المسئوليه كل واحد لازم يثق في التاني و مش معنى انه بيغير عليه يبقى مش واثق فيه ابداً على العكس الغيره دليل على الحب بس لو زادت عن حدها ماتبقاش في محلها و كل واحد برضو لازم يحس بالمسئوليه اتجاه التاني فيراعيه و يراعي مشاعره

4.فيه عنصر مهم هو كمان و هو (الإهتمام) معناه ان كل واحد لازم يسمع احتياجات و مشاكل الطرف الاخر من مشاكل ماديه و نفسيه و كل اللي بيدور في دماغه حتى لو ملاقيتش حل للمشاكل دي بس الاحساس ان فيه شخص مهتم بمشاكل التاني و بيسمع له بيسعد الشخص اللى قدامك و بالذات الحته دي عند الست اكتر من الراجل ... الست لو حست ان الانسان اللي بتحبه مهتم بيها و انه معاها بتركيزه كله مش بربعه بس او نصه ده بيسعدها و بيحسسها باهتمامه بيها و ده بقي بعكس الراجل اللي بيحب لما يكون عنده مشكله يفكر فيها بعمق لوحده

بس ده كله عشان يتعمل لازم تعرف انت عايش انهي نوع من الحب

ياترى انت عايش حب حقيقي : و هو اللي قايم على المفهوم الصحيح؟؟
ولا عايش حب وهمي و هو نتيجة فراغك العاطفي واحتياجك للحب؟؟

انه للاسف الفراغ العاطفي بقى هو مشكلة شباب كتير اوي و يمكن بيكون هو من اهم الاسباب اللي بتأدي للحب الوهمي ده ...
زي ما يكون يوم ما يحب كل شيءهيتحل و الدنيا هتتظبط

و عارفه الرد ... الحب بيخلي الانسان انسان تاني و بيغيره و بيخليه يتغلب على المشكلات و بيساعده ..
هو فعلا كل مشاكلك حلها الحب ... طب انت متأكد انك اما تحب تقدر تعمل حاجه ...
اكيــــــــــــــــــــــد انتي ببتكلمي في ايه ... اكيد هعمل عشان اللي بحبها

طب و الوقت اليى مش بتحب فيه ... هتقف فيه و مش هتعمل حاجه ؟؟؟
طب انت تعرف انك مفروض تعمل عشان تقدر تحب ...
هتقولو بقى البت خرفت ... عايزه ايه انتي دلوقتي
عايزه اقول ان الحب ليه وقت مناسب
و فيه مليون حاجه ممكن تعملها لو مش بتحب ....
عرفينا يا ست الفيلسوفه ... ينوبك فينا ثواب
اذا كنت انت فاقد الحب الرومانسي او حب الحبيب ... فانت لسه عندك اصحابك و اهلك ... غيرك معندوش لا اهل و لا اصحاب و لا حبيب
ده بقى يعيش ازاي ؟؟؟ ... اذا كنت انت عندك اكتر منه و مش عارف تعيش عشان فاقد حاجه واحده ... هو بقى ينتحر!!! ... ده يعتبر فاقد كله

مش الحب هو اللي بيخلي البني ادم يتقدم ... لكن الاراده
لو عندك اراده و امل و ثقه فى الله ... و استنيت الوقت المناسب
هتقدر تحب صح

اللهم اني اسألك حبك و حب من احبك و حب كل عمل يقربني الى حبك .
اللهم ما رزقتني مما احب فأجعله قوه لي فيما تحب انت ... اللهم ما زويت عنى مما احب فأجعله فراغ لي فيما تحب انت .

شايفين الدعاء ده ... واخدين بالكم من الحته دي
... اللهم ما زويت عني مما احب فأجعله فراغ لي فيما تحب انت .
كتير من الشباب عايش فراغ عاطفي ... دماغه كلها انه نفسه يحب
طب ما تيجو نحول الفراغ العاطفي ده .. لحاجه نستفيد بيها
فراغ فى حاجه ربنا بيحبها ...

عارفين المثل اللى بيقول وقوع البلا ولا انتظاره
كتير من الناس تقعد تدور على الحب لدرجه انهم يقعو غلط
لمجرد الاحتياج ... و يوهم نفسه انه بيحب ... و يجى بقى بعد كده
يحب فعلا ... و يضطر يسيب الشخص اللى معاه ... و ده لانه اصلا محبوش ...
ده بس كان محتاج يسمع كلام زي اللي بيسمعه منه
محتاج يحس فى صوته و كلامه و نظرته الاحساس الحلو ده
محتاج يلاقي الاهتمام ده و محتاج الحب ده مش اكتر
فبيوهم نفسه انه بيحب الشخص ده و هو في الحقيقه مش بيحبه

هنا يا جماعه عايزه اقولكم ليه نشغل دماغنا بالموضوع ده
فيه حاجات كتير محتاجين نتأكد منها الاول عشان الحب يبقى صح
و عشان نقدر نعيشه فعلا

اولا نتخلص من الاحساس ده و هنلاقي مليون حاجه نفكر فيها غيره
حاول انك تعمل حاجه ترضي بيها ربنا
تشارك فى دار ايتام ... مشروع خيري ...تتعلم حاجه و تنمي نفسك فى الشغل ... هتقولو و كل ده بردوه ميمنعش اني نفسى احب
اه مش هيمنع ... بس هيكون عندك حاجات كتير تفكر فيها
غير انك تفكر في ان نفسك تحب ...
متديش لنفسك الفرصه انها تفكر في الموضوع ... فكر فى مستقبلك ... فكر في اخلاقك ... فكر في نفسك
انا محتاج ايه عشان اقدر احب؟؟؟
و اسعى انك تعدل من نفسك و تكون شخص كويس دينا و خلقيا
تكون في شغلك كويس اوي تقدر تعيش و تفتح بيت

ساعتها ابقى ادي لنفسك فرصه انك تحب ... لانك وقتها هتبقى وصلت للوقت المناسب

لكن طول ما انت بتفكر في انك عايز تحب و انت معندكش القدره انك تعيش الحب بشكله الصح ادام الناس و ادام العالم و تنمه و تكمله ببداية الصح و هي الجواز ...

هتفضل عايش في احتياج للحب و مش قادر توصل ...
اتعودنا من صغرنا ناخد السلم خطوه خطوه
يبقى ليه نفضل نبص للسلمه الاول و نقول نفسنا نوصل ليها

عارفه انه كتير هيقول بنعمل و بنحاول ... الوقت اللي بتفضل فيه تبص للسلمه دي و تحس انك نفسك فيها و مش قادر توصل ليها استغله في المحاولات اكتر

ربنا بيقول ... اللي بيسيب الدنيا بتجيله لحد عنده .. لكن اللي بيفضل يفكر فيها و يجرى وراها بتسيبه
يبقى انت لو سبت الحب دلوقتي واستغلت الطاقه والاحساس بالاحتياج ده في انك تسعى لانك تكون احسن ...

مش اكيد هتتجازي من ربنا بجزاء كويس ؟؟؟؟ زوجه صالحه فعلا تحبك و تستحقك

عايزه اقولكم يا جماعه ان احساس الاحتياج هو اكتر احساس ممكن يضر بالبني ادم ... لان اللى بيحتاج ممكن يسرق عشان يكفي احتياجه

بس ممكن واحد تاني يحتاج و ميوصلش فيستغنى و يقول هبقى اجيب اللي انا محتاج له اما ابقى اقدر عليه و على اني اوصل ليه

و عشان كده يا جماعه انا بقول ليكم الفراغ العاطفي ده نوع من الاحتياج ...
ممكن فيكم اللي يقدر يرضى احتياجه يعنى جاهز بس مش لاقى واحده يحبها ... يبقى خلاص استنى و متروحش لاى واحده عشان متظلمهاش

و يمكن فيه اللي محتاج الاحساس ده و هو غير قادر على انه يرضي الاحتياج ده ... يبقى خلاص استغنى لحد ما تقدر ... عشان متقعش غلط

عشان محدش يتوهم انه بيحب حد لمجرد انه محتاج للاحساس لكن مش لانه فعلا بيحبها ... لمجرد انه نفسه يسمع الكلام الحلو ده و يحس الاحساس الجميل ده ... بس ده كله هيبقى هو بيخدع بيه نفسه

رأيى انا اننا نملا الفراغ ده بأي شيءو نحاول نستغنى ... عشان منغلطش و منظلمش نفسنا و نظلم معانا حد تاني لا يستحق الظلم ده

حاول انك تشغل وقتك و تفكيرك و دماغك و نفسك بحاجه تانيه عشان متفضلش طول الوقت حاسس انك محتاج حاجه صعب توصل ليها و تفضل اسير الاحساس ده و يوقعك في الغلط لمجرد انك محتاج ...


التوبيك معظمه منقول مع شوية تعديلات
اتمنى انه يعجبكم