نظرة في مباراة القمة .......... و السايامين الخارق

[Golden Eagle]

بسم الله الرحمن الرحيم
طبعا ً موضوع متأخر جدا ً بس لما ينزل متأخر أحسن من إنه ماينزلش أصلا ً

قبل المباراة طبعا ً كان كتير من الناس ( و أنا مش منهم الحمد لله و هاكتب الأسباب ) كانوا بيقولوا خلاص الزمالك هايكسب الأهلي و المانشيتات نزلت بقي و هل يعوض العميد السابق هزيمته بالسته بقي و حاجات
قياسا ً طبعا ً لإن الزمالك كان بيلعب أحسن مبارياته و نجم الزمالك طالع و كدا يعني و الأهلي إتعادل 3 ماتشات ملخصها إنه كان مستحوذ من غير خطورة لأن رؤوس الحربة مصابين و بدأ التمهيد للفوز التاريخي للزمالك اللي طال إنتظاره علشان يبقي الإحتفال بالمئوية إحتفالين ، المطبلاتيه دول نسيوا 3 حاجات ( أسباب إني ما كنتش متشائم من الماتش ) :
1- الأهلي لعب معظم المباريات خارج أرضه بعكس الزمالك
2- مباراة الأهلي و الزمالك ليس لها توقعات
3- نسيوا درس منتخب مصر و مبارياته قبل البرازيل و بعد كدا إرتفاع المستوي مع البرازيل و إيطاليا
كل دا خلاهم يحلموا بقي و يتخيلوا شبكة الأهلي متقطعة من كتر الأهداف و كدا يعني
بس للأسف صحيوا ف الماتش

ف الماتش كان ماتش مش عالي قوي فنيا ً
زيه زي ماتش الأهلي مع سموحة أو الأهلي مع الاتحاد أو الأهلي مع المقاولين
سيطرة للأهلي مع خصم ضعيف جدا ً بس عقم هجومي أهلاوي بسبب عدم وجود راس الحربة المميز ، و مع ذلك كان في خطورة بسيطة من الأهلي ف كورتين لحسام غالي برنس الليالي ( كورة الهيد و كورة الباكورد ) و تسديدة جميلة من فتحي و تسديدة نص نص من شهاب و وان تو بين غالي و طلعت بس طلعت ما عرفش يستلم الكورة كويس و لو كان إستلمها كان بقي فيها كلام تاني
كور الزمالك الخطيرة مافيش غير كورة بالعرض لحقها حسام غالي و كورة بالعرض برضو طلعها وائل جمعة
نجم الزمالك الكبير ما ظهرش ف المباراة لا بشكل كويس ولا شكل وحش و كذلك نجم الأهلي أبو تريكة للأسف كان أقل لاعب من الموجودين ف الأداء
الأهلي عمل اللي عليه في خضم ظروفة و الزمالك حمد ربنا بالنقطة و خلصت الحكاية

بعد الماتش بقي المطبلاتيه اللي قالوا الأهلي سقط و هايشيل م الزمالك كدا و بتاع و شاي بالنعناع و شبشب بصباع و دلع البياع ( دا طقم بيتقال جاهز ) قالوا شكلنا هايبقي وحش قدام الجماهير العريضة اللي بتشاهدنا ( هم شكلهم وحش من زمان أصلا ً بس مش واخدين بالهم ) قالوا الأهلي سئ الأداء بعدم الاستفادة من حالة الزمالك اللي كان فيها دي و غيلب حسين ياسر المحمدي أثر علي الزمالك و حاجات كدا
طيب نفند الحاجات دي
الأهلي ما إستفادش من حالة الزمالك السيئة
معلش هو مين اللي حط الزمالك في الحالة السيئة دي ؟؟؟ مش دفاع الأهلي برضو ؟؟؟ إن نجم الزمالك الحلو بقي ممسوك ف كل حته و مش عارف يتلايم علي كورة يلعبها و بالتالي الزمالك كله ف النازل و ما فيش منه خطورة
جزئية إصابة حسين ياسر
طيب ما الأهلي مصاب منه أحمد حسن و فرانسيس و فضل و أمير سعيود و غدار
دا غير إن عاشور راجع من إصابة و سيد معوض ما لعبلوش ماتشين بعد إصابته
ولا هي إصابات الزمالك فاكرينها و إصابات الأهلي منسية ؟؟؟

طلع علينا حد من الزمالك قعد يحكي ( ما تبينتش حسام ولا إبراهيم بس غالبا ً إبراهيم ) و قالك حكام و مش حكام و نمسا و مش نمسا
طيب مش إنت اللي كنت عايز الماتش يتلعب قبل فترة القيد الشتوي ؟؟؟
و المطارات ف أوروبا عليها تلج نعملك إيه ؟؟؟ + الحكم كان ليه أخطاء مميته أهمها فاول لسيد معوض من ناحية الشمال بعد ما عدا من أبو غانم حبيبنا ( اللي إتزحلق ع الكورة ) حاول سيد معوض ينط من فوقه راح رفع رجله و وقعه و الكورة إتحسبت ضربة مرمي
ما علينا
بعد كدا طلع حسام حسن ف مداخلة تليفونية بيقول إن المنافس ( قصده الأهلي ) طالع و هو فرحان بالتعادل و دا أكبر دليل علي تفوقنا
يا كابتن حسام لاعيبة الأهلي مش فرحانين بالتعادل دول فرحانين بالأداء اللي لو إستمر مع عودة جوزيه و المصابين و اللاعيبة الجدد هايكون ليه جدوي أكتر قدام الزمالك حتي بعد عودة حسين ياسر ليه

واحد يسألني سؤال : إيه حكاية الساسامين الخارق دي ؟؟؟
أقوله أي حد بيتفرج علي كارتون dragon ball z زيي كدا هايعرف إن فيه مخلوق اسطوري إسمه السايامين الخارق
السايامين الخارق دا ما بينسحبش من أي مبارزة و بيفوز ع كل المقاتلين
العميد السابق كان عامل كدا
عايز يقول إنه كان بيسعي للفوز مع إن إستحواذه كان لا يتعدي 35 % ( أنا كدا باكرمه ع فكرة )
بيدور ع الفوز رغم إنه بدأ المباراة من غير مهاجم صريح و حط لاعب الوسط المهاجم علي إنه مهاجم
بيدور ع الفوز رغم إن حارس مرماه كان بيضيع الوقت لما الكورة توصله
شكله كان بيتكلم علي ماتش تاني

[مدرسة الانجلش]

تسلم ايديك

موضوع وتحليل منطقي

[MR : ABO BATTA]

تسلم ايديك يا درش .. قصدي يا حضرة المشرف درش

[تايجر2010]

تسلم يادرش هو دا الكلام

[عبد الله الرفاعي]

تسلم ياغالى جبت المفيد

[rerere]

تحليل ميه ميه
تسلم يا غالي