احلى ربطات طرح لاحلى بنات

[egypty3000]

فيه بنات كتير قوي مش بتعرف إنها تختار الإيشارب ازاي وممكن إنها تلف طول النهار على الإيشاربات في محلات كتير وحاجات ممكن إنها تكون غالية جدا، وفي الآخر تجيب الإيشارب ولكن ممكن تحصل كارثة إنها بعد اللف ده طول النهار والفلوس الكتير اللي اندفعت فيه ممكن إنها تلاقيه مش لايق عليها، بس ولا يهمك.. أنا هاقول لك على شوية حاجات تخلي بالك منها وإنتِ بتشتري الإيشاربات وهي:
أولا: الألوان
ودي بقى مهمة صعبة قوي لأنك فيها لازم تحاولي إنك تحققي معادلة صعبة جدا بين تناسق لون الطرحة مع بشرتك أولا ومع ملابسك ثانيا ومع الإيشاربات بعضها مع بعض ثالثا.
•


مع لون البشره

بصي يا ستي كل اللي مطلوب منك إنك وإنتِ بتشتري إيشارب إنك تحطي الإيشارب على راسك وتقفي قدام المرايا في المحل وتشوفي اللون عامل عليكِ إيه "يعني بالعربي مفتح وشك ولاّ مغمقه".. كمان خدي بالك إن لو كانت بشرتك غامقة يبقى ابعدي نهائيا في اختيارك عن الألوان الغامقة لأنها أكيد هتغمق بشرتك زيادة. وده على العكس طبعا لو بشرتك بيضاء يبقى هتلاقي إن الألوان الغامقة هي اللي مناسبة ليكِ على عكس طبعا الألوان الفاتحة اللي ممكن يكون فيها درجات تخلي لون وشك شاحب.
• مع الملابس
وعلشان تحققي المعادلة دي يا ريت إنك تاخدي الطقم اللي إنتِ عايزة تجيبي له الإيشارب معاكِ وتحاولي توفّقي لون مناسب للإيشارب مع الطقم.
• مع الإيشاربات بعضها ببعض
وطبعا لأن الموضة دلوقتي هي الإسبانش هتلاقي نفسك إنك ممكن تلبسي تلات ألوان من الإيشاربات مع بعضهم أو أكتر علشان كده لازم تخلي بالك كويس وإنتِ بتختاري الألوان دي إنها تكون متناسقة مع بعضها. وعلى فكرة ياريت إنك كمان تحاولي إنك تجددي في الألوان وبلاش تمشي على دمج الألوان التقليدية مع بعضها وخلّي عندك جراءة في اختيار الألوان، يعني مثلا ممكن إنك تدمجي التركواز مع الأبيض والأسود...
وعلى فكرة
الصيف ده نازلة تشكيلة هايلة جدا من الألوان المختلفة زي البني بدرجاته المختلفة والبرتقالي بدرجاته المختلفة والتركواز والروز والزيتي بدرجاتهم أيضا.. كمان فيه إيشاربات فيها نقوش ودي بالذات بتناسب أكتر الفتاة الجامعية.. كمان فيه إيشاربات عليها تطريز وترتر بس خدي بالك إنك تختاري الإيشاربات اللي عليها تطريز بسيط جدا لو كنتِ هتلبسيها في الصباح، لكن لو كنتِ هتلبسيها في المساء أو في مناسبة يبقى براحتك على الآخر..
ثانيا: نوع القماش

ودي نقطة مهمة قوي لازم تخلي بالك منها خاصة لو كانت بشرتك من النوع الحساس.. هتلاقي نفسك لازم تبعدي نهائي عن الأنواع اللي مصنوعة من البوليستر لأنها هتضر بشرتك.. ده بالإضافة إلى أنها مع الحر هتخليكِ مش طايقة نفسك نهائي، ده غير إنها بتتزحلق كل شوية.

علشان كده حاولي إنك تختاري الأنواع المصنوعة من القطن أو الحرير على قطن أو الشيفونات لأنها ببساطة جدا هتلاقيها مريحة جدا في اللبس.


بس كده.. دي كانت شوية نصايح علشان تخلي بالك..




ربطات مختلفة للإيشاربات


نموذج1
تشبكها من عند الرقبة من الوسط ويكون طرف أطول من طرف عشان نقدر نلفها حول الرأس وممكن نزود عليها لو رايحين سهرة أو مناسبة إيشارب كمان بيلمع أو تل أو قماشة سواريه نلفها فوق الإيشارب الأول.. ممكن تكون اللفة طويلة.. الربطة دي بتليق مع كل وجه ومهمة جدا وبتغطي الرقبة لو لابسة حاجة مفتوحة أو قيمص.



نموذج 2

نستخدم فيها إيشاربين مع بعض.. الأول مستطيل عرضه 2 سم وطوله متر ونص من أول طرف الإيشارب وعلى أول منابت الشعر نربطه على ورا على كحكة الشعر، وبعد كده بنجيب إيشارب تاني كبير عريض وطويل ونحطه فوق الإيشارب الأول بعده بمسافة أو فوقه.. الطرف الطويل ممكن نعمل به شكل الوردة أو شكل آخر.



وللموضوع بقيه انتظروا بقيه الربطات مستنيه ردودكم الجميله وتشجيعاتكم