هل أنا حقاً طالب فاشل

[fatac2]

الصف الثالث الإعدادي:
كانت الشهادة الإعدادية هي المَحك الحقيقي لمدى قدرتي على النجاح وإثبات عكس ما يعتقدونه من كوني طالب فاشل، لذلك حرصت على بذل كل جهد ممكن في المذاكرة..استيقظت ذات صباح لأبدأ في مراجعة دروسي قبل الذهاب للمدرسة، وقبل أن أشرع في المذاكرة طلبت مني والدتي الذهاب لشراء الخبز.. فاعتذرت لها لرغبتي في مراجعة دروسي وطلبت منها أن ترسل أخي الصغير لشراء الخبز، لكنها لم تقتنع وصاحت في سخرية: يعني مشوار العيش هو اللي ها يعطلك، ولا ديه حجة عشان لما تفشل في الدراسة محدش يعاقبك..أغلقت الكتاب، وأمسكت بقفص العيش وخرجت في اتجاه المخبز حتى أوفر على نفسي مزيداً من النقاش وأكسب الدقائق المتبقية.. لكن للأسف، أمام شباك المخبز كان هناك طابور طويل من البشر.. كان الزحام شديد جداً، ووقعت أنا في حيص بيص.. فإما أن أعود بدون الخبز لأراجع دروسي، أو أخترق هذا الزحام وأعود بالخبز بعد أن يكون الوقت قد ضاع.. وطبعاً فضَّلت الحل الثاني حتى لا أُغضب والدتي مني...وبعد ساعات عُدت إلى المنزل مهرولاً حاملاً قفص العيش فوق رأسي حتى ألحق بموعد المدرسة، وكان والدي في انتظاري، وفور دخولي من الباب بادرني قائلاً: "بقالك أرع ساعات في الفُرن، كل ده عشان متفتحش كتاب.. فالح بس هات فلوس مصروف، هات فلوس الدرس.. واحد فاشل زيك خسارة فيه قرش تعريفة.."كانت كلمات والدي لي بمثابة تشجيع.. نعم فقد أثارت حميتي ودفعتني لبذل مزيد من الجهد، فربما أقنعته بالعكس... وفي النهاية تمكنت من اجتياز المرحلة الإعدادية وبمجموع مرتفع، لكني أبداً لم أتمكن من تغيير فكرته..

المرحلة الثانوية:
كان رأي والدي أن أختصر الطريق وأقدم أوراقي في مدرسة للتعليم الصناعي، ولم تتفق رغبته مع ميولي وطموحاتي فقدمت أوراقي في مدرسة ثانوي.. وكان قرار والدي كالتالي: "بما إنك فاشل، وبما إني متأكد من عدم نجاحك واستحالة دخولك كلية أو حتى معهد، فأنا غير مسئول عنك"..في الحقيقة وحتى أكون مُنصفاً لم يقل والدي ذلك، لكنه فعل كذلك.. فلم يَعد يعنيه عن كنت أهتم بدروسي أم لا، ولا متى أذهب أو أعود، وكان شعاره في ذلك: "اللي يشيل قربة مخرومة بتخُر على دماغه".. ولأنني اخترت طريقي بنفسي فقد كان عليَّ أن أتحمل النتيجة بمفردي..في الحقيقة كانت الدراسة الثانوية صعبة جداً ومُتشعبة، والمواد الدراسية لا تمت لبعضها بأي صلة.. أحياء وتاريخ وفيزياء.. فلسفة ورياضيات وكيمياء.. عربي وإنجليزي وفر نساوي!!.. وبشِق الأنفس تمكنت من اجتياز الصف الأول، لكن الثانوية العامة بمرحلتيها شيئاً أخر ..كيف يمكنني النجاح والحصول على مجموع دون مساعدة، بدون كتب خارجية وبدون دروس.. والدي يقول: "في أيامنا ماكنش في كتب خارجية ولا دروس وكان الواحد بيذاكر على لمبة جاز".. ربما كان والدي على حق، على كل حال أصبحت الثانوية العامة في أيامنا مغامرة، وقد كانت دوماً مفترق طرق.. لكن الاعتماد على الكتاب المدرسي وحده ليس كافياً بالمرة، فكما ذكرت المواد الدراسية صعبة للغاية ومتشعبة..ربما كان الحل هو الاعتماد على شرح المُدرس داخل الفصل، لكن المُدرس في النهاية موظف يحتاج للقمة العيش لذلك فمن حقه أن يضغط على الطالب لكي ينضم إلى فصول التقوية أو لدرس خصوصي في البيت وكله بتمنه.. وطبعاً لم يكن ذلك بمقدوري لأنه ضد مبادئ والدي ..والدي معذور، لكن مُدرس الفصل عايز يشتغل ويكسب، ثم إن الفصل فيه ستين طالب يشرح لمين ولا لمين، ثم إن المَثل بيقول: الغاوي ينقط بطاقيته.. كدة مُدرس الفصل كمان معذور وعداه العيب، وطبعاً مقدرش ألوم نظام التعليم في البلد، لأني محبش أتكلم في السياسة ونظام التعليم رُكن من أركان السياسة...بكدة إتعددت وجهات النظر..والدي بيقول: الطالب المجتهد هو اللي بيعتمد على نفسه وميحتاجش مساعدة حد..نظام التعليم بيقول: الطالب المجتهد هو اللي بيستفيد من الكتاب المدرسي ومن الشرح في الفصل..ومدرس الفصل بيقول: مستحيل الطالب يستفيد وسط ستين طالب غيره عايزين كلهم يسألوا ويفهموا، وده دور الدروس الخصوصية..أنا شخصياً ماليش وجهة نظر مُستقلة، بس الكلام ده كله بيوصل لنتيجة واحدة، هي إني طالب فاشل ولازم تكون المشكلة فيَّ أنا ..

أنا عارف إني زهقتك بالكلام عني، وإنك أكيد ندمان على الوقت اللي ضيعته في قراءة مقال كتبه طالب فاشل، لكن أنا نصحتك من البداية.. وطبعاً أكيد أنت في انتظار معرفة السبب وراء كتابة هذه الأفكار بعد سنين من حدوثها...السبب إني انهاردة بس حصلت على شهادة الليسانس.. فهل أنا حقاً طالب فاشل..؟!!

[حنان الزيبق]

انت طالب عظيم عشان نستنى النتيجة ولو لبعض دقائق

[pureheart]

لا طبعاً مش فاشل انت طموح و مكافح
المشكلة ان كتير من الاباء بيفشلوا ابنائهم
و بيزرعوا فيهم كل مشاعر الفشل و الاحباط و ده غلط كببببيرررررر
بس يا بختك انت خلصت مش احنا لسه حندخل الجامعة

[el helm el dae3]

تعرف انا بقول اية دلوقتى انا بدعى ربنا انى ابقى زيك بجد انتا انسان جميل وياريت كل طالب يبقى زيك و يعتمد على نفسة ويارب من نجاح لنجاح ليك بأذن الله<_<

[ميدوو2009]

انت بتقول ان الظروف دى صعبه امال تقول ايه في الناس اللى مش عوزين بنتهم تتعلم اصلاًوشيفين ان البنت اخرها البيت والجواز وقعدونى فى البيت بعد الاعداديه ولولا ان فى المدارس نظام منازل مكنتش اتعلمت اصلاًانا دلوقت فى سنه تانيه ثانوى وتخيل انهم بيدعو عليا اسقط علشان اياس واسيبنى من الجنان ده اللى اسمه تعليم اللى هيكون السبب فى انى اعنس والبنات اللى كدى عندهم عيال دلوقت!!!!!تخيل اللي كدى يعنى 17 سنه !!!!!!!!!المهم انا لولا كمبيوتر اخويا انا كنت اتعزلت عن العالم ربنا يخليلى اخويا اللى علمنى الكمبيوتر واللى بيساعدنى فى تعليمى ****ارجوكم ادعولى انجح وماشمتش فيا حد

[uharhghign]

انت نسيت تقول انت حاصل على ليسانس ايه ؟
على العموم شكلك طالب مجتهد و لكن بالفعل الظروف لن تكون عاقب لك لانك اذا اردت النجاح و التفوق دون الكتب الخارجيه او المدرس الخصوصى كان من السهل جدا جدا جدا عليك

[uharhghign]

انا موجود لو فى حد عايز يضيف رد اسمعه !!!!!!!!!

[golgman]

لا طبعا انته مش طالب فاشل والى ياكد الكلام حرصك انك تذاكر وتتعلم
وانك قدرت تنجح وتكمل بالرغم من الاحباط الى حوليك
ومن غير ماتعتمد على حد خالص دا لوحدة اتبات انك راجل بمعنى الكلمه ومتحمل المسئوليه
وانشاء الله ربنا هيساعدك ويكون دايما جانبك
وتتحقق كل ماتتمناه
ربنا يوفقك فى حياتك

[الدمعة الحزينة2]

الفشل ديه كلمة صعبة جدا
لما تحسها
انما مجرد كلام وتحول الى فعل من والدك الذى لم يعرف كيف يصل اليك لانة لم يحاول
واتهمك باللى هو حاسس بية تجاه نفسة
انت بجد حد جميل تحديت ظروفك ومشاكلك لان غيرك كان ممكن يتحول الى الكلمة التى غيرت مصير حياتك
لك منى خالص الاعجاب والاحترام
استمر على تحدى جميع ما يواجهك من المشاكل وارفع راسك واثبت وجودك
اعانك رب الكون وجزاك خيرا ولا تنسى انه اباك مهما اخطا فى حقك واكتسب رضاة يرضى عنك رب الكون




:07811 1rg3:
لك منى خالص التقدير والاحترام

[d00ry]

انت على فكرة مش فاشل ابدا لانك كافحت فى وقت صعب ومكانش حد ساعدك و اعتمدت على نفسك وده نادر قوى دلوقتى
تعمل ايه لو قولت لك ان فيه ناس بيخلو عيالهم ياخدوا دروس من اول اولى ابتدائى فى كل المواد وفيه عيال فيهم مبتذاكرش مع انهم بياخدو دروس
وناس تانية بياخدوا دروس فى كل المواد فى الاعدادى حتى الرسم وهما بردوا اللى مبيذاكروش وتلاقيهم بيجيبوا درجات قليلة و يقعدوا يغشوا فى الامتحانات واكنهم ميعرفوش حاجة عن المنهج مع انهم بياخدوا دروس مش عايزة اقولك ان انا كنت بتفرج عليهم وهما بيغشوا واضحك ان ازاى اهاليهم سايبينهم كده او حتى فين نتاج طول السنة !!
صدقنى انت ان شاء الله ليك مستقبل ناجح لانك عندك عزيمة و اصرار

[hema_tahoun]

علي فكره انت طالب متفوق ومكافح وليس فاشل بس فعلا الدورس مش كل شئ
وانا فعل نفسي اكون زيك. وانا بدعوا للطالبه اللي في 2 ثانوي منازل بالنجاح والتفوف
لانه احسن من غيره وحتي لا يشمت فيه احد ويارب بارك لاخوه لانوا هو الوحيد االي بيسعدها
يارب النجاح للجميع

[شمس الدقهلية]

يابنى الفاشل يكون بلا إحساس بلاأخلاق بلا مبادئ

أنا شايفه إنك مثال للنجاح-وبدون مبالغة إطلاقا- لأن عندك إصرار وعزيمة

وأنصحك _ ولو إنى أصغر منك_ خليك على جدك واجتهادك وضميرك الحى

[الباش مهندس]

ولما انتا بقا كدة تبقي فاشل
امال انا ابقي اية
علي العموم
انتا مش فاشل
انا اللي فاشل وستين فاشل
بااااااااااااااااااي

[soha fouad]

كل الانجازات دي وبتقول فاشل

كفايه انك تقاوم كلالمات الاحباط
ده في ذاته نجاح في الصبر والتحمل االظروف

يعني مثلا والدي ماسك نفطة ضعفي اني بتأثر بالكلام

بيقعد يحبطني احباط بشع ويقوللي انتي فاشله(لاني كنت جايبة في تانية 87% وحولت ادبي) ويقولي غيرك كملوا علمي وشاطرين
غير ان كل مليم بيدهولي عيه حدوتة ورواية

واهو حتي بعد النتيجة ما طلعت وجبت(91%) الحمد لله ودرجاتي الي حد ما حلوة بس للاسف جبت غير لائق ف الفنون

هو ساب المجموع وساب كل حاجه وركز في اني جيبت غير لاق في الفنون
ويقعد يقولي يا خسارة الفلوس مادام انتي مش هتنجحي فيه ليه اخدتي دروس

مش لوحدك بس الفرق بيني وبينك

انك ناجح وقدرت تتحدي الصعاب

ربنا يوفقك

بس نصيحة : بلاش تحكي لاولادك اللي مريت بيه في طفولتك
او توضح الفرق بين مستواك زمان ومستوااهم هم اللي انت ان شاء الله هيكون كويس وهتعيشهم فيه
او توريهم بعد المرار اللي عيشته

لان ده اللي انا بشوفه دلوقتي
(والدي بيعطيني مما ذاقه في طفولته)

[دموع الضمير]

انت طالب مكافح وياريت كلنا نبقى زى حضرتك